Arnar HU-1 til hafnar á Skagaströnd eftir endurbætur í Póllandi

Arnar HU-1 kom til heimahafnar í dag eftir 40 daga slipp í Póllandi þar sem umtalsverðar endurbætur voru gerðar á skipinu. Endurbæturnar miða fyrst og fremst að því að auka sjóhæfni skipsins svo að það standist ýtrustu kröfur Siglingarmálastofnunar um stöðuleika. Verkið fólst í því að skutur skipsins var sleginn út og andveltitankur settur fyrir framan brú þess. Við breytingarnar jókst tankarými fyrir olíu um fimmtung þannig að ekki er lengur þörf á því að sigla í land til olíutöku þegar líður tekur á veiðiferð eins og áður þurfti. Í slippnum í Póllandi var skipið jafnframt sandblásið og heilmálað. Arnar hreppti leiðinda veður í um sólarhring á leiðinni heim og er það samdóma álit skipstjórnarmanna að vel hafi tekist til með breytingarnar, sjóhæfni skipsins hafi aukist verulega og að það muni örugglega verða betri vinnustaður en áður með minni veltingi. Verktakinn í Póllandi skilaði verkinu á skemmri tíma en ráð var fyrir gert og var tilboð pólska fyrirtækisins aðeins um 32% af upphæð lægsta tilboðs hér heima. Kristinn Halldórsson hjá Skipasýn H/F í Reykjavík sá um hönnun og teikningar á endurbótunum Arnars. J.K.