Fréttir

Hreppsnefnd Höfðahrepps auglýsir eftir hugmyndum um rekstur og starfsemi í Gamla skólanum, Bjarmanesi. Húsið sem var byggt 1913 verður allt gert upp og stílfært til þess tíma sem það var byggt. Skipulag hússins verður þannig að efri hæðin er að mestu einn salur með anddyri, salerni og eldunaraðstöðu neðri hæð verður minna frágengin og líklegt að það nýtist helst sem geymslurými. Reiknað er með að Námsstofa verði til húsa í Bjarmanesi yfir vetrarmánuðina en óskað eftir hugmyndum um rekstur og nýtingu yfir sumarmánuðina. Jafnframt er óskað eftir að þeir sem hafa góðar hugmyndir séu annað tveggja tilbúnir að framkvæma þær á eigin spýtur eða geti bent á leiðir til að hrinda þeim í framkvæmd. Hugmyndum skal skilað á skrifstofu Höfðahrepps fyrir 16. apríl nk. og þar er einnig hægt að fá teikningar af fyrirkomulagi hússins. Hreppsnefnd Höfðahrepps.

Fiskmarkaður Skagastrandar hefur keypt hluta af Hafnarlóð 6, sem áður var mjölskemma SR mjöls og hefur undanfarnar vikur verið unnið að breytingum á húsnæðinu fyrir markaðinn. Verið er að steypa nýtt gólf í húsið og var steypunni, um 70 m3, ekið frá Sauðárkróki. Fiskmarkaðurinn flytur væntanlega inn í húsið í júní nk. og rýmkast þá mikið um starfssemi hans. Talsverð aukning hefur verið í veiðum smærri báta frá Skagaströnd síðustu ár enda er umtalsverð veiði í Húnaflóa allt árið um kring. Í nýrri stofnmælingu botnfiska á Íslandsmiðum kemur fram að mest veiddist af þorski á Húnaflóa og djúpt út af Norðausturlandi. Uppbygging á þjónustu við útgerðir við Húnaflóann er því mikilvæg og varð um 6,5% aukning í lönduðum afla á Skagastrandarhöfn á síðasta ári.

Björgunarsveitin Strönd færir nemendum 4. bekkjar námsefni í slysavörnum. Ernst K. Berndsen afhenti Hallbjörgu Jónsdóttur kennara námsgögnin, nemendur fengu einnig afhentar stundaskrár frá Landsbjörg.

Olís hf. færði Íþróttahúsinu og Golfklúbbnum "skólagolf tösku" sem inniheldur ma. 14 kylfur, 8 grasmottur auk pútthringja og innanhús golfbolta. Á næstunni verður haldið námskeið fyrir nemendur skólans í samráði við Höfðaskóla.

Að venju var haldið í hefðir bræðranna þriggja, bollu- sprengi- og öskudags. Börnin bjuggu til bolluvendi sem þau höfðu með sér heima til að geta bollað mömmur og pabba með eldsnemma á bolludagsmorgni. Í leikskólanum fengu allir bollur með rjóma, sultu og súkkulaði. Í hádegi á þriðjudegi fengu börnin saltkjöt og baunir, allir urðu að smakka, sumir hámuðu í sig súpu og kjöt en aðrir létu sér nægja kjöt og kartöflur. Öskudagur er síðastur í röðinni, en sá er skemmtilegastur þeirra bræðra, a.m.k í augum barnanna.„ Þá fær maður að klæða sig í búning og koma með sverð í leikskólann“ sagði ungur maður. „ Já, og mála sig í framan“ sagði annar. „Ég ætla að vera risaeðla“ tilkynnti sá þriðji. Börnin örkuðu um þorpið og sungu fyrir fólkið, en alltaf er byrjað á því að syngja fyrir eldri borgarana á Sæborg, sem bíða með eftirvæntingu eftir börnunum. Við vorum líka svo heppin með veðrið að þessu sinni en komið hefur fyrir að öskudagssönginn hefur þurft að slá af vegna tillitsleysis veðurguðanna. Helga Bergsdóttir leikskólastjóri

Borgarafundur verður haldinn í Fellsborg þriðjudaginn 16. mars nk. kl. 20,00. Á fundinum mun hreppsnefnd m.a. kynna helstu lykiltölur í fjármálum og rekstri sveitarfélagsins. Almennar umræður um málefni sveitarfélagsins. Hreppsnefnd Höfðahrepps

Hreppsnefnd Höfðahrepps og Bæjarstjórn Blönduóss héldu sameiginlegan fund í Kántrýbæ fimmtudaginn 11. mars sl. Á fundinum var fjallað um ýmis sameiginleg mál en aðalefni fundarins var kynning Wilhelms Steindórssonar verkfræðings á forsendum þess að leggja hitaveitu frá Blönduósi til Skagastrandar. Umræður um hitaveitumálið voru líflegar og margt í skýringum Wilhelms sem vakti áhuga á nánari skoðun á því máli. Samþykkt var að hvor sveitarstjórn skipi tvo fulltrúa til að ræða um framhald málsins og önnur sameiginleg hagsmunamál.

Hafnarnefnd samþykkti nýlega á fundi sínum að nefna hafnarkantana nýjum nöfnum og bera þeir framvegis nöfnin Útgarður, Sægarður, Ásgarður, Miðgarður, Skúffugarður og Smágarðar sem eru flotbryggjurnar fyrir smábátanna. Unnið er að gerð öryggisplans fyrir höfnina og þótti mikilvægt að fyrir lægi formlega hver væru nöfn bryggjanna og nauðsynlegt að festa nöfnin í sessi. Í framhaldi af þessari ákvörðun verða bryggjurnar merktar í samræmi við þessi nýju nöfn. Þar með falla út nöfn eins og Löndunarbryggja, Bræðslubryggja og Suðurgarður svo einhver séu nefnd af þeim nöfnum sem notuð hafa verið í gegnum tíðina á bryggjunum og einhverjum kann að þykja eftirsjá í.

Mánudaginn 1. mars fóru börnin á Barnabóli á leiksýningu í Hólaneskirkju. Stopp leikhópurinn hafði fært söguna um Hans klaufa í leikbúning, sem tók um 30 mínútur í sýningu. Nemendur í Höfðaskóla, 1.-4. bekkur sóttu þessa sýningu líka. Sumir hinna ungu leikhúsgesta höfðu boðið foreldrum sínum með sér. Leiksýningin var í boði Héraðsnefndar, Höfðaskóla og Barnabóls.

FUNDARBOÐ Fundur verður haldinn í Hreppsnefnd Höfðahrepps fimmtudaginn 4. mars 2004 á skrifstofu hreppsins kl 1600. Dagskrá: 1. Fjárhagsáætlun 2004, síðari umræða 2. Úthlutun byggðakvóta, 3. Bréf: Jökulrósar Grímsdóttur og Sigurjóns Ástmarssonar, dags. 24. feb. 2004. 4. Fundargerðir: a) Hafnarnefndar 10.03.2004. b) Framkvæmdaráðs um svæðisskipulag, 8.01.2004. c) Framkvæmdaráðs um svæðisskipulag, 21.01.2004. d) Framkvæmdaráðs um svæðisskipulag, 28.01.2004. e) Framkvæmdaráðs um svæðisskipulag, 17.02.2004. 5. Önnur mál. Sveitarstjóri