Forsíða / Um Skagaströnd / Hólaneskirkja

Hólaneskirkja

Hólaneskirkja er 376 fm. að gólffleti og tekur 150 manns í sæti. Mænishæð kirkjuskips er 8,5 m. og hæð turnspíru kirkjunnar miðað við gólfflöt er 16,75 m. Kirkjan var vígð árið 1991 og hefur auk þess að vera sóknarkirkja verið notuð til tónleikahalds og ýmisskonar samkoma, en hljómburður þykir afbragðsgóður í kirkjunni. Aðalhljóðfæri kirkjunnar er AHLBORN ORGANUM III orgel sem tekið var í notkun aðfangadag 2018. Orgelið er 57 sjálfstæðar raddir sem deilast á þrjú nótnaborð og fótspil, en að auki eru 128 aukaraddir sem hægt er að sækja og skipta út í stað aðal raddanna. Þessi möguleiki eykur fjölbreytni orgelsins mikið. Raddirnar eru teknar upp í stafrænu formi úr góðum pípuorgelum og síðan endurspilaðar aftur í stafrænu formi þegar leikið er á orgelið og þannig næst fallegur pípuorgelhljómur úr orgelinu. Í kirkjunni er einnig vandaður flygill sem bæði er notaður við kirkjulegar athafnir og tónleika eða tónlistarflutning.

Í turni kirkjunnar er klukkuverk sem auk þess að vera notað við kirkjulegar athafnir er stillt til að hringja kl. 12 á hádegi og kl. 18 síðdegis.

Kirkjan er teiknuð af Arkitektastofunni s/f í eigu Ormars Þórs Guðmundssonar og Örnólfs Hall, en innanhússhönnun var í höndum Gunnars Einarssonar og steindur kórgluggi var unninn af Leifi Breiðfjörð. Í kórglugganum eru ýmsar trúarlegar táknmyndir.

Skóflustunga að núverandi Hólaneskirkju var tekin af sr. Pétri Þ. Ingjaldssyni árið 1979 en hann var sóknarprestur á Skagaströnd frá 1941 til ársins 1981. Bygging kirkjunnar stóð með nokkrum hléum fram til ársins 1991.

Kirkja hefur líklega verið á Skagaströnd frá því um 1200. Hún stóð við rætur Spákonufells ofan kauptúnsins og nefndist Spákonufellskirkja. Staðurinn er kenndur við Þórdísi spákonu sem þar bjó til forna og getið er um í nokkrum Íslendingasögum. Kirkjan var bændakirkja allt til ársins 1919 er hún komst í eigu safnaðarins. Síðasta kirkjan á Spákonufelli var timburkirkja sem byggð var 1852 og stóð til 1928. Kirkjugarður hefur frá upphafi kirkjuhalds verið á Spákonufelli.

Árið 1928 var ný kirkja vígð í kauptúninu sjálfu og nefndist hún Hólaneskirkja og dregur nafn af nesi því sem hún stendur rétt ofan við. Þessi kirkja var steinkirkja og teiknuð af Guðjóni Samúelssyni. Hún var sóknarkirkja Skagstrendinga til 1991 er ný kirkja hafði verið reist rétt framan við þá gömlu sem var þá rifin.

Hólaneskirkja

Kennitala: 650169 - 6469
Sími: 452 2930
Sóknarprestur: Sr. Bryndís Valbjarnardóttir: Sími 452 2695 og 860 8845
Formaður sóknarnefndar: Lárus Ægir Guðmundsson: sími 864 7444