Fréttir

Fundur verður haldinn í Fellsborg þriðjudaginn 31. mars næstkomandi kl. 17:00. Á fundinum verður farið yfir möguleika er varða styrkveitingar til atvinnu og menningarmála á vegum Uppbyggingarsjóðs Norðurlands vestra. Einnig verður kynning á Atvinnuþróunarsjóði Skagastrandar. Allir sem hafa áhuga á atvinnu- og menningarmálum eru hvattir til að mæta. Atvinnumálanefnd Skagastrandar

Aðalfundur Krabbameinsfélags Austur -Húnavatnssýslu verður haldinn þriðjudaginn 31. mars kl. 18:00 á Hótel Blönduósi. Viljum við minna á aðalfundinn en á dagskránni verða venjuleg aðalfundarstörf en jafnframt fyrirlesur sem Arndís Halla Jóhannesdóttir flytur. Arndís er öflug ung kona, markþjálfi og þroskaþjálfi og nefnir hún fyrirlesturinn: Mikill hlátur og smá grátur og veltur hún fyrir sé hvernig við bregðumst við því sem við þurfum að takast á í vinnu eða einkalífi. Starfsemi Krabbameinsfélagsins beinist að fræðslu og stuðningi við þá sem greinast með krabbamein, fjölskyldum og vinum þeirra. Styrkur þess felst hins vegar í fjölda félagsmanna og þann velvilja héraðsbúa að taka þátt í fjáröflunarstarfssemi á vegum félagsins er sölufólk gengur í hús. Þannig styðjum við samborgara okkar og félagið þakkar þann mikla stuðning til fjölda ára. Meðal verkefna síðari ára, hefur félagið greitt leigu fyrir íbúðir til þeirra sem eru í krabbameinsmeðferð í Reykjavík og aðstandenda. Eins höfum við stutt við fjölskyldur, gefið búnað og tæki til Heilbrigðisstofnunar og tæki til Sæborgar á Skagaströnd. Nýlega lögðum við fram fjárhæð er rennur í upphæð til að kaupa nýtt ómskoðunartæki á sjúkrahúsi Akureyrar og sem notað yrði til nánari skoðunar í hefðbundinni hópleit á brjóstum kvenna. Minnum á minningarkort Krabbameinsfélagsins en sími sölufólks er í Glugganum og eru þau einnig seld í Lyfju á Blönduósi og www.krabb.is Allir eru velkomnir á aðalfundinn og boðið verður uppá súpuveitingar á fundinum. Stjórnin

Minnt er á að þeir sem hyggjast sækja um kostnaðarþátttöku sveitarfélagsins vegna ofnakaupa þurfa að sækja um og leggja fram gögn fyrir 1. maí 2015. Einstaklingar sem eru eigendur íbúðarhúsa og þurfa að endurnýja ofna í húsum sínum geta fengið kostnaðarþátttöku sem nemur allt að 75% af kostnaði við ofnakaup í hús sitt, sbr. þó 3. tl. Kostnaðarþátttakan nær til ofnakaupa og/eða efnis í pípukerfi í gólfhitabúnað eingöngu en ekki til stýribúnaðar, ofnloka eða lagnakerfis að ofnum. Til að eiga rétt á framangreindri kostnaðarþátttöku þarf viðkomandi að leggja fram reikning sem sýnir að umræddur búnaður hafi verið keyptur og sé að fullu greiddur. Starfsmaður sveitarfélagsins skal hafa fullan aðgang að viðkomandi fasteign í því skyni að sannreyna að ofnarnir hafi verið keyptir til notkunar þar. Hámark kostnaðarþátttöku til eigenda hverrar íbúðar vegna 1. og 2. tl. er 250 þús. kr. Skilgreining íbúðar er að hún sé skráð sem sérstakt fasteignanúmer og/eða sé sannanlega íbúð í skilningi byggingarreglugerðar. Kostnaðarþátttaka þessi gildir frá 1. maí 2008 til 1. maí 2015 og skulu húseigendur hafa skilað inn umræddum reikningum og óskað eftir greiðslu fyrir þann tíma til að eiga rétt á greiðslum skv. 1. og 2. tl. Ákvæði um kostnaðarþátttöku getur átt við þær eignir sem standa utan þess svæðis sem hitaveita býðst á Skagaströnd og gildir þá um kaup á ofnum fyrir vatnshitunarkerfi og hönnun á því kerfi. Litið er svo á að þar með sé stutt við undirbúning að mögulegri hitveituvæðingu umræddra húseigna. Sveitarstjóri

Heyskapur - Heyskapur upp á gamla mátann. Myndin er líklega tekin í Laxárdal við heimili Guðmundar Guðnasonar (d. 21.11.1988) en fjölskylda hans bjó í dalnum á nokkrum bæum áður en þau fluttu að Ægissíðu á Skagaströnd. Konan lengst til vinstri er Klemensína Klemensdóttir (d.12.6.1966) móðir Guðmundar. Ungi maðurinn sem bindur bagga er Pálmi (d. 23.3.1994), Ingvi (d. 31.12.1991), eða Rósberg (d. 9.1.1983) en þeir voru bræður Guðmundar. Guðmundur sjálfur heldur í hestinn og faðir hans Guðni Sveinsson (d. 15.11.1971) hleður fúlgu úr heyinu í baksýn. Ef þú þekkir hver þeirra bræðra bindur baggann vinsamlega sendu okkur þá athugasemd.

FUNDARBOÐ Fundur verður haldinn í sveitarstjórn Skagastrandar föstudaginn 27. mars 2015 kl 0800 á skrifstofu sveitarfélagsins. Dagskrá: Framkvæmdir 2015 Atvinnumál Héraðsfundur-fundarboð Reglur um ungmennaráð Jafnréttisáætlun sveitarfélagsins Bréf: Menningarfélagsins Spákonuarfs, dags. 25. febrúar 2015 Skipulagsfulltrúa Sveitafélagsins Skagafjarðar, dags. 25. febrúar 2015 Bæjarmálafélags Skagastrandar, dags. 19. mars 2015 Fundargerðir: Tómstunda og menningarmálanefndar, 25.03.2015 Skólanefndar FNV, 26.02.2015 Heilbrigðisnefndar Nl. vestra, 12.03.2015 Stjórnar Róta bs. 16.02.2015 Stjórnar Hafnasambands Íslands, 13.03.2015 Stjórnar Samtaka sjávarútvegssveitarfélaga, 11.02.2015 Stjórnar Samtaka sveitarfél. á köldum sv., 10.03.2015 Stjórnar Sambands ísl. sveitarf., 16.02.2015 Stjórnar Sambands ísl. sveitarf., 27.02.2015 Önnur mál Sveitarstjóri

Umsóknir um styrki til menningarstarfs, atvinnuþróunar og nýsköpunar Þann 10. febrúar sl. var skrifað undir samning milli Samtaka sveitarfélaga á Norðurlandi vestra (SSNV) og ríkisins um Sóknaráætlun 2015-2019. Markmið Sóknaráætlunar er m.a. að stuðla að jákvæðri samfélagsþróun, treysta stoðir menningar og auka samkeppnishæfni landshlutans og landsins alls. Einn hluti Sóknaráætlunarinnar er stofnun svokallaðs Uppbyggingarsjóðs Norðurlands vestra sem kemur í stað þeirra vaxtar- og menningarsamninga sem verið hafa í gangi á undanförnum árum. Uppbyggingarsjóðurinn er samkeppnissjóður og því þarf að sækja um styrki í sjóðinn. Nú er komið að fyrsta umsóknar- og úthlutunarferlinu. Auglýst hefur verið eftir umsóknum um styrki á menningar-, atvinnuþróunar- og nýsköpunarsviðum. Umsóknarfrestur er til og með 17. apríl nk. Nánari upplýsingar er að finna á heimasíðu SSNV, www.ssnv.is. Einnig veita starfsmenn SSNV atvinnuþróunar upplýsingar og aðstoð eftir þörfum.

Námsstyrkir Við afgreiðslu fjárhagsáætlunar 2015 tók sveitarstjórn Skagastrandar ákvörðun um að veita styrki til nemenda á framhalds- og háskólastigi sem nemur 20 þús. kr. skólaárið 2014-2015 en styrkirnir eru veittir til jöfnunar á námskostnaði fjarri heimabyggð. Umsóknum um styrki skal skilað til skrifstofu sveitarfélagsins fyrir 31. mars 2015. Umsóknir sem berast eftir umsóknarfrest verða ekki teknar til greina. Nemendur á framhalds- og háskólastigi sem eiga lögheimili á Skagaströnd og fullnægja skilyrðum í reglum um styrkina eiga rétt á umræddum námsstyrk frá Sveitarfélaginu Skagaströnd. Nánari upplýsingar veittar á skrifstofu sveitarfélagsins og á heimasíðunni http://www.skagastrond.is/samthykktir.asp og þar má einnig fá/finna umsóknareyðublöð. Reglur um styrkina má finna hér. Umsókn um styrk má finna hér. Aksturstyrkur vegna dreifnáms Jafnframt er auglýstur frestur til 1. maí 2015 til að sækja um sérstakan stuðning vegna dreifnáms fyrir vorönn 2015. Sveitarstjórn samþykkti Reglur um stuðning vegna dreifnáms veturinn 2014-2015 á fundi 12. september 2014 og vísast til þeirra á heimasíðu sveitarfélagsins. Hér Sveitarstjóri

Í Þórskaffi 1977. Starfsmenn og stjórn Skagstrendings hf gerðu sér glaðan dag í Þórskaffi 1977. Í forgrunni myndarinnar er Gylfi Guðjónsson, annars eru frá vinstri: Sigurður Óli Sigurðsson, Helga Ottósdóttir, Guðmunda Árnadóttir, Guðrún Þórbjarnardóttir, Ásdís Þórbjarnardóttir, Vilhjálmur Sigurðsson, Hafþór Gylfason, Egill Bjarki Gunnarsson, Birgir Þórbjarnarson, Þórbjörn Jónsson (d. 22.1.1996) og aftan við hann er Árni Ólafur Sigurðsson.

Byggðasamlagið Norðurá bs. auglýsir laust starf við urðunar-staðinn Stekkjarvík við Blönduós. Lýsing á starfinu: Í því felst almenn umsjón með urðunarstaðnum, móttaka, vigtun og skráning á sorpi til urðunar. Einnig vinna á sorptroðara og öðrum vinnuvélum við frágang í urðunarhólfi. Hæfniskröfur: Leitað er eftir metnaðarfullum einstaklingi sem er skipulagður og sýnir frumkvæði og sveigjanleika í starfi. Lögð er áhersla á að viðkomandi sé úrræðagóður og stundvís. Gerð er krafa um vinnuvélaréttindi og almenna tölvukunnáttu ásamt því að viðkomandi geti unnið sjálfstætt. Hæfni í mannlegum samskiptum og rík þjónustulund er skilyrði. Laun og önnur starfskjör fara eftir samningum Sambands íslenskra sveitarfélaga við viðkomandi stéttarfélag. Umsóknarfrestur er til og með 31. mars 2015 Nánari upplýsingar um starfið veita: Fannar J. Viggósson, s: 845 6111, stekkjarvik@simnet.is. Magnús B. Jónsson, s: 455 2700, magnus@skagastrond.is. Sótt er um starfið á heimasíðu Sveitarfélagsins Skagafjarðar, www.skagafjordur.is (störf í boði).

Þessi mynd var tekin á leikskólanum Barnaból á litlu jólunum 1981. Fremst til vinstri er Jón Ólafur Sigurjónsson, Jón Örn Stefánsson situr hægra megin við hann í rauðleitri peysu og Arnar Ólafur Viggósson er lengra til hægri í bláum smekkbuxum og Gunnar Guðmundsson hægra megin við hann. Við hlið Jóns Ólafs í fölbleikum fötum situr Árný Guðrún Ólafsdóttir. Hildur Inga Rúnarsdóttir stendur með aðra hönd á mjöðm en framan við hana til hægri situr flötum beinum Viktor Pétursson en við hlið hennar í ljósblárri peysu er Jóhannes William Grétarsson. Aftan við Viktor, í brúnleitu vesti, er Þorlákur Guðjónsson og aftan við hann til vinstri er Írena Rúnarsdóttir. Sitt hvoru megin við Írenu eru systkin, Jósep ? og Sara? Aftan við Hildi Ingu til vinstri er Ólafur Magnússon og vinstra megin við hann, í rauðum kjól, er Þóra Ágústsdóttir. Stúlkan í dökk bláa kjólnum sitjandi til vinstri er Bergþóra Hrönn Guðjónsdóttir og á endanum til vinstri við Bergþóru sér í Salóme Ýr Rúnarsdóttur. Aftan við Bergþóru, með fingurinn við munninn, er Auðna Ýrr Oddsdóttir. Konan vinstra megin er óþekkt en hún heldur á Björgvin Ragnarssyni. Framan við hana örlítið hægra megin er María Jóna Gunnarsdóttir. Konan hægra megin er Bára Þorvaldsdóttir með Elínu Ósk Ómarsdóttur í fanginu og leggur hönd á höfuð Kolbrúnar Jennýar Ragnarsdóttur. Aðrir á myndinni eru óþekktir en ef þú þekkir eitthvert þeirra vinsamlega sendu okkur þá athugasemd.