Fréttir

Framsagnarkeppni grunnskólanna í Húnavatnsþingi var haldin á Laugabakka 26. mars.  Þau Heba Líf Jónsdóttir, Sigurlaug Máney Hafliðadóttir og Ívan Árni Róbertsson kepptu fyrir hönd Höfðaskóla og stóðu sig öll glæsilega.  Keppendur auk þeirra voru frá grunnskólunum á Blönduósi, Húnavöllum og Laugabakka/Hvammstanga.  Ívan Árni sigraði í keppninni. Í 2. sæti varð Rakel Ósk Ólafsdóttir frá Grunnskóla Húnaþings vestra og í 3. sæti varð Atli Einarsson frá Grunnskólanum Blönduósi.

Stúlknakór Norðurlands vestra syngur í dag í Hólaneskirkju og hefjast tónleikarnir klukkan 17. Kórinn hefur þegar komið tvisvar fram , á blönduósi og Hvammstanga, og hefur honum verið ákaflega vel tekið. Aðgangurinn kostar 1.500 krónur og 800 fyrir grunnskólanemendur. Selt er við innganginn. Ástæða er til að hvetja Skagstrendinga til að fjölmenna á tónleikanna. Myndir: Alexandra Chernyshova, listrænn stjórnandi Elínborg Sigurgeirsdóttir, undirleikari Margrét Petra Ragnarsdóttir, einsöngur í Katjusha Sara Rut Fannarsdóttir, Ástrós Kristjánsdóttir og Margrét Petra Ragnarsdóttir, einsöngur í Dont cry for me Argentina Stúlknakórinn á tónleikum í Blönduóskirkju 

Hvinur stormsins eða blíður andblær, lágvært öldugjálfur eða öskrandi öldurót, hjal ástarinnar eða tregi ástarsorgarinnar.  Allt þetta og margt fleira mátti heyra og skilja  þegar hin frábæra færeyska söngkona  Eivör Pálsdóttir hélt tónleika í Hólaneskirkju á Skagaströnd sunnudagskvöldið 5. apríl fyrir troðfullu húsi áheyrenda. Með Eivöru var þriggja manna hljómsveit, tveir samlandar hennar sem léku á ýmis hljóðfæri og finnskur trommuleikari. Sú tónlist sem Eivör flutti er að mestu leyti frumsamin og þar mátti greina töluverð áhrif frá færeyskri tónlist og umhverfinu þar, fólkinu, fuglunum, veðurfarinu og landslaginu á heimaslóðum.  Sérstæð túlkun hennar í söng og breitt raddsvið gerði þessa tónleika líka frábrugðna öðrum og myndaði sérstaka stemningu og hugblæ sem þakklátir áheyrendur nutu til fulls 

Hljómsveitin Bróðir Svartúlfs sigraði í Músíktilraunum í ár. Í hljómsveitinni er góð blanda af Skagfirðingum og Húnvetningum þar sem bassaleikarinn Jón Atli er frá Skagaströnd, trymbillinn Andri frá Blönduósi, hljómborðsleikarinn Helgi Sæmundur, gítarleikarinn Sigfús og síðast en ekki síst söngvarinn og textahöfundurinn Arnar Freyr eru frá Sauðárkróki. Segja má að Bróðri Svartúlfs hafi komið séð og sigrað í mörgum skilningi því Arnar Freyr var einnig útnefndur textahöfundur Músiktilrauna fyrir hnittna og vel samda íslenska texta og Jón Atli var valinn bassaleikari Músíktilrauna. Hlutdeild Skagastrandar var góð í úrslitum Músiktilrauna í ár því auk þessa var Almar Freyr Fannarsson valinn efnilegasti söngvarinn. Hljómsveit frá Norðurlandi hefur ekki unnið Músiktilraunir síðan hljómsveitin Jójó frá Skagaströnd náði þeim árangri 1988. Til gamans má geta þess að það var talsverð tenging við þá sem náðu árangri í ár því Viggó bassaleikari Jójó er bróðir Jóns Atla og Fannar sem lék á gítar í Jójó er faðir Almars Freys. Allir eru þeir afkomendur Viggós Brynjólfssonar sem m.a. hefur komið fram sem sérstakur harmonikkuleikari vinnuvélamanna við Kárahnjúkavirkjun ... Bræðurnir Jón Atli og Viggó Magnússynir hafa sem bassaleikarar báðir unnið Músíktilraunir, reyndar með 21 árs millibili en það er spurning hvort slíkt er ekki einsdæmi í sögu Músíktilrauna.

Eivör Pálsdóttir syngur í Hólaneskirkju á Skagaströnd sunnudagskvöldið 5. apríl kl. 20:30. Enn er hægt að fá miða á tónleikana með því að hringja í síma 864 7444 og panta. Aðgangseyrir 1.000 kr. sem rennur óskiptur til kirkjunnar. Tónleikarnir eru í boði Minningarsjóðsins um hjónin frá Garði og Vindhæli

Meira en 150 manns komu á listsýningar Nes listamiðstöðvar á Skagaströnd um síðustu helgi. Sjaldan áður hafa jafnmargir komið til að hitta listamennina og skoða verk þeirra. Það voru listamenn marsmánaðar sem opnuðu hús sín. Gestir komu víða að, fjölmargir frá Blönduósi og jafnvel Sauðárkróki. Meðfylgjandi myndir tók Signý Richter.

Störf flokksstjóra   Sveitarfélagið Skagaströnd auglýsir laus til umsóknar störf flokksstjóra í vinnuskóla sumarið 2009. Gert er ráð fyrir að flokksstjórar hefja störf í maí og vinni til seinni hluta ágústmánaðar. Við leitum að hressum, duglegum og samviskusömum einstaklingum sem hafa verkreynslu og áhuga á að starfa með unglingum í skemmtilegri útivinnu. Umsóknum skal skilað á skrifstofu sveitarfélagsins eigi síðar en 17. apríl næstkomandi. Umsóknareyðublöð fást á skrifstofunni og á www.skagastrond.is . Launakjör eru skv. kjarasamningi við viðkomandi stéttarfélag. Nánari upplýsingar veittar á skrifstofu Sveitarfélagsins Skagastrandar.   Sveitarstjóri

Maður kemur í manns stað. Nú halda nokkrir listamenn Nes listamiðstöðvar á braut en aðrir bætast við. Edward F. Master frá Bandaríkjunum, edwardfmaster@gmail.com Nadege Druzkowski frá Frakklandi, nadege@ndart.fr Nicola Stead frá Bretlandi, nicolastead@cheerful.com Roshni Robert frá Bandaríkjunum, wovenfingers@gmail.com Kate Dambach frá Bandaríkjunum, kdambach@gmail.com Þórunn Sigr. Þorgrímsdóttir, visionis@internet.is Öll eru þau málarar nema Þórunn sem er rithöfundur. 

Vinnumálastofnun Norðurlandi vestra fagnar því nú að 2 ár eru liðin frá því að Greiðslustofa tók til starfa á Skagaströnd. Í tilefni af afmælinu þann 1. apríl ætlum við starfsmenn Vinnumálastofnunar að skella okkur í hressandi göngutúr. Við ætlum að ganga frá Túnbrautinni klukkan 15:15, upp á Höfða og aftur til baka. Hressir bæjarbúar og gestir eru velkomnir í gönguna okkar, því fleiri því betra. Við leyfum okkur að vona að við getum boðið upp á þokkalegt gönguveður. Vinnumálastofnun Skagaströnd

Þessa viku verða beinar útvarps- og sjónvarpsútsendingar á kaplinum. Það eru nemendur á fjórðu önn í fjölmiðlatækni við Flensborgarskálann undir stjórn Halldórs Árna Sveinssonar, kennara og listamanns.   Tilgangurinn er að safna ábendingum um efni. Markmiðið er að gera sem flestu skil í mannlífi og menningu Skagstrendinga og í því skyni er meðal annars ætlunin að heimsækja vinnustaði og fá áhugavert fólk í viðtöl. Í kvöld, mánudaginn 30. mars kl. 20:30, verður kynningafundur í Félagsheimilinu Fellsborg. Þar mun Halldór og nemendur hans skýra út hvað þeir ætla að gera og fá tillögur frá heimamönnum. Þar af leiðir að allir eru hjartanlega velkomnir og boðið verður upp á kaffi. Flesnsborgarskóli kemur hingað í samvinnu við Sveitarfélagið, Útvarp Kántrýbæ, Höfðaskóla, Sjónvarpsfélagið og ýmsa einstaklinga. Ætlunin er að standa fyrir útvarpsútsendingum í Kántrýbæ frá þriðjudegi til föstudags kl. 14 til 16. Sjónvarps útsendingar verða á kapalkerfinu frá klukkan 18 til 18:30. Halldór er síður en svo ókunnur á Skagaströnd. Hann dvaldi í fyrra í Nes listamiðstöðinni og málaði myndir af miklum móð.  Honum leið vel hér og tók miklu ástfóstri við bæinn og bauð þess vegna upp á námskeið í listmálum sem meira en tuttugu manns tóku þátt í. Halldór er núna að ganga frá heimildarmynd um Skagaströnd sem hann tók í fyrra og væntanlega verður hún tilbúin síðar á árinu. Áhugasamir geta náð sambandi við Halldór í síma 856 5857.