Fréttir

FUNDARBOÐ Fundur verður haldinn í sveitarstjórn Skagastrandar miðvikudaginn 27. júní 2012 á skrifstofu sveitarfélagsins kl 800. Dagskrá: 1. Kosning oddvita og varaoddvita 2. Kjörskrá vegna forsetakosninga 2012 3. Búnaður í bókasafn 4. Rekstur íþróttahúss og sundlaugar 5. Bréf: a. Fjárlaganefndar Alþingis, dags. 18. júní 2012 b. Djásn og dúllerí, dags. 20. júní 2012 c. Sveitarstjóra til Farskóla Nl. vestra, dags. 15. júní 2012 d. RARIK dags. 16. maí 2012 e. Sveitarstjóra til Siglingastofnunar, dags. 14. júní 2012 f. Umhverfisráðuneytisins, dags. 20. júní 2012 g. Eignarhaldsfélags Brunabótafélags Ísl. dags. 22. maí 2012 h. Maríu Ómarsdóttur og Ernu Hreinsdóttur, dags. í júní 2012 i. Hrafnhildar Sigurðardóttur, formanns SÍM, dags. 21. maí 2012 j. Skipulagsstofnunar og Umhverfisstofnunar, dags. 31. maí 2012 k. Centra fyrirtækjaráðgjöf, dags. 13. júní 2012 l. Tónlistarskólans á Akureyri, dags. 12. júní 2012 m. Lánasjóðs sveitarfélaga, dags. 11. apríl 2012 n. Framkvæmdastjóra SSNV, dags. 21. maí 2012 6. Fundargerðir: a. Fræðslunefndar, 14.06.2012 b. Hafnarnefndar, 04.06.2012 c. Stjórnar Félags og skólaþjónustu A-Hún, 07.06.2012 d. Stjórnar Byggðasamlags um Tónlistarskóla A-Hún, 04.05.2012 e. Stjórnar Fjölbrautarskóla Norðurl. vestra, 07.06.2012 f. Heilbrigðisnefndar Norðurlands vestra, 01.06.2012 g. Stjórnar SSNV, 19.06.2012 h. Stjórnar Sambands ísl. sveitarfélaga. 25.05.2012 i. Stjórnar Hafnasambands Íslands. 16.05.2012 j. Stjórnar Hafnasambands Íslands, 20.06.2012 7. Önnur mál Sveitarstjóri

Kjörskrá vegna forsetakosninga 30. júní 2012 liggur frami á skrifstofu Sveitarfélagsins Skagastrandar. Kjörskrárstofninn miðast við þá sem áttu lögheimili í sveitarfélaginu samkvæmt íbúaskrá þjóðskrár 9. júní 2012. Sveitarstjóri

Bandaríski sendiherrann, Luis E. Arreaga, kom í heimsókn til Skagastrandar 18. júní 2012 ásamt eiginkonu sinni Mary og dótturdótturinni Elenu. Sveitarstjórn hafði boðið sendiherranum formlega að koma í heimsókn til að kynna sér atvinnulíf, menningu og mannlíf á Skagaströnd en þó ekki síst til að kynnast Kántrýsetrinu, Kántrýbæ og þeirri tilhöfðun til bandarískrar menningar sem þar hefur þróast. Auk þess að skoða Kántrýbæ og hitta Kúreka norðursins fékk sendiherrann og fylgdarlið hans kynningu á Rannsóknarsetri HÍ, BioPol, Fiskmarkaði Íslands, Spákonuhofi, Nes – listamiðstöð, Hólaneskirkju og Greiðslustofu Vinnumálastofnunar. Allsstaðar voru góðar viðtökur við sendiherranum og veittar upplýsingar og tekin umræða um verkefni, störf og stefnur. Sendiherrahjónin, sem bæði eru sérstaklega góð viðkynningar, voru mjög áhugasöm um allt sem til umfjöllunar var og sýndu Skagaströnd mikinn áhuga. Í bloggi sendiherrans kemur einnig fram hans sýn á heimsóknina: http://ambassadorblogiceland.blogspot.com/2012/06/skagastrond-nice-blend-of-science.html

Laus staða leikskólakennara við Leikskólann Barnaból Skagaströnd Leitað er að metnaðarfullum, jákvæðum og áhugasömum leikskólakennara eða starfsmanni með sambærilega uppeldismenntun sem er tilbúinn að taka þátt í kraftmiklu leikskólastarfi m.a. að vinna við gerð á nýrrar skólanámsskrár og skipulagningu faglegs starfs. Um er að ræða 50% starf á tímabilinu kl. 12 - 16/16:15. Viðkomandi þarf að geta hafið störf frá og með 15. ágúst 2012. Leikskólinn Barnaból er tveggja deilda leikskóli og auglýst starf er aðallega á deild með eldri nemendum á aldrinum 2½ - 6 ára. Ef ekki berast umsóknir frá leikskólakennurum eða fólki með sambærilega uppeldismenntun og sem uppfylla hæfniskröfur er heimilt að ráða leiðbeinanda í stöðuna tímabundið til eins árs. Á Leikskólanum Barnabóli er leitast við að jafna kynjamun og karlmenn jafnt sem konur hvattir til að sækja um starfið. Umsóknarfrestur er til fimmtudagsins 28. júní 2012 Nánari upplýsingar gefur Þórunn Bernódusdóttir leikskólastjóri Sími 452-2706 eða á barnabol@skagastrond.is Heimsíða skólans er á leikskolinn.is /barnabo

Sveitarfélagið Skagaströnd minnir á að skylt er að skrá hunda og ketti á skrifstofu sveitarfélagsins á þar til gerðum eyðublöðum. Hunda skal skrá eigi síðar en mánuði eftir að þeir eru teknir á heimili og hvolpa eigi síðar en þeir verða sex mánaða gamlir. Mynd af hundinum og vottorð um að hundur hafi verið ormhreinsaður skulu fylgja umsókn um skráningu. Hundurinn skal skráður á nafn og heimilisfang lögráða einstaklings, og fær eigandi hundsins afhenta merkta plötu með númeri hundsins, sem jafnan skal vera í ól um háls hans. Árlegt gjald fyrir hunda er 9.000 kr. Allir heimiliskettir á Skagaströnd skulu skráðir á skrifstofu sveitarfélagsins gegn greiðslu skráningargjalds og þar fá eigendur heimiliskatta afhenta númeraða plötu með skráningarnúmeri kattarins, sem alltaf skal vera í ól um háls dýrsins. Árlegt gjald fyrir ketti er 2.500 kr. Reglur um hunda- og kattahald má finna á heimasíðunni: http://www.skagastrond.is/samthykktir.asp

KUL Könnun umhverfisáhrifa á listsköpun Skagaströnd 1. - 30. september 2012 KUL er þverfaglegt verkefni í listsköpun, í umsjón Nes listamiðstöðvar á Skagaströnd, sem haldið verður í september nk.. Verkefnið tengir saman íslenska og erlenda listamenn sem dvelja einn mánuð í listamiðstöðinni og því lýkur með hátíð, þar sem listamennirnir sýna hvernig Skagaströnd og nágrenni hefur áhrif á listsköpun þeirra. KUL verkefnið fjallar um listsköpun og áhrif umhverfisins á hana. Markmið verkefnisins miðar að því að skapa afurð sem hægt er að vinna að á staðnum, afurð sem er hagnýt, afurð sem getur verið þverfagleg og sem örvar huga og hönd. KUL miðar að því að skapa tengsl milli listforma, þar sem við erum til staðar og virk. Verkefnið kannar samræðuna milli staðarins og tilverunnar, hvernig við erum mótuð af innri og ytri aðstæðum og hina síkviku og gagnvirku mótun umhverfis og sjálfsins. Nes listamiðstöð auglýsir eftir tveimur íslenskum listamönnum, til að dvelja í listamiðstöðinni í september, sem eru tilbúnir til að taka þátt í KUL. Innifalin er frí dvöl í listamiðstöðinni og styrkur vegna efniskostnaðar, gegn framlagi listamannanna til verkefnisins. Lokahátíð KUL verður á Skagaströnd 29. september, með listkynningum og matarviðburðum, listamannanna, matreiðslumanna á svæðinu og heimamanna. Einn þáttur í KUL er matreiðsluverkefni sem Henry Fletcher, sérfræðingur í nýtingu vannýttra hráefna, stjórnar. Hann mun safna plöntum og sjávarfangi við strendur Skagastrandar og nágrennis og vinnur síðan með matreiðslumönnum á svæðinu að nýta hráefnin við að skapa nýjar mataruppskriftir og endurbæta gamlar. Þeir matreiðslumenn sem taka þátt í verkefninu eru Gunnar Sveinn Halldórsson í Kántrýbæ á Skagaströnd, Björn Þór Kristjánsson og Shijo Mathew í Pottinum Restaurant á Blönduósi og Jón Daníel Jónsson á Sauðárkróki. KUL er hugmynd sem Tanja Geis, Henry Fletcher, Jacob Kasper og Andrea Cheatham Kasper áttu frumkvæði að. Verkefnið er í umsjón Melody Woodnutt, framkvæmdastjóra Nes listamiðstöðvar. Nes listamiðstöð er staðsett á Skagaströnd og í ár dvelja þar yfir 100 listamenn frá fjölmörgum þjóðlöndum. Vaxtarsamningur Norðurlands vestra styrkir KUL verkefnið. Nánari upplýsingar er að finna á vefsíðunni: http://neslist.is/ Netfang: Melody Woodnutt: nes@neslist.is Sími: Melody Woodnutt: 691 5554 Umsóknareyðublað: http://neslist.is/application/call-for-artists/

Í dag, 8. júní verður opnaður nýr vefur ismus.is þar sem verður hægt að hlusta á hljóðupptökur í eigu Fræðafélags Vestur-Húnvetninga sem hafa verið í geymslu Héraðsskjalasafnsins á Hvammstanga. Upptökurnar eru meðal annars viðtöl með lífsferilssögum 42 sveitunga frá 7.-10. áratug síðustu aldar, ásamt upptökum af mannamótum, skemmtunum og pólitískum fundum.Vefurinn með húnvetnsku upptökunum er undir heitinu "Fræðafélag" Afritun og skráning heimildanna er verkefni unnið að frumkvæði Rannsóknarseturs HÍ á Norðurlandi vestra á Skagaströnd í samvinnu við Tónlistarsafn Íslands, Stofnun Árna Magnússonar í íslenskum fræðum, Miðstöð munnlegrar sögu og Forsvars ehf. á Hvammstanga sem sá um skráninguna,. Vaxtarsamningur Norðurlands vestra, Menningarsamningur Norðurlands vestra, Húnaþing vestra og Þjóðhátíðarsjóður styrktu verkefnið.

Leikskólinn Barnaból 35 ára 7.júní 2012 Á afmælisdaginn verður opið hús frá kl. 13:30 – 16:00 og öllum bæjarbúum boðið að koma í heimsókn Dagskrá: Kl 13:30-16:00 Opið hús: Sýning á verkefnum nemenda skólaárið 2011- 2012 og myndbandi AnneMaríe von Splunter sem hún tók í febrúar s.l. af „nýjum og gömlum“ nemendum Barnabóls Kl 14:00-14:45 Skoppa og Skrítla koma í heimsókn Kl. 15:00-16:00 Afmælisveitingar: Kaka, Svali og kaffi Föstudaginn 8. júní er einnig opið hús frá kl.09:30-16:00 og gestum boðið að koma og kynnast leikskólastarfinu, verkefnum nemenda og afmælismyndband AnneMaríe verður látið rúllar í tölvum yfir daginn. Allir hjartanlega velkomnir Nemendur, kennarar og foreldrafélag Leikskólans Barnabóls Leikskólinn Barnaból 35 ára 7.júní 2012 Myndbandsverk hollensku listakonunnar AnneMarie von Splunter var gert í febrúar 2012 og sýnir nemendur og kennara Barnabóls í nýju ljósi. Umsögn AnneMarie um gerð myndarinnar: Gerð myndarinnar, sem var m.a. innblásinn af leikskólastjóranum, var að ná myndum af eins mörgum og ég næði til á þeim mánuði sem ég hafði til verksins og ættu tengingar við leikskólann frá árinu 1977 til líðandi stundar. Óskað var eftir fyrrum nemendum og starfsfólki á heimasíðu Skagastrandar og öðrum samskiptasíðum á netinu. Fjöldi fullorðinna og barna brást við og skipulögðu einnig þátttöku systkina og skyldmenna sem voru flutt á Blönduós, Sauðárkrók og til Reykjavíkur. Þetta leiddi af sér 88 myndatökur! Sum barnanna sýndu sérstakan áhuga og komu með uppáhalds húfuna sína eða vildu vera á sérstökum stað við myndatökuna. Ég bað þau að snúa sér í hringi og halda myndavélinni í útréttri hendi og snúa linsunni að sér. Leikskólabörnin héldu á myndavélinni og sátu á skrifstofustól, þau yngstu á hnjám kennara. Stólnum var síðan snúið af vinum þeirra og oft varð úr hin skemmtilegasta uppákoma. Þar sem ung börn hafa stutta handleggi sést aðallega andlit þeirra. Myndskeið með þeim sem hafa vaxið meira og hafa öðlast meiri armlengd sýna meira af umhverfinu: heimili þeirra, hafinu, kirkjunni á Skagaströnd eða höfninni. Tónlistarkennarinn á staðnum Hugrún Sif Hallgrímsdóttir samdi fallegan vals við snúning myndanna og flutti á píanó, flautu og hljómborð með manni sínum Jóni Ólafi Sigurjónssyni sem lék á gítar í upptökunni. Myndin er gerð í takti tónlistarinnar, samspili hljóðs og myndar sem lífga hugmynd endurfunda, vals þorpsins í gegnum rás tímans og kynslóðanna. Til hamingju með afmælisárið Barnaból !! Um listamanninn: AnneMarie van Splunter er sjónlistamaður sem býr og starfar í Amsterdam. Verk hennar hafa margvíslegar birtingarmyndir: þær geta verið teppi úr salti eða sykurhaugar sem eru skammtíma innsetningar eða steinsteyptir leikvellir eða stál-garðhlið (styrktarverkefni unnið með fleirum fyrir rannsóknarstofnun byggingarmála) Til að ná sambandi við AnneMarie eða skoða verk hennar er hægt að fara á heimasíðu hennar: www.annemarievansplunter.nl

Ljósmyndasýning Arnars Ólafs Viggóssonar og Jóns Hilmarssonar verður opnuð í íþróttahúsinu á Skagaströnd í dag föstudaginn 1. júní og verður einnig opin á morgun laugardaginn 2. júní. Sýningin er hluti af dagskrá hátíðar sjómannadagsins og er opin kl 13-18 báða dagana.