Fréttir

Námskeið um útikennslu var haldið á vegum Fræðsluskrifstofunnar á Húnavöllum þann 4. mars s.l. Fyrirlesarinn Aðalsteinn Örn Snæþórsson, líffræðingur og kennari útskýrði með áhugaverðum dæmum, bóklegum og verklegum, kosti útikennslu í skólastarfi. Útikennsla er þegar hluti kennslunnar er fluttur út í nánasta umhverfi skólans og reglulega eru unnin verkefni utan skólastofunnar. Aðalsteinn Örn lagði áherslu á kosti útikennslu og nefndi sem dæmi að hún auki skilning á náttúru, vísindum og umhverfi og ítrekaði að umhverfi hvers skólasvæðis leggði skólunum endalaus tækifæri í hendur til að auka fjölbreytni í viðfangsefnum í öllum námsgreinum fyrir alla aldurshópa. Námskeiðið sóttu 32 kennarar grunnskóla Húnavatnssýslna og grunnskólans á Borðeyri. Þátttakendur lýstu mikilli ánægju með daginn. Myndir: Þátttakendur og Leiðbeinandi að störfum úti og inni

Átta listamenn verða á Skagaströnd í mars á vegum Nes-listamiðstöðvar. Með mökum og einu barni er um að ræða þrettán manns. Gárungarnir kalla mars latneska mánuðinn vegna þess hve margir koma frá suðlægum löndum. En þetta eru listamennirnir: Marie Britt, myndhöggvari frá Írlandi ásamt maka og barni Lucy McKenna, málari frá Írlandi Nadege Druzkowski, málari frá Frakklandi Lucas Gervilla, videó-listamaður frá Brasilíu Julieta do Vale, portúgalskur myndlistamaður ásamt maka Noemi Romano, textílistamaður frá Ítalíu Anna Sigríður Sigurjónsdóttir, myndhöggvari ásamt maka Mie Olise Kjærgaard, fjöllistamaður frá Danmörku

Ungmennafélagið Fram hefur opnað nýja heimasíðu. Hún er fyrst og fremst hugsuð til þesssafna saman myndum sem til eru úr starfi félagsins.   Vitað er að margir eiga myndir sem þeir hafa tekið bæði á stafrænu formi og á filmu. Þætti okkur í stjórn Umf. Fram vænt um ef fólk væri tilbúið að deila þessum myndum með okkur og getur það haft samband við Elvu í síma 452 2761. Veffang heimasíðunnar er: http://fram.123.is/. 

FUNDARBOÐ Fundur verður haldinn í sveitarstjórn Skagastrandar miðvikudaginn 4. mars 2009 á skrifstofu sveitarfélagsins kl 800. Dagskrá: 1. Gjaldskrár sveitarfélagsins 2. Stofnun Starfsendurhæfingar 3. Samningur um sorphirðu 4. Bréf: a) Umhverfisstofnunar, dags. 30. jan. 2009. b) Sambands íslenskra sveitarfélaga, 27. jan. 2009. c) Sjávarútvegs og landbúnaðarráðun. dags. 17. feb. 2009. d) Sambands íslenskra sveitarfélaga, dags. 16. feb. 2009. e) Samgönguráðuneytisins, 16. feb. 2009. f) Lánasjóðs sveitarfélaga ohf, dags. 10. feb. 2009. g) Bændasamtaka Íslands, dags. 16. jan. 2009. h) Dóms- og kirkumálaráðuneytis, dags. 22. jan. 2009. i) Orkusölunnar, dags. 23. jan. 2009. j) Óbyggðanefndar, dags. 21. jan. 2009. k) Menningarráðs Norðurl. vestra, dags. 3. feb. 2009. l) Félags tónlistarkennara, dags. 6. jan. 2009. m) Valdimars Viggóssonar, dags. 3. feb. 2009. 5. Fundargerðir: a) Vinnufundar um skipulagsmál, 3.02.2009. b) Stjórnar Tónlistarskóla A-Hún, 24.02.2009. c) Menningarráðs Nl. vestra, 23.01.2009. d) Stjórnar Norðurár bs. 30.01.2009. e) Heilbrigðisnefndar Nl. vestra, 06.02.2009. 6. Önnur mál Sveitarstjóri

Prjónakaffið í Kvennaskólanum er í 2. viku mánaðarins – áhugasamir eru hvattir til að mæta með prjóna eða aðra handavinnu, sýna sig og sjá aðra, fræðast og njóta.   Úrval bóka og tímarita eru til útláns. Kompan - hannyrða- og föndurverslun á Sauðárkróki kynnir vöru sína og þjónustu. Herdís í Kompunni mun leggja sérstaka áherslu á að kynna ýmiskonar garn fyrir hekl, prjón og útsaum, og ull í þæfingu.  Þá kynnir hún þá þjónustu sem verslunin býður upp á: námskeið, leiðbeiningar og pöntunarþjónustu.   Handverkshús Textílsetursins – undirbúningur er hafinn og verða ýmis námskeið í boði fyrir áhugasama.  Tóvinnunámskeið er fyrirhugað helgina 14. – 15. mars.  Einnig verður boðið upp á prjónanámskeið, þæfingarnámskeið og námskeið í vinnu með leður og roð. Skráning í s. 894-9030 og textilsetur@simnet.is.

Grímuball verður haldið í Fellsborg á öskudaginn, miðvikudaginn 25. febrúar, kl. 18:00 - 20:00.  Aðgangseyrir er 400 kr. fyrir þá sem eru í búningum en 600 kr. fyrir aðra. Frítt fyrir þriðja barn frá heimili. Allir velkomnir, jafnt stórir sem smáir. Eins og venjulega verður marserað, farið í leiki, kötturinn sleginn úr tunnunni og veitt verðlaun fyrir flotta búninga. Mætum nú öll og skemmtum okkur saman. Skólafélagið Rán.

Heimsóknavinir eru sjálfboðaliðar Rauða krossins sem yfirleitt heimsækja gestgjafa sína einu sinni í viku, klukkustund í senn. Þeir sem heimsækja eru karlar og konur, ungir og aldnir, allt fólk sem er tilbúið að gefa tíma sinn til að gleðja aðra.  Það fer svolítið eftir áhugamálum og aðstæðum þess sem heimsóttur er, hvernig gestgjafi og heimsóknavinur verja tímanum saman. Sumir vilja bara spjalla um daginn og veginn, aðrir hlusta á lestur úr góðum bókum, spila eða fara í gönguferð, svo eitthvað sé nefnt,  allt eftir því hvað gestgjafi og heimsóknavinur koma sér saman um. Heimsóknir eru meðal annars á heimili fólks, dvalarheimili, sjúkrahús eða sambýli, auk þess sem einnig eru starfandi svokallaðir ökuvinir, sem bjóða gestgjafa sínum í bíltúr í stað heimsóknar á heimili. Einnig bjóða nokkrar deildir upp á heimsóknir með hunda. Heimsóknavinur þarf að hafa gaman af því að umgangast fólk, vera traustur og áreiðanlegur og kunna að hlusta á aðra.  Undanfari heimsóknavina, voru svokallaðir sjúkravinir sem hófu heimsóknir um miðjan sjöunda áratug síðustu aldar, en verkefnið í þeirri mynd sem nú starfar, hófst árið 2001.    Þeir sem vilja gerast heimsóknavinir þurfa að sækja undirbúningsnámskeið sem haldin eru hjá deildum Rauða krossins víða um land. Á námskeiðinu er fyrst farið í stuttu máli yfir stöðu og markmið verkefnisins, en síðan er farið yfir hlutverk heimsóknavina og þær reglur sem unnið eftir. Heimsóknavinum stendur einnig til boða fjölbreytt fræðsla, námskeið og handleiðsla eftir að þeir taka til starfa og hefja heimsóknir. Þeir sem hafa áhuga á að gerast heimsóknavinir eru hvattir til að hafa samband við Sigrúnu í síma 897-2884. Námskeið fyrir heimsóknarvini verður haldið á Blönduósi þriðjudaginn 24. febrúar og er skráning og frekari upplýsingar hjá Sigrúnu í ofangreindu símanúmeri.  

Þegar vel viðrar á Skagaströnd, sem er sko eiginlega alltaf, kemur fyrir að fjöllin hinum handan Flóans sýni sig. Það þarf nú ekki endilega að gerast á sama tíma því veður í Strandasýslu eru oft önnur en hérna megin. Hvað heita fjöllin vestan Húnaflóa á sömu breiddargráðu og Skagaströnd? Þessi spurning kom eitt sinn fyrir í spurningakeppninni Drekktu betur. Svarið er Balafjöll. Þau rísa bratt og tignarlegir hamrarnir blasa við augum eins og glögglega má sá á meðfylgjandi mynd. Og þegar veðrið er gott væri gaman að geta ort eins og Helga frá Flögu: Björt sem vandað brúðarlín, breidd á þandan snjáinn. Fallegu Strandafjöllin mín fyrir handan sjáinn.

Ertu með hugmynd ? Viðtalstímar menningarfulltrúa Vegna auglýsingar um verkefnastyrki Menningarráðs Norðurlands vestra verður Ingibergur Guðmundsson, menningarfulltrúi, með viðtalstíma í A-Hún. sem hér segir: Fimmtudagur 26. febrúar: Kl. 11.00 - 12.00 - Bókasafn Húnavallaskóla Kl. 13.00 - 16.00 - Skrifstofa Blönduósbæjar Kl. 16.15 - 17.00 - Skrifstofa menningarráðs, Skagaströnd Pantaðu tíma í síma 892 3080 eða bara mættu á staðinn. Menningarráð Norðurlands vestra

Verkefnastyrkir til menningarstarfs Menningarráð Norðurlands vestra auglýsir eftir umsóknum um verkefnastyrki á grundvelli samnings menntamálaráðuneytis og iðnaðarráðuneytis við SSNV frá 1. maí 2007. Tilgangur styrkjanna er að efla menningarstarf og menningartengda ferðaþjónustu á Norðurlandi vestra. Menningarráð Norðurlands vestra hefur ákveðið að hafa tvær úthlutanir á árinu 2009, með umsóknarfrestum til og með 12. mars og 15. september. Menningarráð skilgreinir verkefni í eftirtalda flokka: a) Stærra samstarfsverkefni. Stærra samstarfsverkefni þarf að fela í sér samstarf aðila úr þeim þremur sýslum sem eru á starfssvæði ráðsins. Heimilt er að veita allt að 3 milljónum króna til slíks verkefnis en styrkur getur þó aldrei verið hærri en 70% af heildarkostnaði verkefnisins. b) Minni samstarfsverkefni, svæðisbundin verkefni og verkefni einyrkja. Heimilt er að veita allt að 1,5 milljónum króna til hvers verkefnis en styrkur getur þó aldrei verið hærri en 50% af heildarkostnaði verkefnisins. Menningarráð hefur ákveðið að þau verkefni hafi forgang sem uppfylla eitt eða fleiri eftirtalinna atriða: · Efling atvinnustarfsemi, þekkingar og fræðslu á sviði menningar og lista. · Samstarf milli tveggja eða fleiri aðila, byggðarlaga eða listgreina og uppsetning viðburða á fleiri en einum stað. · Nýsköpun og þróun menningarstarfs og menningartengdrar ferðaþjónustu. · Aukin þátttaka ungs fólks og eldri borgara í menningarstarfi. · Verkefni sem hafa unnið sér sess og viðurkenningu og eru vaxandi Umsækjendur geta verið einstaklingar, félagasamtök, fyrirtæki, stofnanir og sveitarfélög á Norðurlandi vestra. Skilyrði er að viðkomandi sýni fram á mótframlag. Umsækjendum er bent á að kynna sér nánar úthlutunarreglur 2009, menningarsamninginn og stefnumótun í menningarmálum á www.ssnv.is undir liðnum Menningarráð. Umsóknir skulu vera á eyðublöðum Menningarráðs Norðurlands vestra sem hægt er að nálgast á heimasíðunni www.ssnv.is undir liðnum Menningarráð. Í umsókninni skal m.a. vera greinargóð lýsing á verkefninu með verkáætlun og tímasetningum, ítarleg fjárhagsáætlun (kostnaðar- og tekjuáætlun) og upplýsingar um aðstandendur. Umsóknir vegna fyrri úthlutunar ársins 2009 skulu sendar Menningarfulltrúa Norðurlands vestra, Einbúastíg 2, 545 Skagaströnd, eigi síðar en 12. mars 2009. Þær má senda rafrænt á netfangið menning@ssnv.is. Séu þær sendar í pósti skulu þær póststimplaðar eigi síðar en síðasta umsóknardag. Allar nánari upplýsingar og aðstoð veitir Ingibergur Guðmundsson menningarfulltrúi Norðurlands vestra, símar 452 2901 / 892 3080, netfang menning@ssnv.is