Fréttir

Háskóli unga fólksins, HUF, hefur verið starfræktur á vegum Háskóla Íslands frá árinu 2004 og notið mikilla vinsælda. Í tilefni aldarafmælis HÍ 2011 verður starfsemi HUF með hátíðarsniði og skólinn á faraldsfæti. Þar ber hæst ferð Háskóla unga fólksins með svokallaðri Háskólalest sem heimsækir níu áfangastaði á landinu í samstarfi við Rannsóknarsetur HÍ á landsbyggðinni, grunnskóla, sveitarfélög o.fl. Frá og með 29. apríl  til 28. ágúst 2011 verða valin námskeið HUF, ætluð börnum frá 12 – 16 ára, haldin víðs vegar um landið undir formerkjum Háskólalestarinnar. Til viðbótar við námskeið fyrir unga fólkið verður fjölþætt dagskrá fyrir alla aldurshópa á hverjum áfangastað, viðburðir, uppákomur, örfyrirlestrar og margt fleira.   Háskólalestin verður á Skagaströnd á tímabilinu 23. – 27. maí í vor. Þetta er þó ekki endanleg dagsetning. Háskólalestin er skipulögð í nánu samstarfi við Vísindavef Háskóla Íslands en á vefnum verður sérstakur „brautarpallur“ lestarinnar. Á Vísindavefnum verður m.a. fróðleikur um hvern áfangastað lestarinnar, tekinn saman með virkri þátttöku grunnskólanemenda og Rannsóknasetra HÍ. Nemendur vinna jafnt spurningar og svör á vefinn ásamt öðru efni, svo sem myndböndum og hlaðvarpi.  Undirbúningur Háskólalestarinnar stendur nú sem hæst og viðbrögð og undirtektir hafa verið einstaklega jákvæð. Við þökkum fyrir velviljann og hlökkum til samstarfsins. Nánari upplýsingar veitir Guðrún Bachmann, kynningarstjóri Háskóla Íslands, gudrunba@hi.is,  525 4234, 864 0124

Ugmennassamband A-Hún hélt 94. ársþing sitt um helgina, en nú eru 99 ár fram stofnun sambandsins. Um 30 fulltrúar voru mættir ásamt gestum frá ÍSÍ og UMFÍ.  Auk venjulegra aðalfundarstarfa var Íþróttamaður ársins valinn en það var að þessu sinni Stefán Velemir úr Fram á Skagaströnd en Stefán er mjög efnilegur frjálsíþróttamaður. Auk þess var Þórhalla Guðbjartsdóttir, formaður Umf. Hvatar, sæmd silfurmerki ÍSÍ. Nánari upplýsingar um þingið verður hægt að nálgast á heimasíðu USAH innan tíðar. Fréttin er fengin af vefsíðunni huni.is.

Fyrsta vika marsmánaðar var þemavika í Höfðaskóla á Skagaströnd. Þá unnu nemendur með margs konar fróðleik um vesturferðir Íslendinga fyrir og eftir aldamótin 1900. Afrakstur vinnunnar var síðan sýndur á stórri sýningu í íþróttahúsinu í lok vikunnar. Nemendunum var skipt í sjö hópa þar sem hver hópur vann með ákveðið efni sem snertir vesturferðirnar. Hóparnir skoðuðu vesturferðirnar frá sjö sjónarhornum sem voru: ástæður ferðanna, ferðalagið sjálft, bústaðir fyrstu árin í nýja landinu, samskiptin við frumbyggjana/indíánana, þekktir staðir sem Íslendingar fluttust til, nokkrir þekktir Vestur-Íslendingar og einn hópurinn nýtti sér vitneskju sína til að búa til trúverðugar frásagnir af fjölskyldum sem fluttu til Vesturheims.  Öllu þessu gerðu hóparnir síðan góð skil með plakötum, líkönum, myndum, ljóðum, söng og leikþáttum á opinni sýningu fyrir hádegi á föstudag. Foreldrar og aðrir velunnarar skólans fjölmenntu á sýninguna og höfðu margir á orði hve vel heppnuð og yfirgripsmikil hún væri. Þegar nemendur voru spurðir hvað hefði komið þeim mest á óvart sögðu margir að það væri fjöldi þeirra sem fór úr núverandi skólahverfi Höfðaskóla vestur um haf. 220 manns fluttu vestur á tímabilinu 1874-1913 úr Vindhælishreppi hinum forna þar sem í dag búa um 650 manns. Yfirgnæfandi meirihluti flutti á árunum 1874-1900.  Annað sem nemendurnir höfðu ekki gert sér grein fyrir var hve miklir erfiðleikar biðu landnemanna í nýja landinu og hve mikil samskiptin við indíána hefðu verið. Textinn í fréttinni er úr Morgunblaðinu 8. mars 2011 og er eftir Ólaf Bernódusson, fréttaritara blaðsins á Skagaströnd. Meðfylgjandi myndir tók Signý Ósk Richter sérlegur hirðljósmyndari fréttasíðunnar skagastrond.is.

Ekki er hægt að kvarta undan veðurlagi á Skagaströnd í vetur. Það sanna tölur frá hinni óopinberu veðurstofu sveitarfélagsins sem sett var á laggirnar til að staðfesta megi með rökum að óvíða er veður betra.  Hiti Meðalhiti á Skagströnd í febrúar mældist 1,4 gráður. Hæst fór hitinn í 9,8 gráður þann 11. febrúar kl. 14:50. Raunar var mjög hlýtt allan þann dag, meðalhitinn var 7,5 gráður og 5 gráður daginn eftir.  Kaldast var fyrri hluta mánaðarins og var frost alla átta fyrstu daganna. Lægst fór hitinn í -6,3 gráður þann 8. febrúar um kl. 2 um nóttina. Hélst frostið þá í um sex gráður en hjaðnaði eftir því sem leið á morguninn. Um hádegið var hitastigið komið upp í frostmark. Það sem eftir lifði mánaðarins frysti að vísu af og til en meðaltalið hélst þó alltaf yfir frostmarki. Vindur Vindgangur á Skagaströnd var með hóflegra móti, aðeins 6,7 metrar á sekúndu (m/s) að meðaltali sem er þó aðeins minna en í janúar en þá var meðaltalið 9 m/s.  Auðvitað hvessti hressilega í febrúar. Hraðast fór vindurinn yfir sviðið á 21 m/s og gerðist það í tvígang, þann 3. og 21 febrúar. Þetta má glögglega sjá á meðfylgjandi línuriti og eru einkennin fimm hámörk. Á eftir þeim lægði, rétt eins og allur vindur væri úr máttarvöldum.  Þá ályktun má draga af línuritinu að sjaldnast er hvasst í langa tíma í einu, aldrei marga daga. Þegar lægir minnkar dregur jafnt og stöðugt úr vindi uns nóg virðist komið og þá eykst vindhraði aftur á svipaðan hátt uns hámarki er náð.  Þegar á allt er litið má eflaust halda því fram að vindur undir 10 m/s sé ekki sem verstur en vaxi hann umfram það leiðist mörgum útiveran. Vindáttir Suðlægar vindáttir voru ríkjandi á Skagaströnd í febrúar. Þetta sést best á meðfylgjandi vindrós. Hún sýnir hvernig hreyfing á vindi dreifist á áttirnar. Til að skýra nánar út hvernig þetta þróaðist í mánuðinum er gott að skoða meðfylgjandi töflu um hlutfall ríkjandi vindátta: Vindátt Hlutfall Norður       6,1% Norðaustur       9,9% Austur     22,0% Suðaustur     16,6% Suður     20,3% Suðvestur     20,7% Vestur       2,6% Norðvestur       1,7% Í ljós kemur, eins og gjörla sést á vindrósinni, að aust- og suðlægar áttir voru algengastar. Norðaustanáttin er ekki í hávegum höfð á Skagaströnd og hún lét lítið á sér kræla, rétt eins og hún fyndi fyrir óvildinni. Samanburður Veðrið er lítt skemmtilegt til umræðu ef ekki væri fyrir samanburðinn. Þess vegna er ekki úr vegi að skoða hvað systurstofnunin Veðurstofa Íslands segir um febrúarveðrið. Sú stofnun hefur lengi langt fyrir sig veðurathuganir og þykir bara nokkuð ábyggileg á sínu sviði, sérstaklega hvað varðar athuganir á liðnum tíma, en lakari með spár, sérstaklega langtíma. Af handahófi grípum við hitatölur frá nokkrum stöðum. Staður Hiti Stórhöfði            3,4 Höfn í Hornafirði    2,8 Reykjavík            2,1 Skagaströnd    1,7 Stykkishólmur    1,3 Bolungarvík    0,9 Egilsstaðir            0,3 Akureyri            0,1 Hveravellir        -3,9 Af þessum tölum má draga þá ályktun að kaldara er á austanverðu Norðurlandi en á því vestanverðu. Hitastigið er svipað á Reykjavík, Stykkishólmi og Skagaströnd. Hitinn á Skagaströnd er líklega í rökréttu samhengi við aust- og suðlægar áttir sem voru ríkjandi í febrúar.

Greiðsla fasteignagjalda Ágætu fasteignaeigendur Við álagningu fasteignagjalda 2011 var ákveðið að draga úr pappírsnotkun með því að senda einungis prentaða greiðsluseðla til þeirra sem þess óska. Fyrsti gjalddagi álagningar var þó sendur út með hefðbundnum hætti og gert ráð fyrir að þeir sem óska eftir útprentuðum greiðsluseðlum notuðu tímann til að hafa samband við skrifstofu sveitarfélagsins. Annar gjalddagi fasteignagjalda sem er 1. mars hefur verið sendur út á prentuðum seðlum til þeirra sem þess óskuðu. Eindagi gjaldanna er 31. mars og því er enn tími til að óska eftir útprentuðum greiðsluseðlum. Skorað er á þá sem ekki hafa aðgang að rafrænum greiðslum að hafa samband við skrifstofu sveitarfélagsins í síma 455 2700. Skagaströnd, 1. mars 2011 Magnús B. Jónsson, sveitarstjóri

Í gærkvöldi, sunnudagskvöld, opnaði Aimée Xenou sýningu í Nesi listamiðstöð undir nafninu „Innflutningur á fjölskyldu - annar hluti“. Eins og felst í nafninu var þetta seinni hluti gjörnings. fyrri hlutinn var í Hólaneskirkju fyrir réttum hálfum mánuði. Á annað hundrað manns sótti sýninguna í gær og koma þar margt til. Gjörningar geta verið áhugaverðir og skemmtilegir. Hitt er ekki verra að í seinni hlutanum var öllum Skagstrendingum boðið að koma og snæða köku sem merkt var nafni hvers og eins þeirra. Aimée Xenou er listamannsnafn þýsku konunnar Ninette Rothmüller. Hún hefur dvalið í Nesi listamiðstöð frá því í lok nóvember á síðasta ári. Undanfarin 20 ár hefur hún ferðast mikið á milli landa, víða staldrað við, þó hvergi lengur en sex mánuði. Segja að hún hafi öll þessi ár hvergi átt heima. Og þó - ef til vill er réttara að segja að hún hafi átt alls staðar heima. Fjölskylda Ninette hefur aðstoðað hana hér á landi. Bróðir hennar orgelleikarinn Björn Rothmüller kom alla leið frá Þýskalandi til að leika á kirkjuorgelið og vera viðstaddur fyrri hluta gjörningsins. Svo hélt hann aftur til síns heima. Nú hafa foreldar hennar heimsótt Skagaströnd, þau Heike og Joschi Rothmüller, og hafa tekið virkan þátt í framkvæmd gjörningsins. „Hvernig er að vera alltaf útum allt og skilja ekki tungumálin,“ spurði Katla, nemandi við Höfðaskóla á Skagaströnd. Ninette fannst þetta góð spurning og tók Kötlu bókstaflega á orðinu. Hún gekk því á milli manna og fékk Skagstrendinga sem hún hitti á förnum vegi til að kenna sér eitt orð í íslensku. Þýðingu orðsins mátti hins vegar aðeins segja í táknmáli eða á íslensku og þangað til Ninette skildi það. Þannig safnaði hún saman á þriðja hundrað orðum sem hún reyndi að tileinka sér. Ninette fékk síðan Arnþrúði Jónsdóttur, táknmálstúlk, til að útskýra orðin á myndbandi. Þá bjó Ninette til tungumálaþraut sem var hluti af sagnaskúptúr sýningar hennar í Bjarmanesi. Og alla síðustu viku hafa Skagstrendingar lagt leið sína þangað til að reyna að ráða í þessi íslensku orð á sem þeir kenndu listamanninum. Dæminu hafði í þetta sinn verið snúið við því nú voru þau komin á táknmál og því heimamanna að geta upp á þýðingunni. Þann tíma sem Ninette hefur verið hér á Skagaströnd hefur henni fundist bæjarbúar hafi eiginlega tekið sig í fóstur og jafnvel alið önn fyrir sér. Í gær endurgreiddi hún greiðann, ef svo má segja. Hún og Heike móðir hennar buðu upp á einstaka köku sem fjölskylda hennar hefur alltaf bakað þegar hún hefur komið saman. Þessa köku gáfu þær Skagstrendingum í þakklætisskyni fyrir að hafa fóstrað hana í alla þessa mánuði.  Kökunum var raðað á borð. Undir hverri þeirra var servétta sem á var ritað nafn þess Skagstrendings sem átti kökuna. Verst var að þeim var ekki raðað í stafrófsröð og þurftu margir að leita lengi til að finna sína. Gestir fögnuðu listamanninum og foreldrum hennar og þökkuðu henni kærlega fyrir skemmtilega viðkynningu. Finnst áreiðanlega flestum að margir góðir og skemmtilegir listamenn hafi rekið á fjörur þeirra síðan Nes listamiðstöðin tók til starfa. Aimée Xenou eða Ninette Rothmüller verður áreiðanlega með þeim eftirminnilegustu. Meðfylgjandi myndir tók Signý Ósk Richter og Ingibergur Guðmundsson.

Fjölskylduhátíð verður dagana 25. - 27. febrúar 2011 á skíðasvæðinu í Tindastól. Þar verður sett upp ævintýrabraut og fleira. Þá verður Vetrarleikabrenna á föstudagskvöldinu og  kvöldvaka á laugardeginum í reiðhöll Skagfirðinga.  Föstudagskvöld 25. febrúar kl. 18:00 Safnast saman við íþróttahúsið og gengið í skrúðgöngu að kirkjunni. Setning Vetrarleikanna, Vetrarleikabrenna, söngur og samvera. Laugardagur  26. febrúar Skíðasvæðið í Tindastól – Ævintýrabraut Vetrarleikanna kl. 11:00  Fyrirkomulag kynnt og skráning  kl. 11.30  Ævintýrabrautin opnar kl. 13.30  Hádegishlé                                                                                                     kl. 14:00  Ævintýraleikarnir halda áfram                                                                 kl. 15:30  Ævintýraferð út í óvissuna. kl. 10:00 – 12:00  og 13:00 – 15:00  Námskeið í Carvingskíðun með Jóhanni Bæring Gunnarssyni skíðakennara. Námskeiðsgjald 6000 kr. kl. 16:30  Sund og afslöppun á Sauðárkróki  kl. 18:00  Pizzahlaðborð fyrir Skagstrendinga á Mælifelli. Kostar 800 kr. á grunnskólabarn/1400 kr. á fullorðinn.            kl. 19:30 Kvöldvaka í reiðhöllinni Svaðastöðum.   Á kvöldvökunni verða dregnir út fjöldi glæsilegra vinninga og því þarf að halda vel utan um númerin sem úthlutað er við skráningu á leikana.  Sunnudagur 27. febrúar kl. 11:30  Skíðaleikar                 Samhliðasvig  - Brettaþraut.                Grín og glens                 Foreldrar og börn keppa hvort við annnað                                             Þátttökugjald 1500 kr á mann fyrir 4 ára og eldri (lyftugjöld ekki innifalin). Landsbankinn á Skagaströnd ætlar að borga þátttökugjaldið fyrir börn á Skagaströnd 4ra – 16 ára. Umf. Fram verður með rútuferðir á leikana bæði laugardag og sunnudag og eru ferðirnar þátttakendum að kostnaðarlausu.  Lagt verður af stað kl.10.00  báða dagana (frá Fellsborg) og farið heim að lokinni dagskrá (eftir kvöldvökuna á laugardagskvöldið).  Börn fædd 1999 og síðar þurfa að vera í umsjón einhvers fullorðins í ferðinni.  En við viljum benda á að leikarnir eru hugsaðir sem fjölskylduhátíð og ekki þarf að vera á skíðum til þess að geta tekið þátt í dagskránni.  Tökum þátt í frábærri skemmtun og eigum góða helgi saman.   Frekari upplýsingar má einnig finna á heimasíðu Tindastóls, www.tindastoll.is og hjá Elvu, Dísu eða Róberti.

Menningarráð Norðurlands vestra auglýsir eftir umsóknum um verkefnastyrki á grundvelli menningarsamnings mennta- og menningarmálaráðuneytis og iðnaðarráðuneytis við SSNV. Tilgangur styrkjanna er að efla menningarstarf og menningartengda ferðaþjónustu á Norðurlandi vestra.   Menningarráð Norðurlands vestra hefur ákveðið að hafa tvær úthlutanir á árinu 2011, með umsóknarfresti til og með 15. mars og 15. september.   Menningarráð hefur ákveðið að þau verkefni hafi forgang sem uppfylla eitt eða fleiri eftirtalinna atriða: Efling atvinnustarfsemi, þekkingar og fræðslu á sviði menningar og lista. Efla samstarf á sviði menningarmála á svæðinu. Nýsköpun og þróun menningarstarfs og menningartengdrar ferðaþjónustu. Verkefni sem stuðla að þátttöku allra þjóðfélagshópa í menningarstarfi   Umsækjendur geta verið einstaklingar, félagasamtök, fyrirtæki, stofnanir og sveitarfélög á Norðurlandi vestra. Skilyrði er að viðkomandi sýni fram á mótframlag.   Umsækjendum er bent á að kynna sér nánar Úthlutunarreglur 2011 á www.ssnv.is undir liðnum Menningarráð.   Umsóknir skulu vera á eyðublöðum Menningarráðs Norðurlands vestra sem hægt er að nálgast á heimasíðunni www.ssnv.is undir liðnum Menningarráð. Í umsókninni skal m.a. vera greinargóð lýsing á verkefninu með verkáætlun og tímasetningum, ítarleg fjárhagsáætlun (kostnaðar- og tekjuáætlun) og upplýsingar um aðstandendur.   Umsóknir vegna fyrri úthlutunar ársins 2011 skulu sendar Menningarfulltrúa Norðurlands vestra, Einbúastíg 2, 545  Skagaströnd, eigi síðar en 15. mars 2011. Þær má senda rafrænt á netfangið menning@ssnv.is. Séu þær sendar í pósti skulu þær póststimplaðar eigi síðar en síðasta umsóknardag.   Allar nánari upplýsingar og aðstoð veitir Ingibergur Guðmundsson menningarfulltrúi Norðurlands vestra, símar 452 2901 / 892 3080, netfang menning@ssnv.is. Sigurður Sigurðarson, markaðsráðgjafi, getur aðstoðað Skagstrendinga við gerð umsókna. Síminn er 455 2700 og netfangið radgjafi@skagastrond.i.

Hið eðla ektapar Jóhanna Sigurjónsdóttir og Eiríkur Lýðsson eru hæstráðendur til sjós á lands í spurningakeppninni skemmtilegu Drekktu betur. Annað þeirra spyr og hitt dæmir. Spurningarnar hafa þau sjálf samið, enda sjálfstætt og dullllegt fólk, og má búast við miklu fjöri og látum enda hafa þau lofað öllu fögru. Þau ætla að spyrja um allt mögulegt sem þau hafa einhverja þekkingu á. Halda sig frekar á heimaslóðum, ekki spyrja um Icesave, Elvis eða stjórlagaþing og helst af öllu að plata dálítið þátttakendur. Skagstrendingar og aðrir sem kunna eitthvað fyrir sér eru hvattir til að mæta og taka þátt í frábærri skemmtun.

FUNDARBOÐ Fundur verður haldinn í sveitarstjórn Skagastrandar fimmtudaginn 24. febrúar 2011 á skrifstofu sveitarfélagsins kl 800. Dagskrá: 1. Greinargerð um umhverfismál 2. Gjaldskrár 3. Áætlun um frágang urðunarstaðar a) Bréf UST, dags. 7. febrúar 2011. b) Drög að lokunaráætlun 4. Bréf: a) Tónlistarfólks, dags. 11. febrúar 2011. b) Nes listamiðstöðvar, dags. 18. febrúar 2011. c) Sambands íslenskra sveitarfélaga, dags 9. febrúar 2011. d) Stofnunar Vilhjálms Stefánssonar, dags. 9. febrúar 2011. e) UMFÍ, dags. 28. janúar 2011. f) SSNV, dags. 2. febrúar 2011. g) Umhverfisráðuneytisins, dags. 31. janúar 2011. 5. Fundargerðir: a) Skipulags- og byggingarnefndar. 23.02.2011 b) Menningarráðs Norðurlands vestra, 28.01.2011 c) Stjórnar Norðurár bs. 9.12.2010 d) Stjórnar Norðurár bs. 30.12.2010 e) Stjórnar Norðurár bs. 6.01.2011 f) Starfshóps um sameiningu sv.félaga, 14.01.2011 g) Stjórnar SSKS, 15.02.2011 h) Stjórnar SSNV, 4.02.2011 i) Stjórnar SSNV, 8.02.2011 j) Stjórnar Sambands íslenskra sveitarfélaga, 28.01.2011 6. Önnur mál Sveitarstjóri