Sunnudagaskólinn og messan sameinast í kirkjurýminu og hentar öllum aldurshópum. Það er yndislegt að eiga fallega morgunstund í kirkjunni. Taka undir í söng. Hlusta á gefandi Biblíusögu, horfa á leikþætti og biðja fallegra bæna. Prestur leiðir stundina ásamt fermingarbörnum, leikhóp-TTT og sunnudagaskólabörnum. Börn úr Tónlistarskóla A-Hún. leika á hljóðfæri og syngja. Þau eru Arna Rún Arnarsdóttir, Ísak Andri Jónsson og Sigríður Kristín Guðmundsdóttir. Hugrún Sif Hallgrímsdóttir leikur á flygilinn og félagar úr kór Hólaneskirkju leiða söng. Að messu lokinni er boðið upp á veitingar á kirkjuloftinu. Bryndís Valbjarnardóttir, sóknarprestur.

FUNDARBOÐ Fundur verður haldinn í sveitarstjórn Skagastrandar miðvikudaginn 30. janúar 2019 á skrifstofu sveitarfélagsins kl 8:00. Dagskrá: Gjaldskrá sveitarfélagsins 2019 Samningur um endurskoðun Aðalskipulag Framkvæmdir 2019 Byggðasamlag um menningar- og atvinnumál Fundargerð stjórnar 17.12.2018 Fjárhagsáætlun 2019 Ályktun um úrgangsmál Frístundakort fyrir grunnskólanema Efling fyrirtækja og frumkvöðla Bréf Umboðsmanns barna, dags. 17. janúar 2019 Umhverfisstofnunar, dags. 14. desember 2018 Samgöngu- og sveitarstjórnarráðuneytis, dags. 23. janúar 2019 Fundargerðir Tómstunda- og menningamálanefndar 22.01.2018 Stjórnar SSNV, 08.01.19. Stjórnar Sambands ísl. sveitarfélaga, 14. 12. 2018. Önnur mál Trúnaðarmál Sveitarstjóri

Foreldrar barna með lögheimili á Skagaströnd eiga rétt á 15 þúsund króna styrk, fyrir hvert barn á grunnskólaaldri, sem þátt tekur í íþrótta- og æskulýðsstarfi. Frístundakortin ná til starfsemi íþróttafélaga auk hverskonar skipulagðs félags- og tómstundastarfs sem stendur í sex vikur eða lengur og greitt er fyrir með þátttökugjaldi. Þar að auki gildir kortið fyrir aðra tómstundaiðkun, s.s. tónlistar- og listnám.  Frístundakortin taka gildi 1. janúar ár hvert og gilda í eitt ár. Skil á gögnum vegna frístundaþátttöku síðastliðins árs er í síðasta lagi 31. janúar næsta árs. Eftir það fellur réttur þess árs niður.

Af óviðráðanlegum orsökum verðu rannsóknarstofan og myndgreining lokuð mánudaginn 4. febrúar og þriðjudaginn 5. febrúar. Opið verður miðvikudaginn 6. febrúar eins og venjulega og aukalega  fimmtudaginn 7. febrúar. Nánari upplýsingar í síma 4554100  Heilbrigðisstofnun Norðurlands/Blönduósi

1st. OPIÐ HÚS 2019! sunnudagur 27 janúar kl 14.00 - 16.00 Before it gets dark, come by the Nes studios to start the year off with some creative inspiration! Many works by our international artists are reflections of you, your environment and place here, in Skagaströnd and Iceland :)

Í janúar 2019 eru 80 ár frá skiptingu Vindhælishrepps hins forna í þrjú sveitarfélög sem gerð var um áramótin 1938-1939 og var upphaf Höfðahrepps sem í dag heitir Sveitarfélagið Skagaströnd. Þéttbýlið á Skagaströnd er auðvitað töluvert eldra og má í því sambandi benda á að íbúar á Skagaströnd voru um 60 um aldamótin 1900 og þá voru 15 hús á staðnum. Verslunarstaðurinn Skagaströnd er enn eldri því elstu heimildir benda til þess að verslun hafi verið hafin hér fyrir setningu einokunarverslunar 1602 því Skagaströnd varð einmitt einn af þeim illa þokkuðu einokunarverslunarstöðum danskra kaupmanna í þau 185 ár sem hún stóð fram til 1787. Vindhælishreppur hinn forni náði allt frá Skagatá og fram að Kirkjuskarði á Laxárdal. Það tók því að bera á því strax árið 1872, þegar farið var að skipa hreppsnefndir að það þótt langt að sækja fundi fyrir þá sem bjuggu næst endum hreppsins. Hugmyndir um að skipta gamla Vindhælishreppi ná þó enn lengra aftur og hægt að rekja heimildir um þær hugmyndir aftur til ársins 1806. Þá var aðallega talað um að skipta hreppnum í tvo hluta og nefna þá eftir kirkjusóknum Höskuldstaðahrepp og Hofshrepp. Þorpið á Skagaströnd fór svo að vaxa, einkum á þriðja og fjórða áratug 20. aldar. Þá voru komnar vélar í bátana, búið að steypa fyrstu bryggjuna og raunverulegar hafnarframkvæmdir að hefjast þegar gerður var garður úr landi og út í Spákonufellsey, en vinna við það hófst 1935. Þegar þarna var komið sögu voru góðbændur í sveitarfélaginu sem voru helstu útsvarsgreiðendur orðnir mjög áhyggjufullir vegna vaxandi íbúafjölda í þorpinu sem þeir sáu ekki fram á að gætu framfleytt sér. Þá var einnig skollin á heimskreppa og ágreiningur milli sveitar og þorps fóru vaxandi. Í hreppsnefndarkosningum 1937 náðu þorpsbúar svo meirihluta í hreppsnefndinni og þá virðist flestum verða ljóst að nauðsynlegt væri að skipta hreppnum upp og eingöngu talað um þrjá hreppa. Meðal þeirra mála sem tekist var á um milli hreppshlutanna var ómagaframfærsla og hve mikið land ætti að fylgja þorpinu. Eftir allnokkur fundahöld í öllum nýju hreppshlutunum og störf skiptanefndar fékkst niðurstaða í landsstærðina sem enn gildir og að ómagaframfærslan skyldi vera sameiginlega í sjö ár eftir skiptingu. Auðvitað voru mörg fleiri úrlausnarmál en þeim var öllum fundinn nýr farvegur. Nýju sveitafélögin áttu að heita Vindhælishreppur, Höfðahreppur og Skagahreppur.  Skipting hreppsins í þrjá hreppa var rædd á fundi hreppsnefndar á þorláksmessu 1938 og þá var ákveðið að aðskilnaður hreppanna tæki gildi 1. janúar 1939 kosning nýrra hreppsnefnda skyldi fara fram 15. janúar 1939. Í þeirri ágætu bók Byggðin undir Borginni segir svo í niðurlagi umfjöllunar um hreppaskiptinguna: „Ekki munu allir íbúar hreppsins hafa fagnað þessari niðurstöðu; um það vitnar til dæmis vísa Vilhjálms Benediktssonar frá Brandaskarði:             Ekki prísa ég ykkar mennt sem að því verki stóðu að sundur flísa og saga í þrennt sveitina mína góðu.   Um áramót 1938-1939 gengu kauptúnsbúar til hvílu í Vindhælishreppi vitandi að þeir myndu vakna upp í nýju sveitarfélagi að morgni án þess að hreyfast úr stað. Er ekki að efa að með ýmsum hafa tilfinningar verið blendnar; hvernig myndi þessu fámenna og fátæka sveitarfélagi farnast? Framhjá því varð ekki litið að margir innbúar hins nýja Höfðahrepps lágu við sveit. En ýmis teikn voru á lofti um betri tíð. Skammt undan voru fengsæl fiskimið og silfur hafsins, síldin, óð á hverju sumri inn allan Húnaflóa.“ Nafni sveitarfélagsins var svo breytt úr „Höfðahreppur“ í „Sveitarfélagið Skagaströnd“ eftir atkvæðagreiðslu um nafnabreytinguna samhliða sveitarstjórnarkosningum 2006. Skagaströnd í janúar 2019 Magnús B. Jónsson

Þórdísarganga 5. júlí 2008 var farin Þórdísarganga á Spákonfellsborg á vegum  Spákonuhofsins á Skagaströnd.  Leiðsögumaður var Ólafur Bernódusson en milli 60 og 70 manns  á aldrinum 6 til 74 ára kom með í gönguna í blíðu veðri.  Að fjallgöngunni lokinni beið göngufólksins kaffiveisla í golfskálanum  á vegum kvennanna í Spákonuhofinu.  Á myndinni eru þeir Stefán Jósefsson til vinstri og Magnús B. Jónsson  til hægri að njóta veðurblíðunnar uppi á Borgarhausnum.

Í janúar 2019 eru 80 ár frá skiptingu Vindhælishrepps hins forna í þrjú sveitarfélög sem gerð var um áramótin 1938-1939 og var upphaf Höfðahrepps sem í dag heitir Sveitarfélagið Skagaströnd.

Álagning fasteignagjalda 2019 er lokið. Álagningarreglur fasteignagjalda 2019 eru aðgengilegar á heimasíðunni undir „gjaldskrár“.   Greiðslur fasteignagjalda: Eins og undanfarin ár verða ekki sendir greiðsluseðlar vegna fasteignagjalda nema til þeirra sem þess hafa óskað sérstaklega og gildir skráning þeirra sem þess óskuðu á síðasta ári nema nýjar upplýsingar komi fram. Gjalddagar fasteignagjalda eru frá 1. febrúar til 1. júlí, en á smærri upphæðum eru gjalddagar 1 eða 2. (Gjalddagar á 0-5.000 kr. er 1.apríl og 5.001-10.000 skiptist í tvo gjalddaga 1. apríl og 1. maí).   Sorphirðugjald /sorpeyðingargjald Vakin er athygli á að sorphirðugjald er lagt á íbúðir með fastri búsetu en einungis sorpeyðingargjald á sumarhús og íbúðir þar sem ekki er regluleg búseta. Það táknar að sorphirða fer ekki fram þar sem einungis er greitt sorpeyðingargjald. Sama gildir um þær eignir sem ekkert sorphirðu- eða sorpeyðingargjald er lagt á eins og t.d. ferðaþjónustueignir (C-flokkur). Þeir aðilar leysa sjálfir sorphirðu/sorpeyðingu fyrir sína starfsemi með samningum við þjónustuaðila eða öðrum hætti.   Álagningaseðlar: Álagningarseðlar verða ekki sendir út nema þess sé sérstaklega óskað. Hver og einn getur nálgast sína álagningarseðla á vefsíðunni www.island.is undir reitnum „mínar síður“  Innskráning er með kennitölu viðkomandi og íslykli eða rafrænum skilríkjum.   Skrifstofa sveitarfélagsins veitir fúslega upplýsingar og aðstoð til þeirra sem þess óska.   Skagaströnd 24. janúar 2019   Sveitarstjóri

Eygló snyrtistofa hefur aftur hafið starfsemi á Skagaströnd eftir nokkur hlé. Þar er boðið upp á alhliða snyrtingu  sem hefur ekki verið í boði hér að undanförnu. Það er Eygló Amelía Valdimarsdóttir sem á og rekur snyrtistofuna en stofan er í húsnæði Vivu hársnyrtistofunnar. Ekki þarf að efast um að margir fagni þessari auknu þjónustu enda eru einkunnarorð snyrtistofunnar, Geislandi fegurð & vellíðan, lýsandi fyrir það sem fólk sækir á stofuna hjá Eygló. Opnunartími þessa nýja fyrirtækis er eftir samkomulagi en hægt er að hafa samband og panta tíma á facebooksíðunni: www.facebook.com/Eyglósnyrtistofa/  eða í síma 8684482.