Fréttir

Á síðustu dögum hafa komið út tvö rit tengd Austur-Húnavatnssýslu: FRÁ FJÖRU TIL FJALLS - Kynningarbæklingur um A-Hún. sem kemur út á vegum Ferðamálafélags A-Hún. Bæklingurinn er tæpar 50 síður í A5 broti og inniheldur upplýsingar til ferðamanna um sýsluna, auk auglýsinga frá aðilum í ferðaþjónustu. HÚNAVAKA 2014 – Ársrit USAH sem nú kemur út í 54. sinn. Ritið er tæpar 300 bls. að stærð og inniheldur margvíslegan fróðleik, s.s. viðtöl, frásagnir, kveðskap, fréttir o.fl. ÚTGÁFUKYNNING - Á morgun, uppstigningardag, verður haldinn sameiginlegur kynningarfundur á kynningarbæklingnum og Húnavökuritinu. Fundurinn verður í Eyvindarstofu á Blönduósi, kl. 17:30 og stendur í ca. hálftíma. Boðið verður upp á kaffi og kleinur. Við viljum hvetja þig til að mæta og fjalla í framhaldinu um þessi rit sem bæði stuðla að því að styrkja A-Hún. Með bestu kveðjum. Ferðamálafélag A-Hún. Ungmennasamband Austur-Húnvetninga

Kjörfundur vegna sveitastjórnarkosninga í Sveitarfélaginu Skagaströnd verður í Höfðaskóla á Skagaströnd 31.maí 2014. Kjörfundur hefst kl. 10:00 og lýkur kl. 22:00 Talning atkvæða hefst um kl. 22:45, á kjörstað. Kjörstjórn.

Það er líflegt í litla bænum mínum núna, sjómannadagur og kosningar framundan og bærinn hreinlega iðar af tilhlökkun og spenningi. Það eru ekki margar vikur síðan ég sat og kvartaði yfir því að fólk skartaði orði eins og íbúalýðræði, án þess að hafa nokkurn raunverulegan áhuga á taka þátt og varla áhuga á að kynna sér málin. Þetta get ég ekki sagt í dag. Á vinnustöðum, kaffistofum og á netheimum takast menn á um ýmis málefni og oft skapast fjörugar og skemmtilegar umræður. En þó ekki alltaf. Stundum verð ég hrygg við lestur netmiðla, stundum tapa ég gleðinni eitt andartak og stundum verð ég hreinlega þung á sálinni og svartsýn. Sem betur fer bý ég að því að hafa kynnst 12 spora starfi og eitt stærsta verkefnið sem ég tókst á við þar, var að taka ábyrgð á eigin líðan og upplifun. Mér líkar vel við flesta en þó ekki alla og flestir eru mér góðir en þó ekki allir. Hvort ég læt það skipta mig máli er mitt val. Ég ber ein ábyrgð á viðbrögðum mínum. Enginn annar en ég ber ábyrgð á því hvernig ég kem fram við annað fólk. Annað verkefni í sporastarfinu var hreinlega að breyta því hvernig ég horfi á heiminn. Í stað þess að einblína á þætti sem ekki eru í lagi þá finnst mér gott að fara með æðruleysisbænina og hafa hana bak við eyrað í öllum athöfnum daglegs lífs. Einbeita mér síðan að því sem er gott í kringum mig og þakka fyrir það. Ég er ekki fullnuma í fræðunum, langt því frá, en vonandi þó á réttri leið. Fyrir hvað er ég þakklát í dag? Það er ansi margt: Ég er þakklát fyrir að hafa fæðst hér og alist upp að miklu leyti. Ég er þakklát fyrir son minn og allt sem hann hefur kennt mér og gefið af sér. Ég er þakklát fyrir það gæfuspor að flytja hingað fyrir tveimur árum. Ég er þakklát fyrir allt það góða fólk sem hér býr og bauð okkur mæðginin velkomin aftur heim. Ég er þakklát fyrir öll brosin og glaðværðina sem mætir mér hvert sem ég fer, þó það sé bara út að ruslatunnu. Ég er þakklát fyrir vinnustaðinn minn. Fólkið sem þar starfar við hlið mér og fólkið sem ég þjónusta. Ég er þakklát fyrir ódýru íbúðina sem ég leigi af Sveitarfélaginu. Ég er þakklát fyrir hitaveituna sem gerir það að verkum að ég get staðið undir sjóðheitri bununni eins lengi og ég þarf. Það er gott eftir góðan sundsprett í köldum sjónum. Ég er þakklát fyrir vöruúrvalið í búðinni og þjónustuna sem ég fæ þar daglega. Ég er þakklát fyrir náttúrufegurðina, fuglasönginn og fagra fjallasýn, sama í hvaða átt er litið. Þessa dagana er ég jafnframt þakklát fyrir góða hópinn sem skipar H-listann, Skagastrandarlistann. Þakklát fyrir þá gleði og bjartsýni sem einkennir þennan samstillta hóp. Þakklát fyrir að þarna er fólk sem hlustar og er tilbúið að gera enn betur. Þakklát fyrir að þarna er fólk sem ég treysti og fyrir traustið sem mér er sýnt. Ef velgengni þín vegur salt og vonin er að flaksa. Þú skalt elska og þakka allt það sem á að vaxa. Höf. Hallgrímur Óskarsson Ég hlakka til að sjá ykkur vonandi öll á laugardaginn! Á kjörstað, í skrúðgöngu, sjómannamessu, skemmtisiglingu, á Hafnarhúsplaninu, í sjómannadagskaffi, við talningu atkvæða eða á dansleik í Fellsborg. Kjósum eftir hjartanu og höfum í huga að hvernig sem þessar kosningar fara, þá ætlum við að búa hér áfram saman í sátt og samlyndi. Kærar kveðjur til ykkar allra X-H Sigurlaug Lára Ingimundardóttir

Nýlega keypti Sveitarfélagið Skagaströnd þjónustu af fyrirtæki, Rannsóknir og ráðgjöf ferðaþjónustunnar ehf. Það sem sveitarfélagið keypti í raun var skýrsla (sem finna má á vef sveitarfélagsins) þar sem reynt var að leggja mat á fjölda ferðamanna á Skagaströnd á undanförnum árum. Niðurstöður skýrslunnar gefa til kynna að umtalsverður fjöldi ferðamanna heimsæki okkur á hverju ári og jafnframt að aukning á milli áranna 2004 – 2013 séu 57%. Ekki ætla ég að reyna að leggja mat á áræðanleika þessara niðurstaðna en ætla hins vegar að leyfa mér að telja upp atriði sem gætu fyllilega verið meðal ástæðna þess að gestir vilja heimsækja Skagaströnd. Við eigum snyrtilegan, lítinn og lifandi bæ sem er svo sannarlega áhugaverður. Hér hefur fólk getað keypt mat í Kántýbæ og hjá Olís. Við eigum flottasta kaffihús á landinu, getum státað af Árnesi og hinu dulúðlega Spákonuhofi. Hér fær fólk persónulega og öðruvísi þjónustu í sundlauginni og getur kíkt inn í Djásn og Dúllerí og keypt handverk. Hér er opin matvöruverslun sjö daga vikunnar. Hér getur fólk búist við að rekast á erlenda listamenn að störfum hvar og hvenær sem er. Fólk getur dáðst að „stóru“ andlitsmyndunum sem málaðar voru hér síðasta sumar. Göngufólk hefur aðgengi að tveimur vönduðum bæklingum sem lýsa gönguleiðum á Spákonufell og Spákonufellshöfða. Hér er einnig að finna eitt best varðveitta leyndarmál golfaranna, Háagerðisvöll. Síðast en ekki síst erum við sjálf upp til hópa stórskemmtilegt fólk sem mjög áhugavert er að kynnast. Hvað er það hins vegar sem vantar inn í þessa upptalningu? Væntanlega þurfið þið ekki að hugsa lengi til þess að finna svarið við spurningu minni. Að sjálfsögðu er það gistirými fyrir gestina. Þeir sem ekki vilja nota okkar frábæra taldsvæði eða gista í heimahúsum hafa mjög takmarkaða möguleika til að halla hér höfði. Síðastliðið ár hefur sveitarstjórn Skagastrandar verið að kynna sér hvernig uppbygging ferðaþjónustu hefur átt sér stað á öðrum landssvæðum. Segja má að vinnan hafi fyrir alvöru hafist eftir að niðurstöður íbúaþings sem haldið var í mars 2013 lágu fyrir enda skilaboðin nokkuð skýr: „Framtíðarsýnin sem lesa má úr niðurstöðum íbúaþingsins einkennist öðru fremur af áberandi væntingum til þess að mikil uppbygging verði í ferðaþjónustu auk þess sem meira verði úr nýtingu sjávarauðlindarinnar á staðnum. Hins vegar kom í ljós að ferðaþjónusta er varla nefnd í umræðum um það sem gerir Skagaströnd aðlaðandi í dag, þannig að álykta má sem svo að sú atvinnugrein sé á byrjunarreit og mikið átak þurfi til að uppfylla væntingar íbúanna á því sviði.“ Er ekki komið að því að við Skagstrendingar viðurkennum ferðaþjónustu sem alvöru atvinnugrein? Ætlum við ekki að taka þátt í þeim uppgangi sem á sér stað í ferðaþjónustu? Hefði byggst upp hér útgerð ef aldrei hefði verið byggð höfn? Hefðu bátar komið hér til löndunar ef ekki hefði verið stofnaður fiskmarkaður? Fordæmi eru fyrir að vel takist til þegar rétt er á spilum haldið. Í því sambandi má nefna Patreksfjörð. Þar byggðu heimamenn upp hótel í samstarfi við Fosshótel. Það sem gerðist í framhaldinu var að einstaklingar fóru að bjóða upp á margvíslega afþreyingu s.s. siglingar, veiði- , jeppa- ,sleða- og fjórhjólaferðir. Nýstofnaður Atvinnuþróunarsjóður Skagastrandar ætti að geta stutt við sambærilega þróun á meðal íbúa hér líka. Á síðasta fundi fráfarandi sveitarstjórnar var samþykkt að stofna félag sem myndi beita sér fyrir byggingu hótels á Skagaströnd. Félaginu er í fyrstu ætlað huga að hönnun slíkar byggingar, leita áhugasamra samstarfsaðila og kanna fjármögnunarmöguleika verkefnisins. Skagastrandarlistinn óskar eftir umboði frá ykkur kjósendum til þess að vinna áfram að þessu framfaramáli. Halldór Gunnar Ólafsson

Dagskrá sjómannadagsins á Skagaströnd laugardaginn 31. maí 2014 10:30 Skrúðganga frá höfninni að Hólaneskirkju Fjölmennum á skrúðgönguna til að viðhalda þessari skemmtilegu hefð. 11:00 Sjómannamessa í Hólaneskirkju Kór sjómanna syngur við athöfnina. Að messu lokinni verður lagður blómakrans við minnismerki drukknaðra sjómanna til að heiðra minningu þeirra. 13:15 Skemmtisigling Foreldrar hvattir til þess að fjölmenna með börn sín. 14:00 Skemmtun á Hafnarhúsplani Skemmtun hefst á fallbyssuskoti. Kappróður og leikir á plani. Ljósmyndasýning á austurvegg Hafnarhússins. Vigdís Viggósdóttir með 12 mynda seríu sen nefnist Samruni Mótorhjólasýning. Glæsilegir mótorfákar í eigu heimamanna. Sjoppa á staðnum, gos,pylsur, ís og sælgæti. 15:30 Kaffisala í Fellsborg Rjúkandi heitt á könnunni og fjölbreytt bakkelsi. Hestamannafélagið Snarfari býður börnum upp á að fara á hestbak. 23:00 Stórdansleikur í Fellsborg Hljómsveitin Skandall sér um að allir skemmti sér í trylltum dansi. Allir að mæta og skemmta sér nú duglega. Góða Skemmtun

Fermingarmessa í Hólaneskirkju á Skagaströnd laugardaginn 24. maí, kl. 13:30. Séra Bryndís Valbjarnardóttir þjónar fyrir altari ásamt Kristínu Árnadóttur, djákna. Kór Hólaneskirkju syngur við undirleik Hugrúnar Sifjar Hallgrímsdóttur organista og kórstjóra. Meðhjálpari Guðbjörg Ólafsdóttir. Fermd verða: Georg Þór Kristjánsson, Harpa Hlín Ólafsdóttir Jóhannes Hólmar Sigurpálsson Jóna Margrét Sigurðardóttir Lilja Dögg Hjaltadóttir Sigurður Aron Björnsson Valgerður Guðný Ingvarsdóttir Victoría Sif Hólmgeirsdóttir Viktor Már Einarsson -- Bestu kveðjur Bryndís Valbjarnardóttir, prestur

Árbakkasteinn Árbakkasteinn er í raun tvö sker sem standa fram af Hrafnánni. Næst okkur á myndinni er grjótgarður, sem byggður var á fimmta átratugnum, sem upphaf á hafnargerð, sem hugsuð var með varnargarði út í Árbakkastein og síðan þaðan til norðurs að Brúnkollu, sem er blindsker sunnan við enda Útgarðs. Ef þessar hugmyndir hefðu orðið að veruleika væri Skagastrandarhöfn að öllum líkindum lífhöfn í hvaða veðrum sem væri. Þá lá líka fyrir skipulag að Skagaströnd sem 5000 manna byggð sem byggja skyldi á stóriðju - síldarverksmiðjunni - og margfeldiáhrifum hennar. Því miður gleymdist að ræða við síldina til að tryggja hennar þátt í málinu þannig að draumarnir um svo fjölmenna og blómlega byggð runnu út í sandinn.

Sveitarfélagið Skagaströnd auglýsir sumarstörf námsmanna í samstarfi við Vinnumálastofnun. Störfin eru við ýmis verkefni á vegum sveitarfélagsins m.a. við skógrækt, umhverfismál og umsjón með golfvelli. Frekari upplýsingar á skrifstofu sveitarfélagsins. Sveitarstjóri

Á fundi sveitarstjórnar 19. maí sl. var fjallað um Hjallastefnuna og að frekara ferli samninga um leikskólann Barnaból hafi verið frestað fram yfir sveitarstjórnarkosningar. Á fundinum var sveitarstjóra falið að taka saman skýrslu um feril málsins til að skýra aðdraganda þess og umfjöllun. Í skýrslunni sem er aðgengileg á heimasíðunni er leitast við að rekja hinn formlega feril málsins í tímaröð. Skýrsluna má finna hér.

Ágætu Skagstrendingar, ég óska ykkur og okkur öllum til hamingju með það að fá tækifæri til að nýta kosningaréttinn þann 31. maí næstkomandi. Ég býð mig fram til áframhaldandi vinnu í ykkar þágu næsta kjörtímabil enda hafa síðastliðin átta ár verið afar lærdómsrík og í flestum tilfellum skemmtileg. Ég tel afar mikilvægt að innan sveitarstjórna sé fólk sem hefur öðlast reynslu og þekkingu á sveitarstjórnarmálum. Það segi ég fyrst og fremst vegna þess að mér hefur lærst að oft eru mál ekki eins einföld og sjálfsögð eins og þau virðast við fyrstu sýn, því jafnvel í litlu sveitarfélagi eins og okkar þarf stjórnsýslan að vera hin sama og í stærri samfélögum. Flestir sem hafa starfað að sveitarstjórnarmálum eru sammála um að það taki að minnsta kosti eitt kjörtímabil að komast inn í hvernig stjórnsýslan virkar og um hvað verkefni og skyldur sveitarfélaga í raun snúast. Það er auðvitað jafnframt mikilvægt að í sveitastjórnum sé um einhverja endurnýjun að ræða og ekki síður að til starfa veljist jákvætt, víðsýnt og samfélagslega sinnað fólk með fjölbreytta reynslu úr atvinnu- og félagsmálum. Ég tel að með því að veita Skagastrandarlistanum brautargengi í komandi kosningum sé verið að velja fólk í sveitarstjórn sem hefur einmitt þessa eiginleika. Enda má sannarlega halda því fram að þið, kjósendur á Skagaströnd, hafið stillt upp í efstu fimm sæti listans. Við val á listann var leitast við að nota eins opið og lýðræðislegt ferli og mögulegt var. Niðurstaðan var sú að rúmlega 40% af kosningabæru fólki á Skagaströnd tók þátt í uppstillingu listans. Öllum stóð til boða að bjóða sig fram, allir höfðu rétt til að kjósa og allir höfðu tækifæri til þess að hafa áhrif á hvernig staðið var að kosningunni. Allt var þetta framkvæmt á þremur opnum borgarafundum. Þið svöruðuð kallinu og sýnduð að þið hafið áhuga á samfélaginu okkar enda full ástæða til. Fólkið á Skagastrandarlistanum vinnur nú að því að koma stefnumálum sínum á framfæri. Okkur finnst að þið eigið að eiga kost á því að hlýða á málflutning okkar. Við höfum því formlega farið þess á leit við oddvitaefni mótframboðsins að haldinn verði sameiginlegur framboðsfundur þar sem bæði framboðin kynna sín mál og ykkur gefst kærkomið tækifæri að leggja fram fyrirspurnir og fá svör við spurningum ykkar. Hlakka til að eiga við ykkur orðastað xHalldór Gunnar Ólafsson