Fréttir

Dagana 13. og 14. september verður mikið fjör í Austur Húnavatnssýslu, stóðsmölun á Laxárdal og réttir í Skrapatungurétt. Gestir eiga þess kost að slást í för með gangnamönnum á eyðidalnum Laxárdal og upplifa alvöru þjóðlegt ævintýri. Þátttakendur leigja hesta hjá heimamönnum eða mæta með sína eigin hesta. Stóðhrossin verða rekin til byggða á laugardeginum 13. september. Lagt er af stað frá Strjúgsstöðum í Langadal kl. 10. og síðan riðið sem leið liggur um Strjúgsskarð og norður Laxárdal. Athugið að aðstaða til að geyma hross nóttina fyrir smölunardag er við sandnámu við Strjúgsstaði (norðari afleggjari). Þátttakendur eru beðnir að virða að ekki er leyfilegt að reka laus reiðhross í stóðsmöluninni. Við Kirkjuskarðsrétt á Laxárdal er hópurinn um kl 14. Þar hvíla hestar og menn og fá sér að eta og drekka eftir þörfum. Veitingar verða seldar á staðnum. Ráðgert er að leggja af stað kl. 16 frá Kirkjuskarði. Þaðan er riðið norður í Skrapatungrétt sem er ein myndarlegasta stóðrétt landsins. Gestir og heimamenn heillast ávallt af tignarlegu stóðinu. Ferðamannafjallkóngur líkt og í fyrra verður Valgarður Hilmarsson forseti bæjarstjórnar Blönduóss. Hann er heimavanur á þessum slóðum og mun sjá um fararstjórn og leiðsögn ferðamanna í stóðsmöluninni. Fyrir þá sem heldur vilja koma á bíl til að fylgjast með gangnamönnum og réttarstörfum, er rétt að benda á að Skrapatungurétt er í um 15 mín. akstursfjarlægð frá Blönduósi en fram að Kirkjuskarðsrétt er aksturstími um 40 mín. Á laugardagskvöldinu verður auk hefðbundins matseðils sérstök stóðréttarmáltið í boði á Pottinum og Pönnunni Blönduósi.Opið verður á veitingahúsinu við Árbakkann þar sem í boði verður hefðbundinn matseðill. Á sunnudagsmorgun hefjast réttarhöld í Skrapatungurétt um kl. 11. Bændur ganga í sundur hross sín og reka þau svo í lok dags til síns heima. Oft finna karlar og konur sinn draumagæðing í smalamennskunni eða í réttunum. Stóðréttarhelgi Skrapatunguréttar er hátíð heimamanna og ferðafólks þar sem er spilað, sungið og skemmt sér að sið Íslendinga. Að þessu sinni slæst með í för kvikmyndatökulið. Unnið er að gerð heimildamyndar um viðburðinn. Allir gestir eru hjartanlega velkomnir. Nánari upplýsingar um þjónustu má fá í síma: 891 7863 eða í netfangi haukur@ssnv.is.

Í nýbyrjuðum september koma fjöldi listamanna til Skagastrandar og dvelja hjá Nes-listamiðstöð. Þeir heita: Ivetta Gerasimchuk, rithöfundur, Rússland, Jessica Langley, myndlistarmaður/málari, Bandaríkin Ben Kinsley, myndlistarmaður/skúlptúristi, Bandaríkin Kate Dambach, myndlistarmaður/málari, Bandaríkin Katy Hertell, myndlistarmaður/málari, Finnland Albane Hupin, myndlistarmaður/blönduð tækni, Frakkland Julien Toulze, myndlistarmaður/blönduð tækni, Frakkland Aglae Bassens, myndlistarmaður/málari, Belgíu Bryndís Bragadóttir, leikkona, Ísland

Það verður nóg að gera í menningarlífi Húnvetninga og Skagfirðinga í næstu viku því þá mun pólsk/íslenska jazzhljómsveitin Miriam Acoustic Group halda tónleika á flestum þéttbýlisstöðunum. Menningarráð Norðurlands vestra úthlutaði fyrir nokkru styrkjum til menningarverkefna á svæðinu og fékk Kaffihúsið Við árbakkann styrk til að flytja inn þessa hljómsveit. Mun hún spila í grunnskólum og einnig á nokkrum vel völdum stöðum. Á mánudag (1. sept.) verða tónleikar í Félagsheimilinu á Blönduósi kl. 20:30, á þriðjudag eru tónleikar í Kántrýbæ kl. 20:00, á miðvikudag kl. 20:00 njóta gestir kaffi Síróps á Hvammstanga tónleika og lokatónleikarnir verða á Mælifelli á Sauðárkróki kl. 20:00. Gaman er að geta þess að það er frítt á alla tónleikana því auk styrksins frá Mennigarráði hafa nokkur fyrirtæki styrkt verkefnið. Þau eru: Stígandi ehf, SAH afurðir, Samkaup, Vélsmiðja Alla, Léttitækni ehf., Vífilfell, Kjalfell, Sparisjóður Húnaþings og Stranda, KVH Hvammstanga, Sorphreinsun Vilhelms Harðarsonar, Fjölritunarstofan Grettir, Bílaleiga Akureyrar: Höldur, Við árbakkann og Verkfræðistofan Stoð Nú er bara að drífa sig út og njóta góðra tónleika í boði þessara ágætu aðila. Skólatónleikarnir verða sem hér segir: Í Grunnskólanum á Blönduósi mánud. 1. sept. kl. 11, í Húnavallaskóla þriðjud. 2. sept. kl. 10:30 og í Höfðaskóla kl. 14 þann sama dag. Miðvikudaginn 3. sept. verður hljómsveitin í Grunnskóla Húnaþings vestra, Laugarbakka kl. 10:30 og föstudaginn 5. september kl. 10:30 í Árskóla á Sauðárkróki.

Nú þegar sumarið er senn á enda er gaman að rifja upp hvað krakkar í Umf. Fram á Skagaströnd hafa haft fyrir stafni í sumar. Starf félagsins byrjað á fótboltanámskeiði undir stjórn Ágústs Inga sem endaði með þátttöku á Smábæjarleikum á Blönduósi.  Eftir fótboltanámskeiðið hófst starf á íþróttavellinum sem   var eins og undanfarin ár í góðu samstarfi við Sveitarfélagið Skagaströnd.  Að þessu sinni voru þátttakendur um 45. Hér var um að ræða sambland af kofasmíði, skólagörðum og almennri hreyfingu m.a. frjálsum íþróttum, undir stjórn Hilmars Sigurjónssonar.  Við hjá Ungmennafélaginu Fram erum eins og alltaf ákaflega stolt af okkar börnum en að þessu sinni erum við sérstaklega ánægð með hvað margir tóku þátt í íþróttamótum í sumar og hversu góður árangur náðist. Umf. Fram lenti í þriðja sæti á héraðsmóti USAH sem haldið var á Blönduósi. Þar unnu til verðlauna Róbert Björn Ingvarsson, Stefán Velemir, Elvar Geir Ágústsson , Guðrún Anna Halldórssdóttir, Sigurbjörg Birta Berndsen, Guðjón Örn Kristjánsson og Laufey Inga Stefánsdóttir.  Á Barnamóti USAH sem haldið var í Húnaveri átti Umf Fram 15 keppendur sem allir stóðu sig með mikilli prýði. Níu þátttakendur frá Umf. Fram tóku þátt á unglingalandsmóti UMFÍ sem nú var haldið í Þorlákshöfn.  Hafa aldrei jafn margir keppendur frá Umf. Fram tekið þátt á þessu stórskemmtilega móti sem er í raun ein stór hátíð fyrir alla fjölskylduna. Að sjálfsögðu var allt okkar fólk til fyrirmyndar og stóð sig allt frábærlega. Krakkarnir kepptu í frjálsum íþróttum og fótbolta. Á landsmótinu vann Stefán Velemir til verðlauna en hann hlaut silfurverðlaun í kúluvarpi. Frændi hans Róbert Björn Ingvarsson varð fjórði í 800m hlaupi. Þristurinn, frjálsíþróttamót þar sem keppa USAH,USVH og UMSS var að þessu sinni haldið að Reykjum í Hrútafirði. Mótið var æsispennandi og baráttan í fyrirrúmi en svo fór að lokum að USAH sigraði m.a. með góðum árangri krakkana frá Skagaströnd.  Frammararnir sem tóku þar þátt voru Róbert Björn Ingvarsson, Sigurbjörg Birta Berndsen, Elvar Geir Ágústsson, Guðrún Anna Halldórssdóttir og Stefán Velemir. Lönduðu þau samtals 7 gullverðlaunum, 4 silfurverðlaunum og einu bronsi. Rúsínan í pylsuendanum var að þeir frændur Stefán Velemir og Róbert Björn Ingvarsson tóku þátt á Meistaramóti Íslands sem haldið var að Laugum í Þingeyjarsýslu nú um miðjan ágúst. Gerðu þeir sér lítið fyrir og hlutu báðir silfurverðlaun í sínum greinum. Róbert í 800m hlaupi en Stefán í kúluvarpi. Eftir þessa upptalningu á afrekum sumarsins er ljóst að við getum öll verið virkilega stolta af unga fólkinu okkar og því mikilvægt að foreldrar haldi áfram að hvetja börnin til þátttöku í íþróttum. Fh. Ungmennafélagsins Fram Halldór Ólafsson, formaður 

Loksins er heimasíða Höfðaskóla orðin virk á ný. Enn er síðan þó í vinnslu og margt sem á eftir að koma þar inn á næstu dögum og vikum, s.s. bekkjarnámskrár. Einnig er skólinn búinn að koma sér upp myndasíðu sem hægt er að komast inn á með því að smella á tengilinn „myndir úr skólastarfinu“ sem er neðst í valstikunni til vinstri. Er það ósk okkar við skólann að bæjarbúar hafi gagn og gaman af. Slóðin á síðuna er sú sama: http://hofdaskoli.skagastrond.is en einnig er tengill inn á hana hér að ofan.

FUNDARBOÐ Fundur verður haldinn í sveitarstjórn Skagastrandar miðvikudaginn 27. ágúst 2008 á skrifstofu sveitarfélagsins kl 800. Dagskrá: 1. Kjör oddvita og varaoddvita 2. Kosning í nefndir: a) Búfjáreftirlits- og fjallskilanefnd b) Gróðurverndarnefnd (sbr. tilnefningu BHS) c) Fulltrúa á ársþing SSNV 3. Byggðasamlag um tónlistarskóla a) Fundir stjórnar b) Drög að reglugerð tónlistarskólans c) Fjárhagsáætlun 1.07. - 31.12.2008 4. Samningur um skólamáltíðir 5. Styrktarsjóður EBÍ - umsókn. 6. Erindi MX – klúbbs Skagastrandar 7. Bréf: d) Marian Bijlenga, dags. 8. ágúst e) Kristínar Birnu Guðmundsdóttur, dags. 8. ágúst 2008. f) Eldstoða ehf. dags. 11. júlí 2008. g) Bjarna Ó. Haraldssonar, dags. 17. júní 2008. h) Menntamálaráðherra, dags. 3. júní 2008. i) Heilbrigðiseftirlits, dags. 30. maí 2008. j) Samkórsins Bjarkar, dags. 4. júní 2008. k) Búa Þórs Birgissonar, dags. 10. júní 2008. 8. Fundargerðir a) Hafnarnefndar, 6. júní 2008. b) Fræðslunefndar, 12. júní 2008. c) Tómstunda- og menningarmálanefndar, 29. júlí 2008. d) Tómstunda- og menningarmálanefndar, 13. ágúst 2008. e) Stjórnar Norðurár bs. 31. júlí 2008. f) Stjórnar Félags- og skólaþjónustu A-Hún 15. júlí 2008. g) Stjórnar Byggðasamlags um menningar- og atvinnumál 9. Önnur mál

Góð mæting var á Kaupþings golfmótinu á laugardag. Þátttakendur voru 40 og léku þeir 18 holur í blíðskapar veðri á golfvellinum á Háagerði. Mótið var jafnframt minningarmót um Karl Berndsen sem lést árið 1995. Hann var mikill áhugamaður um golfíþróttina og vann mikið og gott starf fyrir Golfklúbb Skagastrandar. Helstu úrslit urðu sem hér segir: Kvennaflokkur án forgjafar: 1. Árný L.Árnadóttir Golfkl.Sauðárkróks 91 högg. 2. Dagný M.Sigmarsdóttir Golfkl.Skagastrandar 101 högg. 3. Ingibjörg Ó.Guðjónsdóttir Golfkl.Sauðárkróks 103 högg. Karlaflokkur án forgjafar: 1. Bergur R.Björnsson Golfkl.Ólafsfjarðar 69 högg. 2. Fylkir Þ.Guðmundssson Golfkl.Ólafsfjarðar 80 högg. 3. Rafn Ingi Rafnsson Golfkl.Sauðárkróks 83 högg. Punktakeppni: 1. Bergur R. Björnsson Golfkl.Ólafsfjarðar 42 punktar. 2. Adolf H. Berndsen Golfkl.Skagastrandar 37 punktar. 3. Dagný M. Sigmarsdóttir Golfkl.Skagastrandar 34 punktar. Mótið var einnig þriðja og síðasta mótið í svokallaðri Norðvesturþrennu sem er samstarfs verkefni golfklúbbanna á Blönduósi, Sauðárkrók og Skagaströnd. Keppt var um besta samanlagða árangur í karla og kvennaflokki. Sigurvegari í kvennaflokki var Árný L.Árnadóttir Golfkl.Sauðárkróks en í karlaflokki sigraði Sævar Steingrímsson Golfkl.Akureyrar.

Opna Kaupþings/Minningarmótið um Karl Berndsen fer fram á Háagerðisvelli við Skagaströnd laugardaginn 23. ágúst. Leikinn er höggleikur án forgjafar í karla og kvennaflokki og punktakeppni í einum flokki. Mótsgjald er kr. 3.000 en unglingar 14 ára og yngri kr. 1.500. Skráning er í fullum gangi á netinu á http://www.golf.is/pages/forsida1/motaskra/upplysingarummot/?idegaweb_event_classname=e34b3d46-4509-406f-9616-530b7975fb41&tournament_id=10117. Frétt af www.huni.is

Námskeið um grenndarfræði, umhverfi og menningu var haldið á vegum Fræðsluskrifstofunnar þann 15. ágúst s.l. í félagsheimilinu á Hvammstanga. Fyrirlesarinn Bragi Guðmundsson, prófessor útskýrð með áhugaverðum dæmum að staðarmenning hvers skólasvæðis leggur skólunum takmarkalítil tækifæri í hendur til að auka fjölbreytni í viðfangsefnum í öllum námsgreinum fyrir alla aldurshópa. Námskeiðið sóttu 60 kennarar grunn- og leikskóla Húnavatnssýslna og grunnskólans á Borðeyri. Þátttakendur lýstu mikilli ánægju með daginn. Myndir: Þátttakendur og Leiðbeinandi.

Föstudaginn 15.ágúst fór Ari H.Einarsson GÓS holu í höggi á braut 1 á Háagerðisvelli á Skagaströnd. Þetta er í annað skipti sem þetta gerist í sögu Golfklúbbs Skagastrandar, en á síðasta ári fór Frímann Guðbrandsson GSS holu í höggi á braut 7. Ari er því orðinn félagi í Einherjaklúbbnum sem er klúbbur þeirra sem afrekað hafa að fara holu í höggi á golfvöllum landsins. Ari sem varð sjötugur á árinu fékk því sönnun þess að allt er sjötugum fært í þessari skemmtilegu íþrótt.