Fréttir

Undafarið hefur verið líf og fjör í og við höfnina á Skagaströnd. Allt að þrjátíu bátar hafa lagt þar upp og er fjöldi strandveiðibáta þeirra á meðal. Aflinn hefur verið með ágætum að sögn sjómanna. Seinni part dags koma bátarnir inn í röðum og er þá mikið að gera við löndun og vigtun. En menn gefa sér tíma til annarra verka en að draga þann gula. Árni Guðbjartsson í Vík bjargaði álku úti á miðjum Húnaflóa og var hún þakklát fyrir aðstoðina eins og greinilega má sjá á svip hennar. Raunar á blessuð álkan langt flug fyrir höndum þar sem heimkynni hennar er við vestanverðan Húnaflóa. 

Vinnumálastofnun óskar eftir starfsmanni í ræstingar á skrifstofuhúsnæði stofnunarinnar á Skagaströnd. Hjá Vinnumálastofnun á Skagaströnd er rekin Greiðslustofa Vinnumálastofnunar sem sér um greiðslur atvinnuleysistrygginga fyrir allt landið og þjónustuskrifstofa fyrir Norðurland vestra Leitað er að traustum starfsmanni sem er snyrtilegur, skipulagður og hefur áhuga á að skila góðu starfi. Laun eru samkvæmt kjarasamningum SFR. Umsókn ásamt ferilskrá skal senda á netfangið liney.arnadottir@vmst.is fyrir 19. júlí.  Frekari upplýsingar gefur Líney Árnadóttir forstöðukona í síma 455 4200 og á liney.arnadottir@vmst.is.  Starfsemi Vinnumálastofnunar er hægt að kynna sér á www.vinnumalastofnun.is.  

Hvernig getur fámennur klúbbur byggt upp góðan golfvöll? Þessari spurningu og fleirum velti breski golfblaðamaðurinn Nic Brook fyrir sér og til að fá svör sótti hann Skagströnd heim og kynnti sér golfvöllinn. Blaðamaður var hér á ferð með Ásbirni Björgvinssyni framkvæmdastjórastjóra Markaðsstofu ferðamála á Norðurlandi. Þeir hittu nokkra forvígismenn Golfklúbbs Skagastrandar og spurði Nic Brook fjölda spurninga um golfvöllinn og Skagaströnd. Nic Brook tók þátt í Artic Open golfmótinu og Akrueyri og var hann mjög ánægður með þá upplifun.   Blaðamaðurinn skrifar fyrir breska stórblaðið Daily Mirror og má búast við umfjöllun hans á síðum blaðsins á næstunni.  Meðfylgjandi myndir voru teknar meðan á dvöl hans stóð. Á efri myndinni eru Nic Brooks lengst til vinstri, þá Ábjörn Björgvinssona og lengst til hægri er Steindór R. Haraldsson. Lesendur utan Skagastrandar taka væntanlega eftir bláum himni og fögru útsýni. Þannig er þetta alltaf á Skagströnd ...

Hljómsveitin Hjaltalín heldur í kvöld, 7. júlí, tónleika í Bjarmanesi og hefjast þeir klukkan 20.  Lára Rúnars, ásamt hljómsveit hennar, mun sjá um upphitun. Hljómsveitin Hjaltalín var stofnuð í  Menntaskólanum við Hamrahlíð haustið 2004 í tengslum við lagasmíðakeppni nemendafélagsins, Óðrík algaula.  Hjaltalín fékkst við margvíslega tónlist framan af og gekk í gegnum þó nokkrar mannabreytingar. Um haustið 2006 kom hljómsveitin fram á Iceland Airwaves-hátíðinni og fékk þá til liðs við sig söngkonuna Sigríði Thorlacius og var þá hljómsveitin fullskipuð.  Eftir að lagið „Goodbye July / Margt að ugga“ hlaut óvænta athygli á öldum ljósvakans fór hljómsveitin inn í hljóðver og tók upp frumburð sinn, plötuna „Sleepdrunk Seasons“. Platan kom út síðla árs 2007 og hlaut góðar undirtektir gagnrýnenda og hlustenda.  Sveitin var valin bjartasta vonin á Íslensku Tónlistarverðlaununum árið 2008 og Högni útnefndur lagahöfundur ársins.  Sumarið 2008 tók hljómsveitin upp tökulagið Þú komst við hjartað í mér, sem komið hafði út á plötu Páls Óskars þá um jólin. Lagið varð geysivinsælt á stuttum tíma og varð þegar upp var staðið vinsælasta lag ársins 2008.

Nýr mánuður á Skagströnd færir til bæjarins nýja listamenn. Hjá Nesi listamiðstöð eru nú komnir ágætir listamenn til dvalar í júlí. Þeir eru: Maja Lucas, rithöfundur frá Danmörku Per Johansen, frá Danmörku Peter Möller, myndlistamaður frá Þýskalandi Jared Betts, málari frá Kanada Julia Sossinska, málari frá Þýskalandi Johannes Mahle, frá Þýskalandi Sharon Beth Dowell, málari frá Bandaríkjunum Unnur Knudsen, textíllistaðamaður Catelin Mathers-Suter, málari frá Bandaríkjunum Tekið er fagnandi á móti þessum nýju Skagstrendingum og þær óskir fylgja að þeim muni gagnast dvölin vel, en njóti hennar framar öllu.

Settar hafa verið upp tvær vefmyndavélar á höfninni á Skagaströnd. Hægt er að komast inn á myndavélarnar á vinstra megin á forsíðu skagastrond.is. Önnur myndavélin sýnir vestan hluta hafnarinnar, þ.e. viðlegu- og löndunarkantana Miðgarð og Ásgarð.  Frá hinni myndavélinni er útsýni yfir svokallaðan Skúffugarð, þ.e. austurhluta hafnarinnar. Í baksýn er svo hluti bæjarins og Árbakkafjall. Hægt er að opna vefmyndavélarnar í flestum vöfrum. Í fyrsta sinn sem farið er inn á þær þarf að samþykkja uppsetningu á ActiveX hugbúnaði sem er nauðsynlegur svo tölvan geti átt samskipti við myndavélarnar. Þetta þarf þó ekki að gera nema þegar farið er í fyrsta skipti inn á viðkomandi vefmyndavél. Aðgangsstýring er að vélunum, notendanafnið, user, er orðið „gestur“. Lykilorðið, password, er líka „gestur“ Með því að haka í auðan reit mun tölvan framvegis mun þessa skráningu og ekki er því þörf á að endurtaka hana.      Án efa munu sjómenn og útgerðarmenn nota vefmyndavélarnar mikið. gera má þó ráð fyrir að ferðamenn vilji geta farið inn á vefmyndavélarnar, þó ekki sé til annars en að láta sannfærast um að á Skagaströnd er alltaf sól og örlítill andvari. Þetta má nákvæmlega sjá á meðfylgjandi mynd úr vefmyndavélinni, en hún er frá því 2. júlí 2010, kl. 13:40.

Hjaltalín tónleikar verða í kaffihúsinu Bjarmanesi á Skagaströnd miðvikudaginn 7. júlí kl. 20. Lára Rúnarsdóttir hitar upp.

Um síðustu helgi var haldið á Varmárvelli í Mosfellsbæ hið árlega frjálsiþróttamót Gogga Galvaska. Mót þetta er eitt fjölmennasta frjálsíþróttamót landsins, fyrir 14 ára og yngri og var það nú haldið í 21. sinn.  Til leiks mættu m.a. 11 frískir og kraftmiklir krakkar frá Skagaströnd. Þrír  af þeim urðu á meðal þeirra efstu.  Auðunn Árni Þrastarson varð í 2.sæti í 600 m. hlaupi í flokki 9-10 ára,  Valgerður Guðný Ingvarsdóttir varð í 2.sæti í boltakast og í 3.sæti í langstökkki í flokki  9-10 ára.  Róbert Björn Ingvarsson varð í 3.sæti í 800 m.hlaupi í flokki 13-14 ára. Auk íþróttakeppninnar var margt í boði, þar á meðal skrúðganga, gróðursetning og sundlaugarpartí.  Goggi galvaski, hefur haft það að leiðarljósi frá upphafi að gestir skemmti sér vel í leik og keppni og það brást ekki í ár. Meðfylgjandi myndir eru af keppendunum frá Skagaströnd.

Íbúar við Suðurveg eru afar kátir þessa dagana enda er vaskur malbikunarflokkur að störfum í götunni. Ryk, sandur og möl heyrir nú til tíðinda á öllu svæðinu sem oft er nefnd Mýrin. Meðfylgjandi myndir voru teknar í dag við „teppalagninguna“ og má sjá hversu gríðarleg viðbrigðin eru. Svart malbikið leggst slétt og fellt um götuna, hvergi sést nokkur arða. Íbúarnir halda sig innan dyra þangað til verkinu er lokið. Má ekki búast við að haldið verði upp á umskiptin með hressilegu götupartíi?

Þegar runninn er upp síðasti dagur ljósmyndasamkeppni Skagastrandar hafa borist nákvæmlega 154 ljósmyndir.  Eftir að lauslega skoðun á innsendum myndum má segja að flestar sýni Skagaströnd í nýju ljósi eins og áskilið er í keppnisreglum. Allar eru þær mjög áhugverðar og sumar jafnvle einstaklega skemmtilega teknar. Dómnefndin mun áreiðanlega eiga í miklu erfiðleikum með að velja myndir sem sýndar verða á Hnappstaðatúni í sumar. Í raun er það ekki fjöldi myndanna sem vekur athygli heldur hversu breiður sá hópur er sem sendir inn myndir. Borist hafa myndir frá konum og körlum, ungm sem öldnum og jafnvel börnum, sumir eru vanir ljósmyndarar aðrir eru skemmra ég veg komnir með myndavélina sína.  Margir hafa tekið myndir sérsaklega fyrir keppnina, stillt upp fyrirsætum og smellt af einstaklega fallegum myndum. Aðrir hafa látið stundina ráða, tekið myndir sínar þegar augnablikið kallaði og þær myndir eru ekki síðri. Minnt er á að skilafrestur í keppnina rennur út núna á miðnætti, fimmtudaginn 1. júlí. Senda skal inn myndir á netfangið radgjafi@skagastrond.is eða skila á skrifstofu sveitarfélagsins Skagastrandar á minnislykli eða tölvudiski. Meðfylgjandi mynd er ekki í ljósmyndasamkeppninni.