Fréttir

Þann 11. júní næstkomandi, sem er laugardagurinn fyrir hvítasunnu, verður opnað Kántrýsetur í Kántrýbæ með mikilli viðhöfn.  Þar verður ævintýraleg og óvenjuleg saga Hallbjörns Hjartarsonar til sýnis, allt frá fæðingu fram á þennan dag. Saga sem hófst í líkhúsinu á Blönduósi því Hallbjörn var talinn andvana við fæðingu.  Hallbjörn hafði hins vegar einsett sér að lifa og eins og þeir vita sem þekkja hann  heldur hann alltaf sínu striki, hvað sem hver segir. Ótal margir hafa hrist höfuðið yfir uppátækjum hans, allt frá því hann var barn. Sjálfur segist hann alltaf hafa haft sína vitleysu á þurru, ólíkt mörgum, og draumur hans um að gera Skagaströnd að eftirsóknarverðum ferðamannastað hefur sannarlega ræst.  Formleg opnun setursins verður laugardaginn 11. júní og af því tilefni hefur Magnús Kjartansson búið til heiðurshljómsveit Hallbjörns Hjartarssonar með söngvarana Björgvin Halldórsson, Selmu Björnsdóttur og Heiðu Ólafsdóttur í fararbroddi. Hljómsveitin mun halda tónleika í Kántrýbæ og slá svo upp sannkölluðu kántrýballi að hætti kúreka norðursins.  Hugmyndin um Kántrýsetur er ekki ný af nálinni en er nú loks að verða að veruleika. Það eru núverandi rekstraraðilar Kántríbæjar, þau Gunnar Sveinn Halldórsson og Svenny H. Hallbjörnsdóttir (Hjartarsonar) sem standa að setrinu með stuðningi Menningarráðs Norðurlands vestra og Minningarsjóðs um hjónin frá Vindhæli og Garði, Sveitarfélagsins Skagastrandar og Iðnaðarráðneytis.  Umsjón með verkefninu hefur Margrét Blöndal, útvarpskona með meiru og um hönnun og uppsetningu sér Björn G. Björnsson, leikmyndahönnuður. 

„Úr smiðju vefarans mikla“ er yfirlitssýning í Heimilisiðnaðarsafninu á Blönduósi á verkum Guðrúnar Vigfúsdóttur veflistakonu frá Ísafirði. Hún verður opnuð laugardaginn 4. júní n.k. kl. 14.00. Eyrún Gísladóttir, dóttir listakonunnar, ræðir við gesti og opnar sýninguna.   Lára Sóley Jóhannsdóttir og Hjalti Jónsson stíga á stokk með ljúfan tónlistarflutning.   Að vanda verður boðið uppá kaffi og kleinur, mjólk/kókómjólk fyrir börnin. Aðgangur er ókeypis á opnunina og allir hjartanlega velkomnir.   Heimilisiðnaðarsafnið verður opið alla daga frá 1. júní til 31. ágúst frá kl. 10.00 - 17.00.                                                                                                                      

“Við erum að vonast til Húnvetningar og Skagfirðingar sæki um að vera með á flóamarkaði í Djásnum og dúlleríi á fimmtudaginn - þá verður þetta ennþá fjölbreyttara og skemmtilegra.”  Þetta segja sætu skvísurnar sem standa að Djásnum og dúlleríi á Skagaströnd. Og þær segja að enn séu nokkur borðpláss eftir. Í bláeygu sakleysi sínu spyrja: „Er ekki trúlegt að einhver annar gæti einmitt notað dótið sem tekur bara pláss í geymslunni hjá þér?“ Flóamarkaðurinn verður opinn frá 14 - 18  fimmtudaginn 2. júní.  Hægt að panta pláss í síma: 862 6997. 

Trésmiðja Helga Gunnarssonar sendi frá sér enn eitt húsið í gærkvöldi. Það er bústaður sem unnið hefur verið að frá því í mars. Hann er tvílyftur, svefnloft er á efri hæðinni, alls 66 fermetrar og þar að auki verður verönd fyrir framan húsið, hluti hennar er yfirbyggður. Grunnflöturinn er 6x13,5 ferm. Bústaðurinn er heilsárshús og var fluttur til Dalvíkur þar sem hann var settur á sinn grunn. Myndirnar voru teknar þegar húsið var flutt frá Skagaströnd.

Lóan er komin að kveða burt snjóinn, að kveða burt leiðindin, það getur hún. Hún hefur sagt mér, að senn komi spóinn, sólskin í dali og blómstur í tún. Hún hefir sagt mér til syndanna minna, ég sofi of mikið og vinni ekki hót. Hún hefir sagt mér að vakna og vinna og vonglaður taka nú sumrinu mót. Kanadíski listamaðurinn Jude Griebel teiknaði fyrra mynd á vegg gamla Hólanesshússins. Krýpur það maður fyrir framan fugl sem eflaust segir honum til syndanna sinna.

Ágætu Skagstrendingar Undanfarið hefur í vaxandi mæli borið á því að fólk láti hunda sína ganga lausa þvert á mjög skýra reglu í samþykkt um hundahald þar sem segir:  „Hundurinn skal aldrei ganga laus á almannafæri, heldur vera í taumi í fylgd með aðila, sem hefur fullt vald yfir honum. Á almannafæri er hundaeiganda skylt að fjarlægja saur eftir hund/hunda sína á tryggilegan hátt.“ Um síðari hluta þessarar reglu verður því miður einnig að gefa sumum hundaeigendum falleinkunn því víða er hundaskítur á almannafæri.   Er hér með skorað á hundaeigendur að bæta ráð sitt bæði hvað varðar lausagöngu hundanna og óþrif eftir þá. Sérstaklega verður að gera kröfu til að borin sé virðing fyrir leiksvæðum barna í þessum efnum. Eins og oft gerist geta fáir komið óorði á marga með slæmu framferði. Nokkur brögð eru einnig að því að hundar séu óskráðir og er hér með skorað á þá sem það á við að bæta úr og ganga frá skráningu hunda sinna á skrifstofu sveitarfélagsins.  Ástæða er til að benda á að allir hundar sem eru handsamaðir skulu leystir út með greiðslu samkvæmt gjaldskrá.  Í samþykktum um hundahald segir m.a.:   „Hunda sem ganga lausir utanhúss skal handsama og færa til geymslu. Sama gildir um hættulega hunda og óleyfilega hunda.  Kostnaður við töku og geymslu hunda skal að fullu greiddur af eigendum samkvæmt gildandi gjaldskrá.“ Skrá um þá sem hafa leyfi til hundahalds kemur fram undir Stjórnsýsla - Samþykktir á heimasíðu sveitarfélagsins, www.skagastrond.is. Skagaströnd 18. maí 2011 sveitarstjóri

FUNDARBOÐ Fundur verður haldinn í sveitarstjórn Skagastrandar miðvikudaginn 25. maí 2011 á skrifstofu sveitarfélagsins kl 800. Dagskrá: 1. Ársreikningur 2010, síðari umræða. 2. Deiliskipulag Hólaness 3. Verkefni og starfsmannahald sumarið 2011 4. Samningur um skólamáltíðir 5. Grunnskólinn a) Skýrsla skólastjóra um skólastarfið b) Kennslustundafjöldi næsta skólaár 6. Bréf a) Nemenda 7. bekkjar Höfðaskóla b) Aflsins, dags. 4. maí 2011 c) Kántrýbæjar, dags. 12. maí 2011. d) Íbúa Fellsbrautar og í Mýrinni, dags. 4. maí 2011. e) Framkvæmdastjóra SSNV, dags. 26. apríl 2011. f) Sveitarstjóra Húnaþings vestra, dags. 27. apríl 2011. 7. Fundargerðir a) Skipulagsnefndar, 19.05.2011. b) Tómstunda- og menningarmálanefndar, 2.05.2011. c) Menningarráðs Norðurlands vestra, 14.04.2011. d) Byggðasamlags um Tónlistarskóla A-Hún, 5.05.2011. 8. Önnur mál. Sveitarstjóri

Klukkan átta í morgun söfnuðust krakkar úr tíunda bekk Höfðaskóla á Skagaströnd og Blönduósskóla saman í kirkjunni á Skagaströnd.Tilefnið var setning Háskóla unga fólksins á Skagaströnd. Háskólalestin er komin og ætlar að kynna starf háskólans fyrir unga fólkinu. Nemendur sækja í dag valin námskeið. Þeim er boðið að kynnast nemendur  stjörnufræði, latínu, fornaldarsögu,  japönsku, nýsköpunar – og frumkvöðlafræðum, íslensku táknmáli, eðlisfræði og fornleifafræði. Á morgun býðst öllum að taka þátt í dagskrá Háskólalestarinnar á Skagaströnd sem fer fram víða í bænum. Í félagsheimilinu Fellsborg verður m.a. sýning félaga úr Sprengjugenginu landsfræga, eldorgelið mun óma, gestir kynnast sýntilraunum, teiknirólu, syngjandi skál, japanskri menninguog fornleifafræði, svo eitthvað sé nefnt. Í kaffihúsinu Bjarmanesi verða í boði stutt fræðsluerindi. Þar fræðir Sævar Helgi Bragason gesti um leyndardóma stjörnufræðinnar, Soffía Auður Birgisdóttir flytur erindið „Endurvinnsla bókmenntaarfsins“, Þorvarður Árnason fjallar um samfélagsgildi kórastarfs, Þór Hjaltalín flytur erindi um Ásbirningaríkið og Albína Hulda Þorsteinsdóttir greinir frá leyndardómum fornleifafræðinnar – nota fornleifafræðingar í alvöru tannbursta og teskeiðar við störf sín? Vísindaveisla Háskólalestarinnar er öllum opin, aðgangur ókeypis og allir hjartanlega velkomnir.

Vísindaveisla fyrir alla aldurshópa verður á Skagaströnd dagana 20. og 21. maí næstkomandi þegar Háskólalestin kemur í heimsókn. Ferð Háskólalestarinnar vítt og breitt um landið er þáttur í hátíðarhöldum Háskóla Íslands vegna aldarafmælis skólans.  Föstudaginn 20.maí sækja nemendur í  5. -10. bekk Höfðaskóla og 8. – 10.bekk grunnskóla Blönduóss valin námskeið úr hinum vinsæla Háskóla unga fólksins. Þar kynnast nemendur  stjörnufræði, latínu, fornaldarsögu,  japönsku, nýsköpunar – og frumkvöðlafræðum, íslensku táknmáli, eðlisfræði og fornleifafræði. Laugardaginn 21. maí býðst gestum og gangandi á öllum aldri að taka þátt í dagskrá Háskólalestarinnar á Skagaströnd sem fer fram víða á svæðinu.  Í félagsheimilinu Fellsborg verður m.a. sýning félaga úr Sprengjugenginu landsfræga, eldorgelið mun óma, gestir kynnast sýntilraunum, teiknirólu, syngjandi skál, japanskri menninguog fornleifafræði, svo eitthvað sé nefnt. Í kaffihúsinu Bjarmanesi verða í boði stutt fræðsluerindi. Þar fræðir Sævar Helgi Bragason gesti um leyndardóma stjörnufræðinnar, Soffía Auður Birgisdóttir flytur erindið „Endurvinnsla bókmenntaarfsins“, Þorvarður Árnason fjallar um samfélagsgildi kórastarfs, Þór Hjaltalín flytur erindi um Ásbirningaríkið og Albína Hulda Þorsteinsdóttir greinir frá leyndardómum fornleifafræðinnar – nota fornleifafræðingar í alvöru tannbursta og teskeiðar við störf sín? Vísindaveisla Háskólalestarinnar er öllum opin, aðgangur ókeypis og allir hjartanlega velkomnir. Nánari upplýsingar um Háskólalestina og Háskóla unga fólksins eru á á www.ung.hi.is.

Nes listamiðstöð bauð í vikunni krökkum á Skagaströnd upp á námskeið í skapandi list. Leiðbeinandi var Kendra Walker, kanadísk listakona, búsett í París. Námskeiðið var utan dyra og valdi hún því stað á planinu við við gömlu rækjuvinnsluna. Það var í því fólgið að teikna það sem krakkarnir vildu sjá úti sjóndeildarhringinn. Þeir fengu krítar í nokkrum litum og hófust svo handa við að teikna. Eins og sjá má á myndunum hafa krakkarnir ansi frjótt ímyndunarafl. Meira að segja þeir sem ekki vildu teikna tóku þátt með því að teikna með hjólunum ... Kendra lét þá lita dekkin og krakkarnir hjóluðu um planið og „skrensuðu“ svo úr urðu einhvers konar afstrakt myndir.  Yfir tuttugu krakkar tóku þátt í námskeiðinu.