Fréttir

FUNDARBOÐ Fundur verður haldinn í Hreppsnefnd Höfðahrepps mánudaginn 21. mars 2005 á skrifstofu hreppsins kl 1600. Dagskrá: 1. Starfsleyfi fyrir sorpurðun. 2. Byggðakvóti. 3. Bréf: a) Byggðastofnunar, 8. mars 2005. b) Sambands ísl. sveitarf., 4. mars 2005. c) Forstöðumanns Löngumýrar, 8. mars 2005. d) Menntamálaráðuneytisins, 8. mars 2005 e) Skipulagsstofnunar, 11. mars 2005. 4. Fundargerðir: a) Ársfundar Samtaka sveitarfélaga á köldum svæðum, 2. nóv. 2004. b) Stjórnar Samtaka sveitarfélaga á köldum svæðum, 17. nóv. 2004. c) Stjórnar Samtaka sveitarfélaga á köldum svæðum, 18. jan. 2005. d) Stjórnar SSNV, 18. janúar 2005. e) Stjórnar SSNV, 21. febrúar 2005. f) Stjórnar SSNV, 2. febrúar 2005. g) Stjórnar SSNV, 14. mars 2005. 5. Önnur mál. Sveitarstjóri

Helgina 11.-13. mars var Íslandsmót unglinga í badminton haldið í TBR-húsunum í Reykjavík. Níu keppendur frá Umf. Fram tóku þátt í mótinu og kepptu öll í einliðaleik, fimm piltar í flokki Hnokkar C og D og 4 stúlkur í flokki Tátur C og D. Öll voru þau að keppa í fyrsta skipti á Íslandsmóti. Ekki var stefnt á önnur verðlaun en að vera valin prúðasta liðið. Þann titil hrepptu unglingar úr Hamri í Hveragerði en Umf. Fram varð í öðru sæti og fékk 10 box af fjaðraboltum í verðlaun, Í mótslok var fastmælum bundið að á næsta Íslandsmóti skyldu þau hampa bikarnum fyrir prúðasta liðið. Öll stóðu þau sig vel bæði sem keppendur og dómarar. Einn keppandinn, Stefán Velemir, komst í fjögurra manna úrslit í flokki Hnokkar D. Myndirnar eru teknar við setningu mótsins. Tómstunda- og íþróttafulltrúi.

Í morgun blasti við einn hafísmoli utan við höfnina á Skagaströnd. Miklar stillur og fallegt veður skapaði skemmtilega stemmingu í morgunsárið þegar Alda HU sigldi út úr höfninni.

Að undanförnu hefur verið unnið að því að gera Auðbjörgu SK 6, klára til sjósóknar. Norðurfar ehf keypti nýlega skipið og er það skráð á Hofsós. Skipið ber nafn nöfnu sinnar Auðbjargar HU 6 sem staðið hefur uppi í slippnum í nokkur ár. Auðbjörg HU 6 var keypt til Skagastrandar 1977 og var að mestu gerð út á rækju og skelveiðar. Þeim er ætlað ólíkt hlutverk í framtíðinni þar sem Auðbjörg SK 6 mun ætla að sækja áfram sjóinn en hugmyndir eru uppi um að Auðbjörg HU 6 verði varðveitt á Akureyri til minnis um fyrsta frambyggða bátinn en hann var byggður árið 1960 í Slippstöðinni á Akureyri.

Vek athygli á 2. fréttabréfi Barnabóls 2005 og mánaðarskipulagi fyrir mars og apríl.

Laugardaginn 26. febrúar fór “Útivistarklúbbur” félagsmiðstöðvarinnar “Undirheima” á Skagaströnd að Langavatni í dorgveiði undir styrkri stjórn klúbbstjórans Patriks Snæs Bjarnasonar. Engum öðrum sögum fer af veiði en að ekki náðist að veiða allan kvótann. Veðrið lék við veiðimennina sem reyndu fyrir sér á nokkrum stöðum í vatninu. Ætlunin er að fara í aðra veiðiferð seinna í vetur. Tómstunda- og íþróttafulltrúi.

Togarinn Örvar kom í höfn á Skagaströnd sl. mánudag eftir rúmlega 5 sólarhringa siglingu frá Póllandi.Skipið fór í slipp í Gdyna í byrjun janúar og voru gerðar á því talsverðar breytingar. Skut skipsins var slegið út, fiskmóttaka stækkuð og klæðning á millidekki endurnýjuð. Örvar var einnig sandblásinn og málaður hátt og lágt og er nú hinn glæsilegasti. Má segja að það hafi verið gömlum Skagstrendingum mikið gleðiefni að sjá skipið málað í togaralitum Skagstrendings. Örvar fer á veiðar eftir uþb. 10 daga en nú er unnið að því að setja veiðarfæri um borð í skipið og ganga frá vinnslubúnaði á millidekki.

Hið árlega grímuball staðarins var haldið í Fellsborg fimmtudaginn 10. febrúar. Mættu þar margvíslegar furðuverur á öllum aldri og skemmtu sér vel. Verðlaun, fyrir bestu búningana, voru veitt í þremur aldursflokkum, þá var marserað og svo kötturinn sleginn úr tunnunni. Það er skólafélagið Rán sem stendur að grímuballinu með góðri aðstoð foreldra og kennara.

Námsstofan á Skagaströnd Nú er vorönn hjá þeim skólum sem eru með fjarnám. Fjarnámsnemendur eru farnir að mæta í Námsstofuna eftir jólafrí og áramótaannir. Tveir nýir nemendur hafa gert samning um aðgang að aðstöðunni eftir áramót. Enn skal ítrekað að í Námsstofunni er góð aðstaða til að stunda fjarnám, nokkrar tölvur og lesstofa. Nú er búið að tengja fjarfundabúnaðinn sem þýðir að nú er hægt að sitja kennslustundir í Námsstofunni. Þrír nemendur hafa nýtt sér það á nýju ári. Föstudaginn 18. febrúar kemur hingað ungur maður sem er að vinna lokaverkefni sitt við Háskólann í Kaupmannahöfn í rafmagnsverkfræði og tölvunarfræðum. Verkefni hans er unnið í samvinnu við Flugmálastjórn og er örsmár hluti af flugumferðarstjórnunarkerfinu á Atlandshafinu. Hann kemur hingað með sína tölvu og prentara, tengist kerfinu hér og nýtir sér fjarfundabúnaðinn til að vera í sambandi við Kaupmannahöfn og Reykjavík. Hann reiknar með að vera hér í 1-2 vikur. Við lítum á þetta sem tilraun og ef hún gefst vel og allt virkar eins og það á að gera geta aðrir fylgt í kjölfarið. Þriðjudaginn 8. febrúar hófst tilraunaverkefni Námsstofunnar og Trésmiðju Helga Gunnarssonar ehf. Helgi kemur inn á Námsstofuna með 1-2 starfsmenn með sér á morgnanna og er um 2 klst. Umsjónarmaður Námsstofunnar leiðbeinir þeim um Internetið, póstforrit, Exel, Word o.s.frv. allt eftir þörfum hvers einstaklings. Næst mætir Helgi föstudaginn 11. febrúar og síðan verður næsti dagur ákveðinn. Þriðjudaginn 22. febrúar verður fyrri hluti námskeiðs í AutoCAD í tölvuveri Höfðaskóla. Seinni hlutinn verður þriðjudaginn 15. mars. Fyrirtækið Snertill sem er viðurkenndur sölu- þjónustu- og kennsluaðili Autodesk og CADPOINT verður með námskeiðið. Námskeiðið er á vegum Námsstofunnar og á milli fyrri og seinni hluta verður hægt að koma í tölvur Námsstofunnar og æfa sig í verkefnum í AutoCAD eftir samkomulagi við umsjónarmann. Þeir sem vilja aðstoð eða nýta aðstöðuna í Námsstofunni á Skagaströnd er bent á að hafa samband við undirritaðan. Febrúar 2005 Umsjónarmaður Námsstofunnar á Skagaströnd Hjálmur Sigurðsson S: 8440985

Furðuverur dagsins sýndu ýmis skemmtileg tilþrif við söng og spil á öskudegi. Ungir Skagastrendingar fóru ótroðnar slóðir og bættu nokkrir upp sönginn með gítarspili. Íklæddir á ýmsa vegu mættu tónlistarmenn framtíðarinnar og létu sér ekki muna um að skemmta starfsfólki á hreppsskrifstofunni og hlutu að sjálfsögðu góðgjörning að launum. Grímuballið verður haldið í Fellsborg á fimmtudag milli kl. 19.00-21.00 og eru allir hvattir til að mæta í grímubúningum.