Fréttir

Ingibjörg Björgvinsdóttir Enn er höggvið skarð í hóp samborgara okkar á Skagaströnd. Hæglát og ljúf kona, sem ekki barst mikið á, hefur nú stigið inn í heim ljóssins, sem hún trúði svo einlæglega á. Við sem fengum að vera Ingu samferða í lífinu kveðjum hana með söknuði og þökkum góð kynni. Sérstaklega minnumst við hennar góða starfs í kirkjukórnum þar sem hún var ein af undirstöðunum sem kórinn byggir á allt þar til sjúkdómar gerðu henni ókleift að starfa þar lengur. Nú er hugur okkar hjá aðstandendum hennar sem eiga góðar minningar um konuna sem var akkerið í lífi þeirra. Ingibjörg Björgvinsdóttir lést á heimili sínu 14. febrúar síðastliðinn en hún verður jarðsungin frá Hólaneskirkju laugardaginn 24. febrúar klukkan 14:00.

Í símaafgreiðslunni Þórunn Bernódusdóttir á vinnustað sínum sem símaafgreiðslustúlka á Gamla pósthúsinu. Fyrir tíma sjálfvirkninnar þurfti símastúlkan að gefa samband milli númera í kerfinu og "gefa línu" eins og kallað var gegnum tengiborðið sem sést til hægri. Á þessari mynd, sem líklega var tekin einhverntíma kringum 1975, hefur Pálína Freyja Harðardóttir komið í heimsókn af efri hæðinni þar sem hún átti heima á þessum tíma. Senda upplýsingar um myndina

Kvenfélagskonur á þorrablóti Konur úr kvenfélaginu Einingin á þorrablóti í Tunnunni einhverntíma á sjöunda áratugnum. Maturinn er kominn á borðið og allt er tilbúið fyrir gestina. Stólarnir hafa verið fengnir að láni í skólanum og fólk þurfti sjálft að koma með diska og hnífapör með sér að heiman. Frá vinstri eru: Gestheiður Jónsdóttir, Helga Berndsen, Sigríður Ásgeirsdóttir, Elísabet Árnadóttir (Bebbý), Karla Helgadóttir, Jóhanna Gunnlaugsdóttir og Anna Halldórsdóttir Aspar. Matinn unnu konurnar að mestu sjálfar, gerðu slátur, lifrapylsu og lundabagga og súrsuðu, sviðu svið og gerðu sviðasultu, bökuðu brauð og og flatkökur og sáu til þess að einhver heimamaður framleiddi harðfisk fyrir þær. Skemmtiatriði voru ofast í formi upplesturs og fjöldasöngs en síðan var dansað að borðhaldi loknu eins og nú er gert við undirleik hljómsveitar þar sem harmónikan var í aðalhlutverki. Senda upplýsingar um myndina

Foreldrar barna með lögheimili á Skagaströnd eiga rétt á 15 þúsund króna styrk, fyrir hvert barn á grunnskólaaldri, sem þátt tekur í íþrótta- og æskulýðsstarfi. Skil á gögnum vegna frístundaþátttöku síðastliðins árs er í síðasta lagi 31. janúar næsta árs. Eftir það fellur réttur þess árs niður. Þar sem útgáfa reikninga vegna íþróttastarfs á vegum Umf Fram á haustönn 2017 barst nokkuð seinna en venjulega er veittur frestur til 28. febrúar til að leggja fram umsókn og gögn vegna frístundastarfsins. Reglur um frístundakort Sveitarstjóri

Höfðaskóli verður með OPIÐ HÚS miðvikudaginn 7. febrúar n.k. frá kl. 10:30 til 12 í tilefni nýafstaðinna breytinga á húsnæðinu. Gestir og gangandi eru velkomnir að ganga um sali, fylgjast með kennslu og þiggja kaffi og vöfflur þess á milli í boði 10.bekkjar. Starfsfólk Höfðaskóla

Sveitarfélagið Skagaströnd auglýsir starf í íþróttahúsi/sundlaug laust til umsóknar. Starfið er fólgið í vaktavinnu í íþróttahúsi og sundlaug. Um er að ræða fullt starf. Leitað er eftir reglusömum starfsmanni sem er lipur í samskiptum, fær um sjálfstæð vinnubrögð og hefur hæfni til að starfa með börnum og unglingum. Laun samkvæmt kjarasamningi Sambands íslenskra sveitarfélaga og Kjalar. Umsóknareyðublöð liggja frammi á skrifstofu Sveitarfélagsins Skagastrandar og hægt að sækja þau á vef sveitarfélagsins www.skagastrond.is Umsóknarfrestur er til og með 26. febrúar 2018. Nánari upplýsingar veitir Gígja í síma: 864 4908. Sveitarstjóri

Vilhelm Vilhelmsson sagnfræðingur hefur verið ráðinn forstöðumaður Rannsóknaseturs Háskóla Íslands á Norðurlandi vestra. Í nóvember sl. var auglýst til umsóknar starf forstöðumanns rannsóknasetursins með áherslu á sagnfræði. Tvær umsóknir bárust um starfið. Að loknu dómnefnar- og valnefndarferli var Vilhelm ráðinn forstöðumaður Rannsóknaseturs HÍ á Norðurlandi vestra frá 1. febrúar.

Þorrablótið nálgast Þessi mynd var tekin á þorrablótsæfingu, líklega 2013. Á henni eru Magnús B. Jónsson til vinstri og Einar Haukur Arason til hægri í hlutverkum sínum sem Sigurbjörn Björgvinsson bifreiðastjóri og Guðmundur J. Björnsson gröfumaður í kaffi á áhaldahúsinu að bíða eftir að fá einhver verkefni fyrir tæki sín. Senda upplýsingar um myndina

Forsætisráðuneytið leitar að 13 til 18 ára ungmennum í ungmennaráð Heimsmarkmiða Sameinuðu þjóðanna. Opið verður fyrir umsóknir til og með 16. febrúar nk. Leitað er að áhugasömu ungu fólki til að taka sæti í ungmennaráði heimsmarkmiða sameinuðu þjóðanna (SDG – Sustainable Development Goals). Ungmennaráðið hefur það skemmtilega hlutverk að kynna sjálfbæra þróun fyrir jafnöldrum sínum og vera ríkisstjórninni til ráðgjafar um hvernig ná megi sem best heimsmarkmiðum um sjálfbæra þróun. Ferðakostnaður vegna funda verður greiddur. Meðfylgjandi er auglýsing með nánari upplýsingum.

Ágætu fasteignaeigendur á Skagaströnd. Álagning fasteignagjalda eru í vinnslu og verður álagning keyrð um mánaðarmót. Álagningarreglur fasteignagjalda 2018 eru aðgengilegar á heimasíðunni undir „gjaldskrár“. Greiðslur fasteignagjalda: Eins og undanfarin ár verða ekki sendir greiðsluseðlar vegna fasteignagjalda nema til þeirra sem þess hafa óskað sérstaklega og gildir skráning þeirra sem þess óskuðu á síðasta ári nema nýjar upplýsingar komi fram. Gjalddagar fasteignagjalda eru frá 1. febrúar til 1. júlí, en á smærri upphæðum eru gjalddagar 1 eða 2. (Gjalddagar á 0-5.000 kr. er 1.apríl og 5.001-10.000 skiptist í tvo gjalddaga 1. apríl og 1. maí). Sorphirðugjald /sorpeyðingargjald Vakin er athygli á að sorphirðugjald er lagt á íbúðir með fastri búsetu en einungis sorpeyðingargjald á sumarhús og íbúðir þar sem ekki er regluleg búseta. Það táknar að sorphirða fer ekki fram þar sem einungis er greitt sorpeyðingargjald. Sama gildir um þær eignir sem ekkert sorphirðu- eða eyðingargjald er lagt á eins og t.d. ferðaþjónustueignir (C-flokkur) þeir aðilar leysa sjálfir sorphirðu /sorpeyðingu fyrir sína starfsemi með samningum við þjónustuaðila eða öðrum hætti. Álagningaseðlar: Álagningarseðlar verða ekki sendir út nema þess sé sérstaklega óskað. Hver og einn getur nálgast sína álagningarseðla á vefsíðunni www.island.is undir reitnum „mínar síður“ Innskráning er með kennitölu viðkomandi og íslykli eða rafrænum skilríkju. Skrifstofa sveitarfélagsins veitir fúslega upplýsingar og aðstoð til þeirra sem þess óska. Skagaströnd 30. janúar 2018 Sveitarstjóri