Árið 2006 sameinuðust sex stofnanir á sviði íslenskra fræða: Íslensk málstöð, Orðabók Háskólans, Stofnun Árna Magnússonar á Íslandi, Stofnun Sigurðar Nordals og Örnefnastofnun í eina stofnun. Nýja stofnunin heitir Stofnun Árna Magnússonar í íslenskum fræðum.   Heimasíða stofnunarinnar er: www.arnastofnun.is. Við hönnun síðunnar var lögð áhersla á að aðgengi að fjölmörgum gagnasöfnum stofnunarinnar yrði sem best. Allt þetta efni er í eigu þjóðarinnar og mikilvægt að það nýtist sem flestum. Hægra megin á forsíðu heimasíðunnar er listi yfir öll gagnasöfnin. Sérstaklega má benda á nokkur söfn sem ættu að nýtast mörgum:  Beyging orða - nærri því 300 þúsund íslensk orð beygð.  Málfarsbankinn - leiðbeiningar um málfar, rétta beygingu, orðnotkun, merkingu orða o.s.frv.  Orðabanki - upplýsingar um mörg þúsund íslensk íðorð úr tugum safna í ýmsum greinum, t.d. bílorð, raftækniorð, stærðfræði, náttúrufræði, viðskiptafræði o.s.frv.  Ritmálssafn Orðabókar Háskólans - safnið hefur að geyma dæmi um notkun orða í íslenskum ritheimildum á nærri fimm alda tímabili, frá miðri 16. öld til loka 20. aldar. Við efnissöfnunina hefur nær allt prentað mál frá upphafi fram á 19. öld verið lesið og orðtekið svo og mikið frá 20. öld.  Ýmiss konar fróðleikur er á heimasíðunni mönnum til gagns og gamans. Örfá dæmi:   Icelandic online  Ísland og Íslendingar  Orð  Stafsetning og ritreglur  Sögur úr Vesturheimi  Æviágrip; Árni Magnússon – Sigurður Nordal   Örnefni  Það er von þeirra sem að vefnum standa að gögnin á heimasíðunni nýtist sem flestum. Á síðunni má auðvitað einnig finna upplýsingar um stofnunina, rannsóknir, fræðslu og útgáfu sem og viðburði á vegum hennar.  

Út er komin bók um sögu sjómannadagsins á Skagaströnd í 70 ár eða allt frá því að hann var fyrst haldinn hátíðlegur um 1940.   Höfund bókarinnar og útgefandi er Lárus Ægir Guðmundsson. Bókin er 70 bls. að stærð og prýdd 180 gömlum og nýjum ljósmyndum frá margvíslegum atburðum sem tengjast þessum mikla hátíðisdegi Skagstrendinga og raunar Íslendinga allra. Í bókinni er saga hátíðahaldanna rakin allt frá árinu 1939 og fram til dagsins í dag. Þar er að finna frásagnir af hinum ýmsu þáttum í sjómannadagshátíðahöldunum þennan tíma og deginum lýst í máli og myndum.  Í bókinni skrá með myndum yfir alla þá sem fengið hafa heiðurspening sjómannadagsins allt frá árinu 1965 þegar fyrstu sjómennirnir voru heiðraðir.  Í lok bókarinnar sem heitir Sjómannadagurinn á Skagaströnd í 70 ár eru minningar 3ja Skagstrendinga um það hvernig þeir muna þennan dag frá æsku sinni og uppvexti.  Útgáfa bókarinnar er styrkt af Menningarráði Norðurlands vestra. Bókin er til sölu í versluninni Samkaup á Skagaströnd og í Reykjavík má nálgast hana hjá Soffíu í síma 660 0062 og Stefáni í síma 820 6888

Sjómannadagurinn á Skagaströnd verður haldinn hátíðlegur laugardaginn 6. júní. Margt verður í boði en dagskráin hefst kl. 10:30 með skrúðgöngu og endar með stórdansleik í Fellsborg um kvöldið. Kl. 10:30 Skrúðganga frá höfninni til kirkju. Fjölmennum í skrúðgönguna til þess að halda þessari skemmtilegu hefð við, og gefa þessum degi hátíðlegan blæ. Kl. 11:00 Sjómannamessa í Hólaneskirkju. Söngur í þessari athöfn er í höndum kórs sjómanna. Að messu lokinni verður lagður blómakrans við minnismerkidrukknaðra sjómanna til að heiðra minningu þeirra. Kl. 13:15 Skemmtisigling. Foreldrar eru hvattir til að fjölmenna með börn sín. Kl. 14:00 Skemmtun á Hafnarhússplani. Kappróður – leikir. Kl. 15:30 Kaffisala Kaffisala í Fellsborg og Ásta Eggertsdóttir verður með sölusýningu á olíumálverkum frá kl. 15:30-18:30. Kl. 23:00 Stórdansleikur í Fellsborg. Hljómsveitin Ingó og veðurguðirnir leika fyrir dansi.

Sumarið er skollið á með öllum sínum fjölbreytileika og fjölgar nú nokkuð í Nes listamiðstöðinni. Átján manns eru nú við listsköpun á Skagaströnd og hafa þeir sjaldan verið fleiri.  Að þessu sinni eru ellefu manns frá Bandaríkjunum, tveir Þjóðverjar, einn frá Austurríki, einn Finni og einn Frakki og loks einn innlendur.  Particia Tinajero frá Bandaríkjunum, fæst meðal annars við myndlist. Ann Chucvara frá Bandaríkjunum, fæst meðal annars við myndlist. Julia Hectman frá Bandaríkjunum, fæst meðal annars við myndlist. Matthew Rich frá Bandaríkjunum, fæst meðal annars við myndlist. Nadege Druzkowski, hún er frönsk en býr í Englandi og er málari.  Bernadette Reiter, ljósmyndari frá Austuríki Tsehai Johnson  frá Bandaríkjunum fæst meðal annars við myndlist. Julie Poitras Santos frá Bandaríkjunum, fæst meðal annars við myndlist. Katalin Meixner, málari frá Þýskalandi Adriane Wachholz, málari frá Þýskalandi Kreh Mellick, málari frá Bandaríkjunum Ashley Lamb, málari frá Bandaríkjunum Hanneriina Moisseinen, finnskur myndlistarmaður Jung-a Yang, ljósmyndari frá Suður-Kóreu Beth Yarnelle Edwards, ljósmyndari frá Bandaríkjunum Þorgrímur Þráinsson, rithöfundur frá Fróni Skagstrendingar bjóða að sjálfsögðu öllu þessu ágæta fólk velkomna og vonast eftir að dvöl þeirra verði þeim að öllu leyti ánægjuleg og þeim vinnist vel.  

Borgarafundur verður haldinn í félagsheimilinu Fellsborg þriðjudaginn 2. júní nk. kl. 18.00. Fundarefni eru almenn málefni sveitarfélagsins. Skagstrendingar eru hvattir til að mæta. Fyrir hönd sveitarstjórnar Magnús B. Jónsson, sveitarstjóri.

Við skorum á alla – einstaklinga og fyrirtæki að taka höndum saman með sveitarfélaginu að fara í hreinsunar- og fegrunarátak á bænum. Nú hreinsum við og þrífum í kringum heimili okkar og vinnustaði.  Við getum auðveldlega gert bæinn okkar enn betri og fallegri.  Sumarið er komið og við förum að slá garðana, stinga upp beðin, mála húsin og henda rusli og óþörfum hlutum.   Dagana 2. til 5. júní aðstoðar sveitarfélagið við að fjarlægja rusl frá heimilum og vinnustöðum.  Þeir sem vilja nýta sér þjónustuna geta hringt í starfsmenn áhaldahúss í síma 861 4267 eða 866 4582. 

Höfðaskóla var slitið við hátíðlega athöfn í Fellsborg  27. maí.  Ásamt hefðbundinni ræðu skólastjóra kom fram stúlknakór Höfðaskóla, nemendur úr tónlistarskólanum, keppendur í Framsagnarkeppni grunnskólanna í Húnavatnsþingi og nemendur 10. bekkjar voru með kveðjuatriði.   Allir nemendur skólans stigu á svið með sínum umsjónarkennara og tóku við vitnisburði vetrarins.  Hefð er fyrir því að veita nemendum með hæstu meðaleinkunn í 4. og 7. bekk viðurkenningar og voru það í þetta skiptið systkinin Páll og Guðrún Anna Halldórsbörn sem hlutu þær.   Í 10. bekk eru veittar viðurkenningar fyrir góðan námsárangur í íslensku, dönsku og stærðfræði ásamt hæstu meðaleinkunn vetrarins.  Lilja Bjarney Valdimarsdóttir fékk viðurkenningu í íslensku og Sonja Sif Ólafsdóttir fékk viðurkenningar fyrir dönsku, stærðfræði og hæstu meðaleinkunnina.  Í vetur stunduðu 111 nemendur nám við skólann og voru 10 nemendur útskrifaðir úr 10. bekk.   Eftir skólaslitin buðu foreldrar 10. bekkinga börnum sínum og kennurum þeirra upp á veitingar og var það skemmtileg nýbreytni sem við vonumst til að festist í sessi. 

Sýningin Hring eftir hring verður opnuð í Heimilisiðnaðarsafninu á Blönduósi kl. 14 mánudaginn 1. júní (annan í hvítasunnu)  Þetta er samsýning þriggja listakvenna, Helgu Pálínu Brynjólfsdóttur, Kristveigar Halldórsdóttur, og Rósu Helgadóttur. Verkin hafa verið unnið með beinni skírskotun til safngripa í Heimilisiðnaðarsafninu og Halldórustofu. Einnig verður kynnt ný útgáfa á bókinni Vefnaður á íslenskum heimilum á 19. öld og fyrri hluta 20 aldar sem Halldóra Bjarnadóttir tók saman en Heimilisiðanaðarsafnið gefur nú út í endurbættri útgáfu. Bókin verður til sölu í safninu á sérstöku kynningarverði til og með 17. júní. Alexandra Chernyshova mun taka lagið. Aðgangur er ókeypis á opnunina og allir hjartanlega velkomnir. Kaffi og kleinur í boði safnsins. Við hvetjum konur sem eiga íslenskan búning að klæða sig uppá og heimsækja safnið á opnunardaginn. Heimilisiðnaðarsafnið verður opið alla daga frá 1. júní til 31. ágúst frá kl. 10.00-17.00.  

Undirritaður hefur verið samningur milli Sveitarfélagsins Skagastrandar og Háskóla Íslands um þriggja ára uppbyggingu rannsókna- og fræðaseturs á Skagaströnd. Það er Stofnun fræðasetra Háskóla Íslands og Miðstöð munnlegrar sögu sem standa að samningnum. Setrið heitir Rannsókna- og fræðsetur HÍ á Norðurlandi vestra og verður væntanlega í daglegu tali nefnt Fræðasetrið.  Markmiðið með því eru þessi: Að verða öflug rannsóknastöð um sagnfræði, einkum á sviði munnlegrar sögu og samtímasögu á Norðurlandi vestra. Að vera starfsvettvangur fræðimanna sem m.a. koma frá samstarfsaðilum setursins. Að innleiða nýja hugsun, tækni og vinnubrögð í menntun og þróunarstarfi á Norðurlandi vestra og stuðla að samstarfi menningarstofnana á svæðinu. Að fá til lengri eða skemmri dvalar fræði- og vísindamenn sem jafnframt því að stunda ritstörf eða rannsóknir koma að menningu, menntun eða þjónustu á svæðinu. Að stuðla að háskólakennslu á Norðurlandi vestra í samstarfi við menntastofnanir. Sérsviði Fræðasetursins er munnleg saga þar sem áhersla er lögð á söfnun, skráningu, varðveislu og rannsóknir á munnlegum heimildum. Á aukafjárlögum 2008 var samþykkt 9 milljón króna framlag til stofnunar Fræðasetursins skv. tillögum Norðvesturnefndar 2008. Gert er ráð fyrir að hliðstætt framlag komi áfram á fjárlögum á samningstímanum og er það forsenda rekstursins. Framlag samningsaðila verður sem hér segir fyrstu þrjú ár samningsins: Háskóli Íslands rekur setrið sem hluta af Stofnun fræðasetra Háskóla Íslands. Hann leggur til almenna þjónustu og aðgengi að stjórnsýslu og faglegri þekkingu Stofnunar fræðasetra HÍ og Háskóla Íslands. Miðstöð munnlegrar sögu leggur fram sérþekkingu og gögn á sviði munnlegrar sögu og munnlegra heimild, faglega aðstoð við undirbúning og framkvæmd verkefna og vinnur með Fræðasetrinu að öflun og úrvinnslu söfnunarverkefna. Sveitarfélagið Skagaströnd leggur til fjárframlag til niðurgreiðslu húsnæðis og stofnkostnaðar. Samingurinn var undirritaður af Rögnvaldi Ólafssyni fyrir hönd Stofnunar Fræðasetra HÍ og Adolf H. Berndsen, Sveitarfélaginu Skagaströnd.  Meðfylgjandi mynd var tekin við undirritunina.

Hópur fólks ætlar að ganga saman frá Skagaströnd til Blönduóss um 22 km leið á morgun, fimmtudaginn 21. maí, uppstigningardag.  Ætlunin er að stoppa af og til á leiðinni, borða nesti, spjalla við samferðamennina og teygja svolítið. Árni Geir fylgir hópnum á bíl og getur fólk hvílt sig í honum ef það þreytist á göngunni. Salernisstopp verður á Hóli þar sem við erum svo heppin að þekkja vel húsfreyjuna þar. Minnt er á að þessi ganga er hugsuð fyrir alla sem vilja njóta góðs félagsskapar, veðurblíðunnar og náttúrunnar. Þó vegalengdin virðist við fyrstu sýn nokkuð mikil er hún þó auðgengin og í góðum félagsskap flýgur tíminn áfram og fyrr en varir er komið á áfangastað. Upplagt er að enda gönguna á að fá sér kaffi eða ís á N1 á Blönduósi.  Hver og einn er á eigin vegum varðandi heimferð, hvatt er til þess að göngumenn samnýti bíla. Að sjálfsögðu er hægt að vinna saman og skilja eftir einn eða tvo bíla á Blönduósi kvöldið fyrir göngu.