Fréttir

 Þar sem reiknað er með að óveður gangi yfir Norðurland í kvöld og á morgun skal bent á að ekki er gert ráð fyrir snjómokstri fyrr en veður er gengið niður. Þó verður athugað með mokstur kl 9.00 á laugardagsmorgni samkvæmt áætlun Vegagerðar um Fellsbraut, Oddagötur og Strandgötu ef veður hamlar ekki. Sveitarstjóri

Svohljóðandi tilkynning hefur borist frá Almannavörnum: Bakvakt almannavarnadeildar vill vekja athygli ykkar á slæmri veðurspá í kvöld og á morgun, sjá meðfylgjandi viðvörun Veðurstofunnar. Búast má við að færð spillist og að snjóflóðahætta aukist, þá sérstaklega á Norðurlandi á morgun. „Annars staðar á landinu bætir einnig í vind síðdegis og undir kvöld verður víða orðið norðaustan hvassviðri eða stormur (15-23 m/s) með skafrenningi og síðar snjókomu þegar úrkomubakkinn færir sig norður yfir landið. Suðvesturland (þ.m.t. höfuðborgarsvæðið) sleppur best við veðrið, en þar verður samt orðið allhvasst undir kvöld með skafrenningi og dálítilli ofankomu um tíma. Nú er nýsnævi víða um land og getur snjósöfnun í skafrenningi verið mjög hröð í gil og fjallsbrúnir sem snúa undan vindi. Við þessar aðstæður getur snjóflóðahætta skapast á skömmum tíma. Athygli er einnig vakin á því að á morgun, laugardag, er útlit fyrir norðan storm með stórhríð á norðanverðu landinu, en sunnanlands verða stöku él og skafrenningur. Í nótt og á morgun má búast við að snjóflóðahætta aukist á Vestfjörðum og Norðurlandi. Að lokum er útlit fyrir að lægi mikið á sunnudag og létti til, fyrst um landið vestanvert. Þá má búast við talsverðu frosti.“ Með kveðju / Best regards Eggert Magnússon Lögreglufulltrúi – Verkefnastjóri Detective Chief Inspector - Project Manager Ríkislögreglustjórinn The National Commissioner Of The Icelandic Police Almannavarnadeild Department of Civil Protection and Emergency Management Phone: (+354) 444 2500 Mobile: (+354) 861 7683 Fax: (+354) 562 2665 Heimasíða www.almannavarnir.is Facebook.com/Almannavarnir

Nú lítur út fyrir að veður verði orðið sæmilegt mánudaginn 7. desember og þá munum við kveikja ljós á jólatrénu okkar á Hnappstaðatúni kl. 17.00 Heyrst hefur að einhverjir jólasveinar séu sloppnir til byggða og muni líta við. Sveitarstjóri Frestað vegna veðurs

Afmæli Saumastofan Íris er orðin 10 ára. Í tilefni af þeim tímamótum verðum við með opið hús í kjallara Gamla Kaupfélagsins mánudaginn 7. desember kl. 17- 19. Það verður heitt á könnunni og boðið upp á kakó og smákökur. Vonumst eftir að sjá sem flesta. Fjóla og Didda Frestað til miðvikudags vegna veðurs

Guðbjörg Gylfadóttir Íslandsmeistari. Guðbjörg Gylfadóttir fær hamingjuóskir frá Magnúsi B. Jónssyni sveitarstjóra á Skagaströnd eftir að hún hafði sett nýtt Íslandsmet í kúluvarpi kvenna. Íslandsmetið, sem var kast upp á 16.33 metra, setti hún 17. maí 1992. Metið stendur enn og er að verða eitt af elstu Íslandsmetunum. Myndin var tekin í júní 1992 á hótel Dagsbrún þar sem haldið var upp á afrek þessarar glæsilegu íþróttakonu með litlu kaffiboði. Í baksýn sér í Guðbjörgu Viggósdóttur en myndina tók Ólafur Bernódusson.

Jólabókakvöld í Bjarmanesi miðvikudaginn 2. des., kl. 20 Heimamenn lesa úr eftirtöldum bókum: Dagný Rósa Úlfarsdóttir Hersetan á Norðurlandi vestra Sigríður Stefánsdóttir Hundadagar Valtýr Sigurðsson Syndarinn Lárus Ægir Guðmundsson Kvenfélagið Eining 1927-2013 Guðmundur Egill Erlendsson Útkall Hugrún Sif Hallgrímsdóttir Dimma Hjörtur Guðmundsson Utangarðs? Vera Ósk Valgarðsdóttir Hvítir veggir og Öskraðu gat á myrkrið Aðgangur ókeypis. Allir hjartanlega velkomnir. Bjarmanes verður með kakó, kaffi og smákökur til sölu.

99 ára heiðurskona. Jónína Guðrún Valdimarsdóttir frá Kárastöðum á 99 ára afmæli 29. nóvember 2015. Þessi aldna heiðurkona er mannasættir sem talar aldrei illa um nokkurn mann þrátt fyrir oft erfiða æfi. Lengi var hún ráðskona hjá bræðrunum Kára (d.11.12.1990) og Sigurbirni Kristjánssonum (d.10.9.1989) á Kárastöðum og hélt þeim heimili ásamt dóttur sinni. Jónína eignaðist tvö börn, Svavar Bergmann Indriðason 1939, sem lést 1.nóv. 2010, og Kristínu Ragnheiði Sigurðardóttur 1949, sem var með móður sinni á Kárastöðum. Jónína dvelur nú á Sæborg í góðu yfirlæti og eru henni færðar innilegar hamingjuóskir með afmælið. Myndina af Nínu tók Jón Jónsson árið 1990.

Sameiginleg mál- og læsisstefna leik-og grunnskóla í Húnavatnssýslum og leikskólanum á Hólmavík Skólastjórnendur leik-og grunnskóla í Austur Húnvatnssýslu, Húnaþingi vestra og leikskólanum á Hólmavík hafa ákveðið að vinna að sameiginlegri mál- og læsisstefnu skólanna í samræmi við ákvæði í Aðalnámskrá leik- og grunnskóla og þann 24. nóv. s.l. undirrituðu skólastjórar viljayfirlýsingu um að stefna sameiginlega að þessu markmiði. Stefnt skal að því að vinna heildstæða mál- og læsisstefnu fyrir leik- og grunnskóla en hver skóli mun síðan í framhaldinu móta sína eigin stefnu sem tekur mið af þeirri sameiginlegu. Í grunnskólunum er nú unnið að þróunarverkefninu Orð af orði undir handleiðslu Guðmundar Engilbertssonar lektors við Háskólann á Akureyri. Í leikskólunum er unnið að þróunarverkefninu Málþroski og læsi, færni til framtíðar og þar er verkefnastjóri Ásthildur Bj. Snorradóttir talmeinafræðingur. Í hverjum skóla er starfandi teymi sem ber ábyrgð á faglegri vinnu varðandi mál og læsi innan hvers skóla en tengiliðir frá skólunum hittast reglulega og vinna að sameiginlegri stefnu. Markmiðið með þessari vinnu er að efla málþroska og færni allra nemenda á báðum skólastigum er varðar læsi í víðum skilningi og með áherslu á snemmtæka íhlutun. Ábyrgðamenn verkefnisins í leikskólunum eru Guðrún Lára Magnúsdóttir leikskólastjóri í Ásgarði og Borðeyri og Þórdís Hauksdóttir fræðslustjóri Austur Húnavatnssýslu sem einnig er ábyrgðarmaður fyrir verkefninu í grunnskólunum ásamt Kristínu Ólöfu Þórarinsdóttur aðstoðarskólastjóra Grunnskóla Húnaþings vestra.

Dimension of sound bíður uppá fræsiþjónustu á Skagaströnd, Hægt er að fræsa í allskonar timbur sem og léttari málma eins og t.d ál. Fræsum eftir teikningum, ásamt því bjóðum við uppá teikniþjónustu þannig að það eina sem þú þarft að koma með eru hugmyndir og við sjáum um restina. Vélin getur fræst í hluti sem eru allt að 124cm X 249cm X 15cm Vélin fræsir í 2D og 3D. Verð; 1Klst teiknivinna er 2.500kr 1klst vél+maður á vél er 10.000kr Hægt er að hafa samband í síma 868 8257 eða senda póst á fraesing@gmail.com með fyrirspurnir. https://www.facebook.com/Fr%C3%A6si%C3%BEj%C3%B3nusta-Nor%C3%B0urlands-Vestra-1634827400112658/timeline

Auglýsing vegna úthlutunar byggðakvóta á fiskveiðiárinu 2015/2016 Fiskistofa auglýsir eftir umsóknum um byggðakvóta til fiskiskipa fyrir eftirtalin byggðarlög skv. Ákvæðum reglugerðar nr. 605/2015 um úthlutun byggðakvóta til fiskiskipa á fiskveiðiárinu 2015/2016 Grundarfjarðarbær (Grundarfjörður) Vesturbyggð (Patreksfjörður) Auk reglugerðarinnar er vísað til sérstakra úthlutunarreglna í neðanskráðum byggðalögum sbr. auglýsingu nr. 1043/2015 í Stjórnartíðindum Árborg (Stokkseyri, Eyrarbakki) Garður Vogar Vesturbyggð (Brjánslækur/Barðaströnd) Ísafjarðarbær (Þingeyri, Flateyri, Suðureyri, Hnífsdalur, Ísafjörður) Strandabyggð (Hólmavík) Húnaþing vestra (Hvammstangi) Blönduósbær (Blönduós) Sveitarfélagið Skagaströnd Fjallabyggð (Siglufjörður, Ólafsfjörður) Dalvíkurbyggð (Dalvík, Árskógssandur, Hauganes) Breiðdalshreppur (Breiðdalsvík) Umsóknum skal skilað til Fiskistofu á eyðublaði sem er að finna hér. Umsóknum þarf að fylgja samningur við vinnslu á eyðublaði sem er að finna hér. Vakin skal athygli á því að umsóknin telst ekki gild nema samningur um vinnslu fylgi. Umsóknarfrestur er til og með 7. desember 2015. Fiskistofa 20. nóvember 2015