Byggðasamlagið Norðurá bs. auglýsir laust starf við urðunar-staðinn Stekkjarvík við Blönduós. Lýsing á starfinu: Í því felst almenn umsjón með urðunarstaðnum, móttaka, vigtun og skráning á sorpi til urðunar. Einnig vinna á sorptroðara og öðrum vinnuvélum við frágang í urðunarhólfi. Hæfniskröfur: Leitað er eftir metnaðarfullum einstaklingi sem er skipulagður og sýnir frumkvæði og sveigjanleika í starfi. Lögð er áhersla á að viðkomandi sé úrræðagóður og stundvís. Gerð er krafa um vinnuvélaréttindi og almenna tölvukunnáttu ásamt því að viðkomandi geti unnið sjálfstætt. Hæfni í mannlegum samskiptum og rík þjónustulund er skilyrði. Laun og önnur starfskjör fara eftir samningum Sambands íslenskra sveitarfélaga við viðkomandi stéttarfélag. Umsóknarfrestur er til og með 31. mars 2015 Nánari upplýsingar um starfið veita: Fannar J. Viggósson, s: 845 6111, stekkjarvik@simnet.is. Magnús B. Jónsson, s: 455 2700, magnus@skagastrond.is. Sótt er um starfið á heimasíðu Sveitarfélagsins Skagafjarðar, www.skagafjordur.is (störf í boði).

Þessi mynd var tekin á leikskólanum Barnaból á litlu jólunum 1981. Fremst til vinstri er Jón Ólafur Sigurjónsson, Jón Örn Stefánsson situr hægra megin við hann í rauðleitri peysu og Arnar Ólafur Viggósson er lengra til hægri í bláum smekkbuxum og Gunnar Guðmundsson hægra megin við hann. Við hlið Jóns Ólafs í fölbleikum fötum situr Árný Guðrún Ólafsdóttir. Hildur Inga Rúnarsdóttir stendur með aðra hönd á mjöðm en framan við hana til hægri situr flötum beinum Viktor Pétursson en við hlið hennar í ljósblárri peysu er Jóhannes William Grétarsson. Aftan við Viktor, í brúnleitu vesti, er Þorlákur Guðjónsson og aftan við hann til vinstri er Írena Rúnarsdóttir. Sitt hvoru megin við Írenu eru systkin, Jósep ? og Sara? Aftan við Hildi Ingu til vinstri er Ólafur Magnússon og vinstra megin við hann, í rauðum kjól, er Þóra Ágústsdóttir. Stúlkan í dökk bláa kjólnum sitjandi til vinstri er Bergþóra Hrönn Guðjónsdóttir og á endanum til vinstri við Bergþóru sér í Salóme Ýr Rúnarsdóttur. Aftan við Bergþóru, með fingurinn við munninn, er Auðna Ýrr Oddsdóttir. Konan vinstra megin er óþekkt en hún heldur á Björgvin Ragnarssyni. Framan við hana örlítið hægra megin er María Jóna Gunnarsdóttir. Konan hægra megin er Bára Þorvaldsdóttir með Elínu Ósk Ómarsdóttur í fanginu og leggur hönd á höfuð Kolbrúnar Jennýar Ragnarsdóttur. Aðrir á myndinni eru óþekktir en ef þú þekkir eitthvert þeirra vinsamlega sendu okkur þá athugasemd.

Bæjarmálafundur í dag 12. mars Nú er boðað til fundar í Bæjarmálafélaginu, kl. 18.00 þann 12. mars. Fundarstaður er Félagsheimilið Fellsborg, „rauði salurinn“ Markmið félagsins er að ræða allt sem varðar samfélagið okkar. En í þetta skiptið einbeitum við okkur sérstaklega að íþrótta og útivistarmálum: Sundlaug: eigum við að byggja nýja? Er sundlaugin sem við eigum nóg? Gönguleiðir: þarf eitthvað að ræða það? Aðstaða til íþróttaiðkunar í heild sinni. Er eitthvað annað sem við þurfum að ræða og gætum nefnt á þessum fundi og skoðað betur á næstu fundum? Samfélagið erum við sem eigum heima hér og auðvitað höfum við áhuga á að allt sé sem best og skemmtilegast. Endilega gefið ykkur smá tíma og látið sjá ykkur. Bæjarmálafélagið

Ráðstefna um lífrænan úrgang Gunnarsholti á Rangárvöllum 20. mars 2015 kl. 10-17 Fjallað verður á margvíslegan hátt um þá möguleika sem felast í nýtingu lífræns úrgangs, meðal annars til skógræktar og landgræðslu. Í hádegishléi verður í boði léttur málsverður. Viðfangsefni ráðstefnunnar er nýting þeirra verðmæta sem felast í lífrænum úrgangi. Fjallað verður um hugtökin úrgang og hráefni og farið yfir stöðuna hérlendis, hvaða farvegir eru fyrir lífrænan úrgang og um lausnir sem notaðar eru á ýmsum stöðum á landinu. Rætt verður um lög og reglugerðir í nútíð og framtíð, þróun vinnslutækni og nýtingar, stefnumótun hjá ríki og sveitarfélögum og hver skuli draga vagninn í þessum efnum. Sömuleiðis verða sagðar reynslusögur af ræktun með hjálp lífræns úrgangs, lífrænni ræktun í Skaftholti í Skeiða- og Gnúpverjahreppi, notkun kjötmjöls í Hekluskógum og landgræðslu með kjötmjöli og gor. Fyrirlesarar eru úr ýmsum áttum. Nefna má Stefán Gíslason, umhverfis­stjórnunar­fræð­ing hjá Environice, sem svarar spurningunni um hvers vegna sveitarfélag ætti að velta líf­rænum úrgangi fyrir sér, Björn Hafsteinn Halldórsson, framkvæmdastjóri Sorpu, segir frá nýrri gas- og jarðgerðar­stöð á höfuðborgarsvæðinu, Teitur Guðmundsson hjá Mannviti fjallar um umhverfisáhrif nýtingar, Elsa Ingjaldsdóttir hjá Heilbrigðiseftirliti Suðurlands og Guðrún Lind Rúnarsdóttir hjá Mast fjalla um hvað má og má ekki. Einnig ávarpar Sigrún Magnús­dóttir umhverfisráðherra ráðstefnuna. Sjá nánar í dagskrá ráðstefnunnar. Aðstandendur ráðstefnunnar eru Sorpurðun Vesturlands, Molta ehf. Samband íslenskra sveitarfélaga og Samtök sunnlenskra sveitarfélaga ásamt Landgræðslu ríkisins og Skógrækt ríkisins. Ágúst Sigurðsson, sveitarstjóri Rangárþings ytra, verður ráðstefnustjóri. Rútuferð verður í boði frá BSÍ ef nógu margir sækjast eftir því. Takið fram í tölvupósti til Eddu ef þið hafið áhuga á að nýta rútuferð. Látið verður vita 19. mars hvort af rútuferðinni verður. Rétt er að hvetja sem flesta til að nýta sér rútuna til að draga úr mengun Farið kostar 3.500 kr. Skráning fer fram í tölvupósti til Eddu Linn Rise á netfangið eddalinn@land.is. Þátt­tak­endur eru beðnir að skrá sig sem fyrst og í allra síðasta lagi 17. mars. Þetta gildir bæði um skráningu á ráðstefnuna og í rútuna. Undirbúningsnefndina skipa: Eiður Guðmundsson formaður Hrefna B. Jónsdóttir – Sorpurðun Vesturlands Lúðvík Gústafsson – Sambandi íslenskra sveitarfélaga Magnús H. Jóhannsson – Landgræðslu ríkisins Ólöf Jósefsdóttir – Moltu ehf. Pétur Halldórsson – Skógrækt ríkisins Þórarinn Egill Sveinsson – SASS, Samtökum sunnlenskra sveitarfélaga Dagskrá 9.30 Skráning gesta, morgunkaffi og horft til himins. Allt að 98% deildarmyrkvi á sólu í Gunnarsholti kl. 9.37 10.00 Gestir boðnir velkomnir – Sveinn Runólfsson landgræðslustjóri 10.05 Setning ráðstefnunnar – fulltrúi vinnuhóps 10.15 Úrgangur eða hráefni, úrgangur í dag, neysluvara á morgun – Lúðvík E. Gústafsson Sambandi íslenskra sveitarfélaga 10.45 Nýting lífræns úrgangs. Staðan um þessar mundir a. Farvegir og straumar – Eiður Guðmundsson b. Lausnir á Suðurlandi, Orkugerðin – Guðmundur Tryggvi Ólafsson 11.30 Af hverju ætti sveitarfélag að velta lífrænum úrgangi fyrir sér? – Stefán Gíslason Environice 12.00 Hádegismatur 13.00 Ávarp Sigrúnar Magnúsdóttur umhverfisráðherra 13.20 Lög og reglugerðir á mannamáli. Hvað má og hvað má ekki? – Elsa Ingjaldsdóttir Heilbrigðiseftirliti Suðurlands, Guðrún Lind Rúnarsdóttir MAST 13.40 Ný gas- og jarðgerðarstöð á höfuðborgarsvæðinu – Björn Hafsteinn Halldórsson Sorpu 14.00 Vinnslutækni, nýting og umhverfisáhrif. – Teitur Gunnarson Mannviti 14.20 Stefnumótun hjá ríki og sveitarfélögum. Hver á að draga vagninn? – Laufey Guðmundsdóttir, lögfræðingur í umhverfis- og auðlindaráðuneytinu, Lúðvík E. Gústafsson, Sambandi íslenskra sveitarfélaga 14.50 Reynslusögur a. Lífræn ræktun í Skaftholti b. Hekluskógaverkefnið c. Landgræðsla með kjötmjöli og gor 15.20 Kaffi 15.40 „Er ekki tími til kominn að tengja?“ Verkefni og hugmyndir í gangi a. Verkefni UST. Öflun upplýsinga um lífrænan úrgang. Styrkt af norrænu ráðherranefndinni – Guðrún Lilja Kristinsdóttir Umhverfisstofnun b. Verkefni Landgræðslunnar í nýtingu lífræns úrgangs – Magnús H. Jóhannsson Landgræðslunni c. Hagkvæmni metanframleiðslu – Dofri Hermannsson Íslenska gámafélaginu 16.30 Pallborðsumræður – Guðrún Lind Rúnarsdóttir, Lúðvík E. Gústafsson, Stefán Gíslason og Teitur Gunnarsson 16.50 Ráðstefnuslit, samantekt

Daglegt líf að sumri. Myndin er af tveim óþekktum börnum á sumardegi á Skagaströnd. Fyrir aftan þau til vinstri er assistantastofan, sem var íbúðarhús verslunarmannsins sem sá um verslunina við hliðina. Næst assistantastofunni er pakkhúsið og svo verslunarhúsið fremst. Húsið á bak við með svartan gafl er Sæmundsenbúð. Þessi hús stóðu ekki langt frá Einbúanum á svæðinu nálægt því þar sem Skátaskálinn stendur í dag. Evald Hemmert tók myndina en samkvæmt "Byggðin undir Borginni" (bls 118 - 119) var hann verslunarstjóri Höpnhnersverslunar þarna frá 1891 fram yfir 1920 þegar verslunin lagði upp laupana. Sennilega hefur því myndin verið tekin einhverntíma kringum aldamótin 1900.

Sveitarfélagið Skagaströnd auglýsir eftir umsóknum um að leigja og reka Kaffi- og menningarhúsið Bjarmanes á Skagaströnd. Húsið er laust til afnota og í því er búnaður til reksturs kaffihúss. Bjarmanes er fallegt steinhús, byggt 1913 en var allt endurbyggt 2004, og hefur þann einstaka anda sem einkennir mörg gömul hús. Það stendur miðsvæðis með góðu útsýni yfir höfnina og Húnaflóann. Umsóknum skal skilað á skrifstofu Sveitarfélagsins Skagastrandar fyrir 25. mars 2015 þar sem m.a. komi fram hugmyndir umsækjanda um reksturinn. Umsóknum má einnig skila rafrænt á netfangið magnus@skagastrond.is Fyrir hönd sveitarstjórnar, Magnús B. Jónsson sveitarstjóri.

Eyrarrósin er viðurkenning fyrir framúrskarandi menningarverkefni á starfssvæði Byggðastofnunar. Markmið Eyrarrósarinnar er að beina sjónum að og hvetja til menningarlegrar fjölbreytni, nýsköpunar og uppbyggingar, á sviði menningar og lista. Það eru Byggðastofnun, Flugfélag Íslands og Listahátíð í Reykjavík sem staðið hafa saman að verðlaununum frá upphafi árið 2005. Valnefnd, skipuð fulltrúum Byggðastofnunar, Listahátíðar í Reykjavík og Flugfélags Íslands ásamt einum menningarfulltrúa á starfssvæði Byggðastofnunar; tilnefnir þrjú verkefni og hlýtur eitt þeirra Eyrarrósina. Handhafar Eyrarrósarinnar frá upphafi: Þjóðlagahátíðin á Siglufirði (2005) LungA, Listahátíð ungs fólks á Austurlandi (2006) Stranda­galdur á Hólmavík (2007) Rokkhátíð alþýðunnar; Aldrei fór ég suður (2008) Landnámssetur Íslands (2009) Bræðslan á Borgarfirði eystra (2010) Sumartónleikar í Skálholtskirkju (2011) Safnasafnið á Svalbarðsströnd (2012) Skaftfell, miðstöð myndlistar á Austurlandi (2013) Áhöfnin á Húna (2014) Listi yfir þau tíu verkefni sem eiga möguleika á því að hljóta Eyrarrósina í ár hefur verið birtur. Í ár barst mikill fjöldi umsókna um Eyrarrósina hvaðanæva af landinu. Eyrarrósarlistinn 2015 birtir nöfn þeirra tíu verkefna sem eiga möguleika á að hljóta Eyrarrósina í ár. Þann 18. mars næstkomandi verður tilkynnt hvaða þrjú verkefni hljóta tilnefningu til verðlaunanna. Eitt þeirra hlýtur að lokum Eyrarrósina, 1.650.000 krónur og flugferðir innanlands frá Flugfélagi Íslands en hin tvö verkefnin hljóta peningaverðlaun og flugferðir frá Flugfélagi Íslands. Eyrarrósarlistinn 2015 * Braggast á Sólstöðum * Ferskir vindar * Frystiklefinn * Listasafn Árnesinga * Listasafnið á Akureyri * Nes Listamiðstöð * Orgelsmiðjan á Stokkseyri * Verksmiðjan á Hjalteyri * Þjóðlagasetrið á Siglufirði Eyrarrósin verður afhent með viðhöfn laugardaginn 4.apríl næstkomandi á Ísafirði. Að venju mun Dorrit Moussaieff forsetafrú, verndari Eyrarrósarinnar, afhenda verðlaunin.

Við afgreiðslu fjárhagsáætlunar 2015 tók sveitarstjórn Skagastrandar ákvörðun um að veita styrki til nemenda á framhalds- og háskólastigi sem nemur 20 þús. kr. skólaárið 2014-2015 en styrkirnir eru veittir til jöfnunar á námskostnaði fjarri heimabyggð. Umsóknum um styrki skal skilað til skrifstofu sveitarfélagsins fyrir 31. mars 2015. Umsóknir sem berast eftir umsóknarfrest verða ekki teknar til greina. Nemendur á framhalds- og háskólastigi sem eiga lögheimili á Skagaströnd og fullnægja skilyrðum í reglum um styrkina eiga rétt á umræddum námsstyrk Nánari upplýsingar veittar á skrifstofu sveitarfélagsins og á heimasíðunni http://www.skagastrond.is/samthykktir.asp og þar má einnig fá/finna umsóknareyðublöð. Reglur um styrkina má finna hér. Umsókn um styrk má finna hér. Aksturstyrkur vegna dreifnáms Jafnframt er auglýstur frestur til 1. maí 2015 til að sækja um sérstakan stuðning vegna dreifnáms fyrir vorönn 2015. Sveitarstjórn samþykkti Reglur um stuðning vegna dreifnáms veturinn 2014-2015 á fundi 12. september 2014 og vísast til þeirra á heimasíðu sveitarfélagsins. Reglur um dreifnámsstyrki Umsókn um styrk vegna dreifnáms Sveitarstjóri

Á fundi sveitarstjórnar 25. febrúar 2015 voru samþykktar reglur um frístundakort ásamt umsóknareyðublaði. Frístundakortið sem hefur verið í boði frá 2006 byggir á því að foreldrar barna með lögheimili á Skagaströnd eiga rétt á 15 þúsund króna styrk, fyrir hvert barn á grunnskólaaldri, sem þátt tekur í íþrótta- og æskulýðsstarfi. Tilgangur frístundakorta er að hvetja börn og unglinga til þátttöku í hvers konar íþrótta- og æskulýðsstarfi og að jafna möguleika foreldra til að börnum sé það mögulegt. Frístundakortin taka gildi 1. janúar ár hvert og gilda í eitt ár. Skil á gögnum vegna frístundaþátttöku síðastliðins árs er í síðasta lagi 31. janúar næsta árs. Eftir það fellur réttur þess árs niður. Þegar greitt hefur verið fyrir það námskeið eða starf sem grunnskólabarn vill eða hefur tekið þátt í, er farið með kvittunina á skrifstofu sveitarfélagsins þar sem sótt er um frístundakort. Fjárhæð sem nemur verðgildi frístundakorts verður síðan endurgreidd vegna viðurkennds frístundastarfs. Reglur um frístundakort Umsóknareyðublað