Fiskmarkað Íslands hf. vantar starfskraft á Skagaströnd: Starfssvið er m.a. þjónusta við viðskiptavini, seljendur og kaupendur, löndun ofl. Viðkomandi er ætlað að vera hægrihönd stöðvarstjóra og getað leyst hann af. Viðkomandi þarf að hafa lyftararéttindi og hæfni til þess að læra á tölvukerfi fyrirtækisins. Æskilegt væri að viðkomandi hefði þekkingu og starfsreynnslu í sjávarútvegi og einnig vigtarréttindi en ekki skilyrði. Umsóknarfrestur um starfið er til 12. ágúst n.k. og skal umsóknum skilað skriflega til Fiskmarkaðs Íslands hf, bt/ Reynis Lýðssonar 545 Skagaströnd sem jafnframt veitir upplýsingar um starfið í síma 840-3749 og Páll í síma 840-3702

Atvinna í boði! Stuðningsfulltrúa vantar í 45 – 85 % starfslutfall á yngsta – og miðstig og í Frístund Vinnutími: virkir dagar frá kl 8 og fram að eða yfir hádegi og/eða til kl 16:00. Umsækjendur þurfa að hafa gaman af að vinna með börnum, vera þolinmóðir, ákveðnir og sjálfstæðir í starfi. Umsóknir berist á skrifstofu Sveitarfélagsins Skagastrandar eða á netfangið hofdaskoli@skagastrond.is fyrir mánudaginn 4. ágúst 2014. Hægt er að nálgast umsóknareyðublöð á skrifstofu sveitarfélagsins eða á www.skagastrond.is Nánari upplýsingar eru veittar á skrifstofu sveitarfélagsins. Skólastjóri

Mun Höfðinn „týnast“? Hvað ætlar nýja sveitarstjórnin að gera? Á Höfðanum er afar fallegt útivistarsvæði eins og Skagstrendingum er vel kunnugt. Allskonar gróður er þar að finna ásamt töluverðu fuglalífi og afar sérstakri bergmyndun víðast hvar. En ákveðið vandamál er að búa um sig á Höfðanum. Lúpínan er komin þangað og á hverju ári leggur hún undir sig meira og meira svæði. Ég býst ekki við að það sé hægt að ráða við hana í hlíðinni við Réttarholt en það má stöðva hana þar. En á hinn bóginn er hún farin að dreifa sér víða annarsstaðar um Höfðann. Á flestum stöðum er hún þó á afar takmörkuðum svæðum og sumsstaðar bara eitt og eitt blóm en þeim fjölgar ár frá ári og byrja að mynda stærri flekki. Það er ekki auðvelt að hamla vexti og útbreiðslu lúpínu en það er hægt en til þess þarf markvissar aðgerðir sem þurfa að standa yfir í nokkur ár. Á nokkrum friðuðum svæðum á Íslandi hafa menn háð harða glímu við lúpínuna m.a. í þjóðgarðinum í Skaftafelli og nokkur sveitarfélög eru líka í þessari baráttu. Ef ekkert verður að gert mun lúpínan leggja undir sig og kæfa allan núverandi gróður á Höfðanum. Þá mun þessi fallega útivistarparadís glata mörgum sérkennum sínum auk þess sem Höfðinn verður ekki auðveldur yfirferðar eins og þeir vita sem ganga á þeim svæðum sem lúpínan hefur yfirtekið. Það þarf að rífa lúpínuna upp með rótum þar sem hún er að byrja að nema land. Einnig að halda áfram að slá þau svæði þar sem hún hefur myndað flekki en það hefur verið gert í nokkur ár. Þessir flekkir stækka samt og það þarf að öllum líkindum að eitra þar líka. Enn er sá tími að það má koma í veg fyrir að lúpínan eyðileggi náttúrufegurð Höfðans. Verði brugðist við strax má uppræta hana og bjarga Höfðanum. Ég legg til að sveitarstjórnin ákveði nú þegar stefnu til 4ra ára þar sem markvisst verði tekið á þessu máli og byrjað strax í ár. Það væri t.d. hægt að setja á stofn 3ja manna vinnuhóp sem í umboði sveitarstjórnar myndi kynna sér allt sem viðkemur árangurríkum aðferðum til eyðingar lúpínu og hefði jafnframt frumkvæði og ábyrgð á því að málið verði tekið föstum tökum. Fegurð og útivistargildi Höfðans er í stórhættu. Það þarf að bregðast við strax. LÆG

Samkvæmt upplýsingum frá Aðalbjörgu Hafsteinsdóttur, Ara E. Jónssyni og Eygló Gunnarsdóttur eru konurnar á myndinni þær Ásta Brynhólfsdóttir (f.1912 - d.1997) til vinstri en hún var gift Alfreð Kristjánssyni (f. 1920). Þau komu bæði frá Hrísey. Þau hjón áttu eina kjördóttur Sigurveigu (f.1951) og er hún í fangi móður sinnar. Konan hægra megin við séra Pétur er Sigurlaug Helgadóttir (f.1916 -d. 2009) sem var gift Gunnari Grímssyni (f.1907 -d.2003) en hann var kaupfélagsstjóri á Skagaströnd um einhver ár. Kjörsonur þeirra er Gunna Gauti (f. 1952) dýralæknir og er það hann sem er í fangi móður sinnar. Myndin var að öllum líkindum tekin 1952 við skírn þeirra Sigurveigar og Gunnars Gauta. Ljósmyndasafnið þakkar þeim Aðalbjörgu, Ara og Eygló kærlega fyrir hjálpina.

Norrænt vinabæjamót var haldið á Skagaströnd dagana 3.-5. júlí sl. Skagaströnd hefur í 25 ár verið í vinabæjakeðju með Aabenraa í Danmörku, Lohja í Finnlandi, Ringerike í Noregi og Växjö í Svíþjóð. Samhliða vinabæjatengslum sveitarfélaganna eru norrænu félögin í þeim með vinabæjatengsl innbyrðis. Vinabæjamót eru haldin á tveggja ára fresti til skiptis í sveitarfélögunum og eru því á 10 ára fresti á hverjum stað. Sú hefð hefur skapast að bjóða til til vinabæjamóta þremur pólitískum fulltrúum, einum „starfsmanni“ við vinabæjasamskipti og einum fulltrúa norræna félagsins. Öllum með mökum. Hópur gesta getur því farið upp í um 40 manns. Í ár ákvað bæjarráð Aabenraa að afþakka boð um þátttöku og mun taka samstarfið til nánari skoðunar seinna á árinu. Frá öðrum vinabæjum komu 8-9 manns auk fulltrúa norræna félagsins í Aabenraa og voru gestir mótsins því 28. Dagskrá fyrir gesti mótsins var upphaflega miðuð við að bjóða upp á talsverða útivist og vera í nánu sambandi við íslenska náttúru. Þegar leið að mótinu kom hins vegar í ljós að veður myndi ekki gefa mikið færi á slíku þar sem mótsdagana gekk á með norðan allhvössu veðri og úrhellisrigningu. Dagskráin beindist því fyrst og fremst að því að kynna menningu og strauma í Austur Húnavatnssýslu. Fyrri mótsdaginn var Laxasetur Íslands og Heimilisiðnaðarsafnið skoðuð og farið í heimsókn í púðagerðina Lagð að Hólabaki og í Þingeyrarkirkju. Norræna félagið bauð svo til kvöldverðar þar sem fiskréttir voru í aðalhlutverki. Seinni mótsdaginn var haldinn fundur um það helsta sem er að gerast í sveitarfélögunum og um framtíð vinabæjasamstarfsins. Þar var lýst mörgum áhugaverðum verkefnum sveitarfélaganna og á fundi um samstarfið var mjög eindreginn vilji fulltrúanna til að halda því áfram. Eftir fundinn var farið í heimsókn í Rannsóknarsetur HÍ, BioPol, Spákonuhof og í Nes listamiðstöð. Um kvöldið var svo hátíðarkvöldverður þar sem mótinu var formlega slitið. Þrátt fyrir erfiðar veðuraðstæður þótti mótið takast vel og hinir norrænu gestir lýstu ánægju sinni með það. Í samstarfinu kemur oft fram hve mikill munur er á stærð Skagastrandar og hinna vinabæjanna í keðjunni þar sem íbúar eru um 30-40 þús. og í þeim stærsta, Växjö eru íbúar 85 þús. Það er því eðlilega talsverður munur á verkefnum og umfangi þeirra en á mótinu kom vel fram mikill áhugi gestanna á íslensku samfélagi, ekki síst vinabæ þeirra Skagaströnd. Skýrslu um mótið á sænsku má finna hér

Ef þú, lesandi góður, þekkir einhver deili á þessari mynd langar mig að biðja þig að senda mér póst eða hafa samband við mig. Netfangið er olibenna@hi.is en símanúmerið mitt er 8993172. Fyrirfram þakkir. Ólafur B. hjá Ljósmyndasafni Skagastrandar. Pétur og tvær óþekktar konur Ekki er vitað hvar né hvenær myndin var tekin en á henni er séra Pétur Þ. Ingjaldsson (d. 1.6.1996) með tveimur óþekktum konum með nýskírð börn. Ef þú veist hverjar konurnar eru og e.t.v. börnin vinsamlega sendu okkur þá athugasemd.

Rafmagnsnotendur Austur Húnavatnssýslu Rafmagnslaust verður á Blönduósi, Skagaströnd og dreifbýli aðfaranótt föstudagsins 11.júlí n.k. frá miðnætti og fram eftir nóttu vegna vinnu við raforkukerfið. RARIK Norðurlandi.

Kristján í heyskap Ekki er vitað hvenær þessi mynd var tekin en á henni er Kristján Guðmundsson (d.16.4.1979) frá Háagerði í heyskap á túninu við Háagerði. Á myndinni er Kristján að ýta saman heyi með tveimur hestum eftir að hafa rakað heyinu saman í garða. Spýta var bundin aftan í hestana og síðan var staðið á spýtunni til að halda henni niðri. Hestarnir drógu svo spýtuna þar til næg hrúga af heyi var komin framan við hana. Þá var spýtunni lyft yfir hrúguna og haldið áfram framan við hana. Síðan var heyinu úr hrúgunum hlaðið upp í sæti/sátur eins og sést fyrir aftan Kristján. Seinna var svo heyinu ekið heim í hlöðu eða sett í fúlgu heim við fjárhús eða fjós. Hlutverk hesta í sveitum landsins hefur breytst mikið frá þessum tíma úr því að vera þarfasti þjónninn og helsta vinnutæki bænda yfir í það að vera fyrst og fremst skemmtigripur og skrautfjöður eiganda síns.

Leikskólinn Barnaból á Skagaströnd auglýsir eftir leikskólastjóra frá og með næsta skólaári. Leikskólinn er 30 – 40 barna, tveggja deilda skóli sem ætlar að innleiða starfshætti í samstarfi við Hjallastefnuna ehf. Nánari upplýsingar um leikskólann er m.a. að finna á http://skagastrond.is/leikskoli.asp Við leitum að jákvæðum einstaklingi sem er tilbúinn að taka þátt í innleiðingu á Hjallastefnunni þar sem metnaður, gleði og kærleikur er hafður að leiðarljósi. Viðkomandi þarf að vera leikskólakennari eða hafa aðra uppeldismenntun, sýna sjálfstæði í vinnubrögðum og hafa brennandi áhuga á jafnrétti og lýðræði í leikskólastarfi. Skólar Hjallastefnunnar starfa að sameiginlegum markmiðum eftir sömu hugmyndafræði en sjálfstæði hvers skóla er mikið. Jafnréttisuppeldi, skapandi hugsun, félagsþjálfun og einstaklingsstyrking eru innviðir hugmyndafræðinnar sem við teljum að geti skipt sköpum í þroska komandi kynslóða. Áhugasamir hafi samband við Áslaugu Huldu Jónsdóttur, aslaug@hjalli.is eða Magnús B. Jónsson í síma 455 2700, magnus@skagastrond.is Sveitarfélagið Skagaströnd, Hjallastefnan ehf

Á fundi sveitarstjórnar Skagastrandar 2. júlí 2014 var samþykktur samningur við Hjallastefnuna ehf. Í honum kemur fram að Hjallastefnan og sveitarfélagið Skagaströnd geri með sér samkomulag þar sem Hjallastefnan veiti leikskólanum Barnaból faglega ráðgjöf, kemur að breytingum og aðstoðar við innleiðingu á starfsháttum, umhverfi og aðferðum Hjallastefnunnar. Hjallastefnan ehf og sveitarfélagið Skagaströnd munu auglýsa sameignlega eftir skólastjóra leikskólans Barnabóls og starfsmenn Hjallastefnunnar munu sömuleiðis aðstoða við ráðningu skólastjóra og endurskipulagningu á starfsmannahaldi. Við innleiðingu Hjallastefnunnar mun Hjallastefnan leggja til ráðgjafa og aðra sérfræðinga eftir þörfum, standa fyrir námskeiðum og fræðslu til starfsmanna og sinna upplýsingagjöf til forráðamanna. Rekstur skólans og ábyrgð verður áfram hjá sveitarfélaginu en markmið samkomulagsins er að rekstur leikskólans færist yfir til Hjallastefnunnar um áramótin 2014-2015 en eigi síðar en 1. ágúst 2015. 2. júlí 2014 Sveitarstjóri