Fréttir

Caffihúsið Bjarmanes verður opnað á laugardaginn. Sem fyrr er það Steinunn Ósk Óskarsdóttir sem rekur það í sumar. Hún býður alla hjartanlega velkomna velkomnir í Bjarmanes í sumar.  Án efa verða veitingarnar jafn girnilegar og freistandi og áður. Bjarmanes er kaffihús með menningarlegu ívafi. Í sumar verða að venju fjölbreyttar listsýningar og tónleikar. 

26.5.2011 Auglýsing um útboð á Skagaströnd Hafnarsjóður sveitarfélagsins Skagastrandar óskar eftir tilboðum í endurbyggingu á grjótvörn Útgarðs á um 28 m kafla og hækka vörnina á um 45 m kafla . Helstu magntölur: Taka upp og endurraða grjóti   um 400 m³. Sprengt og flokkað grjót 1 – 12 tonn  um 1.300 m³. Verkinu skal lokið eigi síðar en 15. september 2011. Útboðsgögn verða afhent á skrifstofu Siglingastofnunar, Vesturvör 2, Kópavogi frá og með þriðjudeginum 31. maí 2011, gegn 5.000,- kr. greiðslu. Tilboð verða opnuð á sama stað fimmtudaginn 16. júní, 2011 kl. 11:00. Hér má finna fleiri auglýsingar um útboð.

Sjómannadagurinn var haldinn hátíðlegur á Skagaströnd í gær, laugardag. Veðrið var afskaplega gott, hlýtt en nokkur strekkingur. Um morguninn var farið í skúrðgöngu frá höfninni og að Hólaneskirkju. Þetta hefur verið hefð svo lengi sem elstu menn muna. Úrsúla Árnadóttir, sóknarprestur, messaði og á eftir var lagður blómakrans við minnismerki drukknaðra sjómanna. Skemmtun var á hafnarhússplani og hófst hún með fallsbyssuskoti. Farið var í kappsiglingu í höfninni.  Á planinu reyndu karlar og konur með sér í alls kyns leikjum og íþróttum. á eftir var boðið upp á kaffi og bakkelsi í Fellsborg og um kvöldið var þar stórdansleikur þar sem hljómsveitin Matti og draugabanarnir léku fram eftir nóttu.

Maí var hlýr á Skagaströnd, hlýrri en allir liðnir mánuðir ársins. Engu að síður var hann kaldur. Meðalhiti mánaðarins var aðeins 4,2 gráður sem er auðvitað út í hött miðað við vorið – eða hvað?  Lygnara var í maí en verið hefur það sem af er árin. Vindstyrkurinn var aðeins 6,1 meter á sekúndu (m/s) og í hviðum fór hann upp í 9 m/s að meðaltali. Og hver er ástæðan fyrir köldu vori? Sumir segja syndum spilltir íbúar. Aðrir velta því fyrir sér hvort veðrið eigi bara ekki vanda til þess að vera svona á okkar „ísa köldu landi“. Sé svo skiptir syndin engu máli. Hiti Maí byrjaði vel og endaði á svipaðan hátt. Hlýtt var í upphafi og síðustu daga mánaðarins. Hlýjast var að meðaltali fyrri helming mánaðarins.  Á tímabilinu 1. til 15. maí var meðalhitinn 4,9 gráður. Seinni hlutann var meðalhitinn aðeins 3,5 gráður. Það kann að virðast lítið en 1,4 gráður eru hvorki meira né minna en 34% af meðalhita mánaðarins og auðvitað munar um minna.  Sömu sögu er að segja þegar mánuðinum er skipt í þrennt. Hlýjast er fyrstu tíu daganna. Þá er meðalhitinn 5,2 gráður. Síðan súnkar meðalhitinn niður í 3,6 gráður frá 11. til 20. maí og er eiginlega hinn sami síðustu tíu dagana, þ.e. 3,7 gráður. Lægst fór hitin 20. maí, en þann sólarhring var hann að meðaltali 0,4 gráður. Þá lá hann að mestu í núllinu. Daginn eftir versnaði laglega í því. Þó meðaltal hitans 21. maí hafi verið 0,8 gráður voru sveiflurnar meiri. Frá miðnætti og fram undir klukkan átta ríkti frostið kalt, að mestu eins gráðu frost. Er sólar tók að gæta hlýnaði og yfir daginn og fram undir miðnætti var eins eða tveggja gráðu hiti.  Þrátt fyrir að hitastigið í maí reyndi allt hvað tæki til að halda takti við árstíðina og eindregin vilja almennings gekk allt brösuglega. Það var svo ekki fyrr en þann 27. maí að hitinn fór yfir sjö gráðurnar samkvæmt lygilegu meðaltali. Má eiginlega segja að máttarvöldin séu eins og stjórnvöld landsins, hagsmunir þeirra og almennings fara lítt saman. Vindgangur Maí byrjaði vel. Lyngt var að mestu fram til 18. maí er’ann rauk upp í leiðinda hvassviðri sem entist í þrjá til sex daga. Síðustu dagana var vindur svona í kringum 10 m/s en hviðurnar voru mun hærri. Þetta hefði svo sem verið í lagi kuli og hvassvirði hefðu ekki farið saman. Fannst mörgum það óþarfi af máttarvöldunum og aftur er samlíkingin við stjórnvöld við hæfi. Vindáttir Og hvers vegna skyldi ný hafa verið svona kalt í maí? Látum syndir íbúanna liggja á milli hluta og einblínum frekar á vindáttir. Í ljós kemur að ráðandi vindáttir í maí komu úr áttunum frá norðri til austurs. Og þær voru kaldar, ferlega kaldar, sérstaklega eftir miðjan mánuðinn. Þetta má glögglega sá á meðfylgjandi vindrós fyrir maí. Frá faglegu hliðinni Á bloggsíðu sinni, http://esv.blog.is, segir Einar Sveinbjörnsson, veðurfræðingur, og varpar það líklega ágætu ljósi á veðurfarið í maí á landsvísu: Merkilegt nokk þá virðist þessi maímánuður ekki ætla að marka nein sérstök spor í veðurfarssögunni. Þrátt fyrir alvöru kuldakast í yfir vikutíma eftir miðjan mánuðinn verður hitinn yfir meðallagi víðast hvar á landinu (kannski síst um norðvestanvert landið).  Þökk sé hagstæðari tíð framan af eða frá um 2. maí fram yfir þ. 15.  Ef sá góði kafli hefði ekki komið væri mánuðirinn að öllum líkindum í slöku meðallagi.  Í Reykjavík stefnir í um 0,5°C yfir meðallag mánaðrins og á Akureyri um 1,0°C yfir maímeðaltalinu 1961-1990.  Ágætt það.  Það sem vekur kannski meiri athygli er úrkoman, en þegar dagur er eftir í mælingum hefur hún reynst vera meiri á Akureyri en í Reykjavík.  55 mm (tvöföld) á móti 53 mm í Rvk. En það sem meira er að um helmingur mánaðarúrkomunnar í Reykjavík féll fyrsta daginn (25 mm að morgni 1. maí)  og þótti það ansi mikið.   Sumir eru e.t.b. nú þegar búnir að gleyma lausamjöllinni í Höfuðborginni að morgni þess dags. Hann féll reyndar að miklu leyti fyrir miðnætti, þ.e. í apríl, en telst samt til maí skv. reglunum um skiptingar á milli mánaða í úrkomu.  Á Akureyri kom megnið af úrkomunni hins vegar í þremur slumpum um miðbik maí mánaðar. 

Sjómannadagur 2011

Sjónvarpsstöðin N4 var á ferðinni á Skagaströnd í lok maí og tók viðtal við Dagnýju Sigmarsdóttur og Ernst J Backman um uppbyggingu Spákonuhofs í gamla samkomuhúsbragganum. Viðtalið má finna á http://www.n4.is/tube/file/view/1816/

Matjurtagarðarnir  á Tótutúni hafa verið tættir og eru tilbúnir til notkunar. Þeir sem hyggjast nýta sér plássið eru vinsamlegast beðnir um að hafa samband við Árna Geir í síma 861 4267.

Fimmtudaginn 2. júní, kl. 16.00, verður Richard Hughes golfkennari með golfsýningu (golf tricks) á Háagerðisvelli. Ýmis kennslutilboð í golfi verða kynnt á staðnum, bæði fyrir byrjendur og lengra komna. Þeir sem hafa áhuga á kennslu hafi samband við Richard í síma 847 0875 eða Ingiberg í síma 892 3080. Munið að það er opið fyrir skráningu í golfskólann fyrir börn og unglinga.   Allir velkomnir

Nákvæmlega þrjú ár eru nú frá því að fyrstu listmennirnir komu til dvalar hjá Nesi listamiðstöð ehf. Meðal þeirra fyrstu voru rithöfundarnir Bjarni Bjarnason og Þorgrímur Þráinsson. Þeir lásu upp úr verkum sínum í kaffihúsinu Bjarmanesi. Húsfyllir var og skemmtu allir sér vel, rithöfundarnir sem og áheyrendur. Fyrirmyndin er þekkt víða um heim og raunar einnig hér á Íslandi. Listamönnum er einfaldlega boðið að sækja um aðstöðu gegn gjaldi. Dvalartíminn hefur verið að lágmarki í einn mánuður en  fjölmargir hafa verið lengur og dæmi eru um að listmenn hafi verið hér í sex mánuði. Rétt um 285 listmenn hafa dvalið þennan tíma á Skagaströnd. Meðaldvalartíminn er um einn og hálfur mánuður. Þess má líka geta að sumir hafa komið með fjölskyldur sínar og jafnvel eru dæmi um að barn listamanna hafi stundað nám sitt í Höfðaskóla á Skagaströnd. Makar og börn eru ekki með í ofangreindri tölu. Dvöl listamanna á Skagaströnd hefur þegar reynst mikil lyftistöng fyrir samfélagið enda vilja listamennirnir fúslega leggja sitt af mörkum til að efla menningarlífið. Nefna má viðburði eins og listsýningar, örnámskeið, fyrirlestrahald og samstarf við skóla og stofnanir bæjarins.  Fjölmargt má nefna: Mánaðarlega hefur verið efnt til svokallaðra opinna húsa og bæjarbúum þá gefin kostur á að heimsækja listamiðstöðina. Þeir hafa tekið á móti fólki og kynntu þeim list sína og fluttu fyrirlestra eða tóku fólk tali í smærri hópum og svöruðu spurningum.  Aðsóknin hefur verið mismunandi eða allt frá 20 til um 160 manns. Listmennirnir hafa verið einkar duglegir og áhugasamir um að bjóða upp á vinnusmiðjur fyrir krakkana í bænum. Nefna má að í vor var öllum krökkum í 3. til 8. bekk boðið að koma á hverjum mánudegi til að vinna lítil verkefni með listamönnunum. Einnig voru haldin námskeið fyrir krakka í grímugerð, listmálun, skúlptúrgerð, gerð „stop motion“ myndbanda og vatnslitamálun svo eitthvað sé nefnt.  Einnig hefur listamiðstöðin „lánað“ listamenn „yfir fjallið“. T.d. tóku þrír listamenn þátt í að kenna bókband, ljósmyndun og dans á þemadögum Fjölbrautaskóla Norðurlands vestra síðastliðið vor.  Atvinnudansari sem dvaldi hjá Nesi síðastliðið vor tók þátt í kántrýdönsum með Kántrýdansahópnum Sylgjunum. Það varð svo til þess að hún samdi dans fyrir hópinn og þegar hann tók þátt í keppni í Reykjavík í maí 2010 var hann hluti af dagskránni.  Listamenn hafa verið duglegir að standa fyrir gjörningum þar má nefna, „Bláa útgáfan“ gjörningur með ljósi og lyfturum eftir Anna Grunemann „drawing a straight line“ gjörningur í samvinnu nemendur grunnskólans eftir Aimée Xenou og „Survey of sound“ hljóðgjörningur í Hólaneskirkju eftir Tim Bruniges og Sarah Mosca.  Haldnar voru nokkrar sýningar á síðasta ári. Fyrst ber að nefna „After works“ í kjallaranum á Bjarmanesi á Kántrýdögum, þar sýndu þeir Jude Griebel og Jared Betts málverk sín.  Í fyrra var efnt til sýningarinnar „Inspired by Iceland“ í Frystinum Gallerí á Kántrýdögum. Listamiðstöðin hafði biðlað til þeirra listamanna sem höfðu dvalið á Skagatrönd og fengið marga þeirra til að senda að senda listaverk á sýninguna. Fjölmörg verk bárust og gáfu flestir listamennirnir Sveitafélaginu Skagaströnd verkin. Aimée Xenou setti svo nú í febrúar mánuði upp skemmtilega sýningu í kjallaranum á Bjarmanes undir heitinu „Það er“. Á haustdögum dvöldu hjá Nesi tvær þýskar listakonur sem komu í gegnum samvinnuverkefni við Künstlerhaus Lukas í Þýskalandi. Þær stóðu fyrir „Swap shop“, eins konar skiptimarkaði og bauðst heimamönnum að koma og skipta við þær á einhverju heimagerðu og listaverki eftir þær. Vakti þetta mikinn áhuga bæjarbúa. Í desember kom listakona frá Bandaríkjunum til þess eins að kenna námskeið í hefðbundinni japanskri pappírsgerð. Pappírgerðarnámskeiðið var einn af fjölmörgu viðburðum sem listakonan Aimée Xenou stóð fyrir á meðan dvöl hennar stóð. Bróðir hennar kom sérstaklega til að spila á orgelið í kirkjunni meðan á gjörningi stóð en í honum tóku einnig þátt stúlkur sem hafa verið að læra dans hjá heimamanninum Andreu Kasper hér í vetur. Foreldrar Aimée komu einnig og tóku þátt í seinni hluta gjörningsins „Innflutningur á fjölskyldu“ þar sem lesin voru brot úr bréfum frá móður Aimée. Mesta athygli vöktu þó kökurnar, en þær mæðgur bökuðu eina smáköku fyrir hvern og einn bæjarbúa og þær voru í ofanálag merktar íbúanum. Íbúar þurftu svo að hafa fyrir því að finna kökuna á kökuborði í listamiðstöðinni.  Eitt af markmiðum Ness listamiðstöðvar er að færa listina nær fólkinu og eins og má sjá á upptalningunni hér að ofan hefur margt skemmtilegt verið gert sem vakið hefur áhuga og athygli bæjarbúa og íbúa á Norðurlandi vestra. Níu listamenn eru nú komnir til Skagastrandar og munu dvelja hér í júní.  Hér eru nöfn þeirra: Emily Browne Bandaríkjunum Karen Voltz Bandaríkjunum Naomi Falk Bandaríkjunum Evelin Rupschus Þýskalandi Shane Finan Írlandi Dieter Wagner Þýskalandi Adrian Hatfield Bandaríkjunum Candice Chu Bandaríkjunum MinHae Lee Suður Kóreu Jill Connell         Kanada Ellie Brown Bandaríkjunum  Ástæða er til að hvetja fólk til að skoða heimasíðu Nes listmiðstöðar, www.neslist.is og fésbókarsíðuna.

Sumarsýning Heimilisiðnaðarsafnsins 2011 Yfirlitssýning á verkum Guðrúnar J. Vigfúsdóttur veflistakonu frá Ísafirði, verður opnuð laugardaginn 4. júní n.k. kl. 14.00. Eyrún Ísfold Gísladóttir, dóttir listakonunnar, ræðir við gesti og opnar sýninguna. Lára Sóley Jóhannsdóttir og Hjalti Jónsson stíga á stokk með ljúfan tónlistarflutning. Að vanda verður boðið uppá kaffi og kleinur, mjólk/kókómjólk fyrir börnin. Aðgangur er ókeypis á opnunina og allir hjartanlega velkomnir. Heimilisiðnaðarsafnið verður opið alla daga frá 1. júní til 31. ágúst frá kl. 10.00 - 17.00