Beiðni um upplýsingar Stefnt er að áframhaldandi lagningu ljósleiðara í Sveitarfélaginu Skagaströnd. Gert er ráð fyrir að lögbýlum, íbúðar- og frístundahúsum í dreifbýlinu við Skagaströnd bjóðist að fá ljósleiðaratengingu. Um er að ræða húsin Laufás, Réttarholt, Sólvang, Ásholt, Ás, Litla Fell og frístundahúsið Snorraberg. Óskað er eftir viðbrögðum umræddra húseigenda ef þeir hafa ekki áhuga á ljósleiðaratengingu. Auglýst er eftir: A: Aðila eða aðilum sem innan þriggja ára hyggjast, á eigin forsendum, ráðast í lagningu og/eða rekstur ljósleiðararnets í sveitarfélaginu fyrir framangreindar eignir. eða B: Hæfum aðila eða aðilum til að taka að sér að leggja og /eða reka til framtíðar ljósleiðaranet í samstarfi við Sveitarfélagið Skagaströnd, komi til þess að enginn svari lið A hér að ofan. Aðilar sem óska eftir stuðiningi munu þurfa að uppfylla tilteknar kröfur um fjarskiptaleyfi og fjárhagslegan styrk. Enn fremur að hafa reynslu af uppbyggingu og rekstri sambærilegra kerfa og sýna fram á raunhæfa verk- og rekstraráætlun. Áhugasamir aðilar skulu senda tilkynningu um fyrirætlanir sínar til Sveitarfélagsins Skagastrandar á netfangið magnus@skagastrond.is fyrir kl. 15:00 þann 4. apríl 2016. Í tilkynningunni skal koma fram nafn og kennitala aðila, aukupplýsinga um ofngreint eftir því sem við á. Hægt er að óska eftir nánari upplýsingum og skýringum og skulu slíkar fyrirspurnir sendar á netfangið magnus@skagastrond.is Áhugakönnun þessi er ekki skuldbindandi, hvorki fyrir Sveitarfélagið Skagaströnd né þá sem sýna verkefninu áhuga. Magnús B. Jónsson, sveitarstjóri

Íslandsmet. Þessi mynd var tekin af áhöfnum Arnars Hu-1 hinn 23. desember 1999. Þá hafði Arnar náð því takmarki, fyrstur íslenskra togara, að aflaverðmæti landaðs afla á árinu var komið yfir einn milljarð. Af þessu tilefni var drifið í myndatöku og á eftir bauð útgerðin upp á léttar veitingar um borð fyrir áhöfnina og aðstandendur þeirra. Á myndinni eru frá vinstri: Tryggvi Hlynsson, Bæring Skarphéðinsson, Guðmundur Andersson (nær), óþekktur (fjær), Ernst Berndsen, Ingvar Þór Jónsson, Ágúst Ómarsson, Hafsteinn Pálsson (fjær), Ingibjörg Skúladóttir (nær), Sigurjón Ingólfsson, Hólmgeir Kristmundsson, Valdimar Viggósson, Indriði Sigurðsson (nær), Hafþór Gylfason (fjær), Jónas Þorvaldsson, Óskar Kristinsson (nær), Einar Ásgeirsson (í miðið), Reynir Lýðsson (fjærst), Þröstur Árnason (fjær), Jóhannes Indriðason (nær), Einar Kristberg, Guðjón Guðjónsson, Guðmundur Finnbogason, Guðmundur Gunnlaugsson?, Björn Sigurðsson, Árni Ólafur Sigurðsson (nær), Þórarinn Eiðsson (d.14.6.2002) (fjær), Sævar Berg Ólafsson (nær), Jóhann Ásgeirsson (fjær), Slavko Velemir, Bjarni Ottósson, Gunnar Reynisson, óþekktur, Víðir? og Finnur Kristinsson. Eins og sjá má á borðanum voru aflaverðmætin orðin einn milljarður og 25 milljónir þennan dag. "Milljarðakassinn" er svo fyrir framan hópinn. Ef þú þekkir óþekktu mennina vinsamlega sendu okkur þá athugasemd.

Við hjá Dimension of sound bjóðum öllum bæjarbúum og nærsveitamönnum sem hafa áhuga á að skoða vöruúrval okkar, að koma í heimsókn á Einbúastíg 1, mánudaginn 21. mars nk. frá kl. 12:00-18:00. Vonum að sjá sem flesta :) Kveðja Ævar og Kristján

Lisa Hälterlein Löggiltur sjúkraþjálfari B.Sc. B.Sc. í sjúkraþjálfun University College Lillebælt 2013 Námskeið í sjúkraþjálfun: 2015 Nálastungu „AcuNova“ 2013 Sjúkraþjálfun á hestbaki 2013 Kinesiotape I Tímapantanir og fyrirspurnir í síma 778-3837 eða lisasjukrat@hotmail.com Flúðabakka 2, 540 Blönduósi og Ægisgrund 14, 545 Skagaströnd

Við afgreiðslu fjárhagsáætlunar 2016 tók sveitarstjórn Skagastrandar ákvörðun um að veita styrki til nemenda á framhalds- og háskólastigi sem nemur 20 þús. kr. skólaárið 2015-2016 en styrkirnir eru veittir til jöfnunar á námskostnaði fjarri heimabyggð. Umsóknum um styrki skal skilað til skrifstofu sveitarfélagsins fyrir 10. apríl 2016. Umsóknir sem berast eftir umsóknarfrest verða ekki teknar til greina. Nemendur á framhalds- og háskólastigi sem eiga lögheimili á Skagaströnd og fullnægja skilyrðum í reglum um styrkina eiga rétt á umræddum námsstyrk frá Sveitarfélaginu Skagaströnd. Nánari upplýsingar veittar á skrifstofu sveitarfélagsins og á heimasíðunni http://www.skagastrond.is/samthykktir.asp og þar má einnig fá/finna umsóknareyðublöð. Reglur um styrkina má finna hér. Umsókn um styrk má finna hér. Sveitarstjóri

Framsagnarkeppni grunnskólanna í Húnavatnsþingi var haldin 8. mars sl. og sá Húnavallaskóli um lokahátíðina að þessu sinni. Keppnin er tileinkuð Grími heitnum Gíslasyni, fréttaritara og fyrrum bónda frá Saurbæ í Vatnsdal. Markmið keppninnar er að glæða tilfinningu og metnað húnvetnskra grunnskólanema fyrir íslensku máli og framsögn. Magdalena Margrét Einarsdóttir íslenskukennari í Húnavallaskóla flutti ávarp og tveir nemendur úr Tónlistarskóla Austur Húnavatnssýslu komu fram. Guðbjörg Anna Pétursdóttir lék á saxafón og Hugrún Lilja Pétursdóttir á píanó. Þrír keppendur komu frá hverjum skóla þ.e. Blönduskóla, Húnavallskóla, Höfðaskóla, og Grunnskóla Húnaþings vestra. Forkeppni er haldin í hverjum skóla fyrir sig og mæta því þrír bestu úr hverjum skóla í lokakeppnina. Óhætt er að segja að allir keppendur hafi staðið sig vel og settu dómnefndina í talsverðan vanda, því erfitt var að velja úr. Dómarar voru að þessu sinni Baldur Sigurðsson, Benedikt Blöndal, Kolbrún Zophoníasdóttir og rithöfundarnir Gunnar Helgason og Arndís Þórarinsdóttir. Keppendur lásu brot úr skáldverki eftir Bryndísi Björgvinsdóttur, ljóð eftir Guðmund Böðvarsson og ljóð að eigin vali. Úrslit urðu þessi: Ólafur Halldórsson Höfðaskóla Hugrún Lilja Pétursdóttir Húnavallaskóla Víkingur Leon Þórðarson Blönduskóla Raddir, samtök um vandaðan upplestur og framsögn veittu peningaverðlaun fyrir fyrstu þrjú sætin. Allir keppendurnir fengu síðan tvenn bókaverðlaun. Skólarnir gáfu Ljóðasafn eftir Stein Steinarr og Félag íslenskra bókaútgefenda gaf úrval úr ljóðum Guðmundar Böðvarssonar. Að lokum var farandskjöldur afhentur en skjöldurinn var gefinn af sjóði sem stofnaður var til heiðurs Grími Gíslasyni. Sá skóli sem hlýtur fyrsta sætið varðveitir skjöldinn fram að næstu keppni og kom það í hlut Höfðaskóla að þessu sinni.

99. ársþing USAH fór fram sunnudaginn 13. mars á Húnavöllum, á þingið mættu 32 fulltrúar frá aðildarfélögunum. Auk þeirra mættu tveir gestir, Haukur Valtýsson, formaður UMFÍ og Þórey Edda Elísdóttir, fulltrúi ÍSÍ. Fjórar tillögur lágu fyrir á þinginu sem allar voru samþykktar eftir breytingar í nefndum, var þingið nokkuð starfssamt og umræður þónokkrar. Mál sem meðal annars komu upp á þinginu voru Húnavökuritið og Stefnumótun USAH. Húnavökuritið, ákveðið hefur verið að gera tilraun með dreifingu og sölu ritsins, verður hún send á öll heimili í sýslunni auk þeirra sem voru áskrifendur fyrir og í Húnvetningafélagið í Reykjavík. Mun hún með þessu móti lækka í verði en dreifast á fleiri heimili og vonumst við til að þessi tilraun takist vel og auki áhuga ungs fólks að skoða ritið. Á 98. ársþingi USAH var ákveðið að nú skyldi farið að vinna í stefnumótun USAH og voru Auðunn Sigurðsson, Sigríður Gestsdóttir og Steinunn Hulda Magnúsdóttir skipuð í stefnumótunarnefnd, núna á þinginu kynntu þau fyrir okkur stefnumótun USAH, eftir þing og fram í október mun svo stjórn USAH og aðildarfélög fara yfir hana og skila inn athugasemdum sem áfram skipuð stefnumótunarnefnd mun vinna í fyrir næsta þing, þá mun vonandi liggja fyrir tillaga að stefnumótun USAH. Þórey Edda Elísdóttir, fulltrúi ÍSÍ, ávarpaði þingið og minnti á ýmis góð málefni sem gott væri að íhuga, svosem meira samstarf milli USAH og USVH, verkefni sem eru í gangi, t.d. hjólað í vinnuna og lífshlaupið sem henni finnst endilega að við þurfum að reyna að virkja bæði hér og hjá þeim í USVH og reyna að koma upp einhverri keppni á milli og reyna að virkja bæði börn sem fullorðna í að hreyfa sig og lifa heilbrigðu lífi. Að ávarpi loknu veitti hún Aðalbjörgu Valdimarsdóttir gullmerki ÍSÍ og Hafdísi Vilhjálmsdóttur silfurmerki ÍSÍ, einnig fékk Valgerður Hilmarsdóttir silfurmerki ÍSÍ en var hún ekki á staðnum. Haukur Valtýsson, formaður UMFÍ, ávarpaði þingið og ræddi einnig um mörg verkefni sem eru í gangi í samfélaginu, svo sem Hreyfivikuna sem verður núna í maí. Þakkaði fyrir starf USAH við Landsmót 50+ og vildi ekki síður þakka sveitarfélögunum sem stóðu að mótinu fyrir sinn stuðning, hann væri ómetanlegur og án þeirra væri ekki hægt að halda svona mót. Minnti hann á Unglingalandsmótið sem haldið verður í Borgarnesi í sumar, Landsmót 50+ sem haldið verður á Ísafirði í byrjun sumars og Landsmótið, sem ákveðið hefur verið að halda á Sauðárkróki árið 2018. Að ávarpi loknu veitti hann Hafdísi Vilhjálmsdóttur og Pétri Péturssyni starfsmerki UMFÍ og Aðalbjörgu Valdimarsdóttur gullmerki UMFÍ. Íþróttamaður ársins 2015 hjá USAH var Snjólaug María Jónsdóttir, úr Skotfélaginu Markviss. Hún hefur staðið sig afskaplega vel á síðastliðnu ári í haglagreininni Ólympískt Skeet. Snjólaug keppti á sínu fyrsta móti erlendis á árinu og setti þar glæsilegt Íslandsmet, sem er aðeins 5 stigum frá Ólympíulámarkinu, fór hún upp um tvo flokka í sinni grein á tímabilinu og er fyrst kvenna hérlendis frá upphafi til að ná fyrsta flokks skori í þessari skotgrein. Hvatningarverðlaun USAH, sem fyrrum formenn USAH gáfu á 100 ára afmæli sambandsins og á að veita árlega, voru veitt í fjórða sinn og var það ungmennafélagið Fram sem hlaut bikarinn. Fram hefur ávallt staðið sig vel í barna og unglingastarfi, þau reyna að hafa fjölbreytni til staðar og að börn geti notið sín og haft gaman í þeirri íþrótt sem þau ákveða að iðka. Ungmennafélagið Fram fagnar á þessu ári sínu 90 ára afmæli og fengu platta og blóm í tilefni afmælisins. Breyting var á stjórn USAH, Aðalbjörg Valdimarsdóttir, formaður, og Hafdís Vilhjálmsdóttir, varaformaður, gáfu ekki kost á sér áfram og Valgerður Hilmarsdóttir, gjaldkeri, hætti í stjórn. Guðrún Sigurjónsdóttir gaf kost á sér áfram sem meðstjórnandi og Sigrún Líndal situr sitt annað ár sem ritari. Stjórn USAH skipa nú þau: Rúnar Pétursson, formaður. Steinunn Hulda Magnúsdóttir, varaformaður. Guðrún Sigurjónsdóttir, meðstjórnandi. Sigrún Líndal, ritari. Katrín Hallgrímsdóttir, gjaldkeri.

Þessi mynd var tekin 1947 af horfnu húsi, Viðvík. Húsið stóð ca þar sem er Strandgata 8 er í dag. Húsið var reist á sjöunda áratug 19. aldar en í því var um árabil rekið veitinga- og gistihús undir lok 19. aldarinnar. Það var Ólafur Jósson "vert" frá Helgavatni í Vatnsdal sem rak veitingahúsið ásamt konu sinni Valgerði Narfadóttur. Sagt er að Ólafur hafi verið vel af manni og ekki vílað margt fyrir sér m.a. við að halda uppi lögum og reglu hjá gestum Viðvíkur. Þau hjón áttu sex börn sem mörg hver urðu nafnkunn á Íslandi. Má þar nefna Pétur A. Ólafsson sem var um tíma allt í öllu á Patreksfirði og Láru Ólafsdóttur sem þekkt er úr bók Þórbergs Þórðarsonar: Bréf til Láru. Eftir að Ólafur vert hafði rekið gistihúsið Viðvík í allnokkur ár flutti hann til Akureyrar og gerðist veitingamaður á Oddeyrinni þar. Myndin er í eigu Muna- og Minjasafns Skagastrandar. Gefandi: Jóhann Pétursson Lækjarbakka á Skagaströnd.

FUNDARBOÐ Fundur verður haldinn í sveitarstjórn Skagastrandar miðvikudaginn 9. mars 2016 kl 800 á skrifstofu sveitarfélagsins. Dagskrá: 1. Viðaukar við fjárhagsáætlun 2. Reglur um leiguhúsnæði 3. Gjaldskrár sveitarfélagsins a. Gjaldskrá frístundar b. Gjaldskrá vatnsveitu c. Samþykkt og gjaldskrá byggingarleyfisgjalda 4. Hlutabréf í Tækifæri hf 5. Hólanes ehf, staða verkefnis 6. Bréf: a. Farskóla Norðurlands vestra, dags. 1. febrúar 2016 b. Sigurlaugar I Gísladóttur, dags. 22. janúar 2016 c. USAH, dags í mars 2016 d. Júdófélagsins Pardus, dags. 9. febrúar 2016 e. Styrktarsjóður EBÍ, dags. 22. febrúar 2016 f. Sambands íslenskra sveitarfélaga, dags. 1. mars 2016 7. Fundargerðir: a. Skólanefndar FNV, 22.02.2016 b. Hafnasambands Íslands, 24.02.2016 c. Stjórnar Sambands ísl. sveitarfélaga, 29.01.2016 d. Stjórnar Sambands ísl. sveitarfélaga, 26.02.2016 8. Önnur mál Sveitarstjóri

Komdu þá á fund í Fellsborg um námstækifæri þín hjá nokkrum af skólastofnunum landsins. Fundurinn verður haldinn í Fellsborg miðvikudaginn 9. mars klukkan 17:30. Á fundinn mæta fulltrúar frá: Fjölbraut á Sauðárkróki, Farskólanum, Háskólanum á Bifröst, Háskólanum á Akureyri, Háskólanum að Hólum og menntafyrirtækinu Keili í Reykjanesbæ. Fulltrúarnir munu kynna fjarnám og staðarnám hjá sínum skólum og einnig hver inntökuskilyrði eru, námsgjöld og annað sem skiptir máli. Eftir stuttar framsögur munu fulltrúarnir sitja fyrir svörum og svo verður hægt að fá að hitta fulltrúana einslega ef þess er þörf. Einnig mætir á fundinn fulltrúi frá verkalýðsfélaginu Samstöðu sem mun kynna möguleika á námsstyrkjum frá hinum ýmsu stéttarfélögunum. Áætlað er að fundurinn standi í rúman einn og hálfan klukkutíma. Endilega notaðu tækifærið og mættu á fundinn til að kynna þér möguleikana sem þú átt til aukinnar menntunar. Til fundarins er boðað af hópi áhugafólks um menntun og framfarir í samstarfi við sveitarfélagið Skagaströnd og Farskóla Norðurlands vestra.