Hið hefðbundna þorrablót Barnabóls var haldið fimmtudaginn 5. febrúar s.l. Undirbúningur blótsins hófst daginn áður með hattagerð en allir útbúa sinn eigin þorrabótshatt (kórónu). Þegar öðrum undirbúningi var lokið söfnuðust allir saman og sungu „Nú er frost á Fróni“ og fleiri lög. Loks var sest að snæðingi en á borðum var; harðfiskur, hangikjöt, lifrapylsa og blóðmör, ný og súr sviðasulta, súrir pungar, hákarl og rúgbrauð. Flestir voru hrifnastir af harðfiskinum og hangikjötinu en margir smökkuðu allar tegundir. Ein stúlkan hámaði í sig lifrapysluna á meðan önnur borðaði mest af hangikjötinu. Sá yngsti borðaði bara allt sem var sett á diskinn hans. Sumir vildu hafa mikið smjör á rúgbrauðinu sínu en aðrir borðuðu bara „mikið“ og drukku djús með. Helga Bergsdóttir leikskólastjóri

Hafin er undirbúningur að opnun skíðasvæðisins í Spákonufelli og standa vonir til þess að hægt verði að opna lyftuna á næstu dögum komi ekki neitt óvænt upp á. Nægur snjór er á svæðinu eins og þessar myndir bera með sér. Verið var að losa vírinn þegar myndirnar voru teknar en eftir er að færa til snjó, yfirfara lyftuna og hreinsa snjó í kringum Skíðaskálann.

Þorrablót Kvenfélagsins Einingar á Skagaströnd verður haldið laugardaginn 14. febrúar nk. og fer forsala miða fram 8. febrúar milli kl. 12.00 og 13.00 í Félagsheimilinu Fellsborg. Miðaverð er 4.100 kr. en eldriborgarar og unglingar fæddir 1988 greiða 2.500 kr. Skemmtiatriði verða í höndum valinkunnra úrvalsaðila og hljómsveitin Von frá Sauðárkróki spilar fram eftir nóttu.

Grænlenski togarinn Arctic Wolf frá Ilulssat hefur verið við tilraunaveiðar á krabba undan farnar vikur á nokkrum stöðum við landið. Hafa þeir m.a. reynt fyrir sér við Breiðafjörðinn. Skipið er í höfn á Skagaströnd þessa dagana en búið er að leggja krabbagildur í Húnaflóa og beðið er eftir heppilegu veðri til að vitja um aflann. Skipið var leigt til veiða fyrir E. Ólafsson, íslenska útgerð en áhöfnin mun vera að hluta til erlend. Arctic Wolf hefur verið við krabbaveiðar við Grænland á liðnum árum og náð góðum árangri með þær veiðar.

Loksins kom ærlegur snjór, já en... alltof mikið í einu, sagði einhver. Hvernig er þetta með þennan meðalveg sem allir eru að tala um. Hafa veðurguðirnar aldrei heyrt um hann. Hann er með mátulega miklum snjó, góðum brekkum, 3-4 stiga frosti og sólskini. Við auglýsum hér með eftir honum en meðfylgjandi eru nokkrar myndir af börnunun á Barnabóli að leik í „ofursnjósköflum“ á Skagaströnd. Leikskólastjóri.

Hreppsnefnd Höfðahrepps þakkar Björgunarsveitinni Strönd fyrir ómetanlega aðstoð við íbúa og atvinnulíf þegar óveður gekk yfir Skagaströnd dagana 12. – 16. janúar 2004. Hreppsnefndin metur mikils hið fórnfúsa starf björgunarsveitarmanna og annarra sjálfboðaliða sem unnið hafa við björgun verðmæta og aðstoð við íbúa. Sá samhugur sem birtist í störfum þessa fólks er til fyrirmyndar og styrkir samfélagið á erfiðum tímum. Skagaströnd, 22. janúar 2004. Hreppsnefnd Höfðahrepps

Gangur lífsins er nú sem óðast að taka á sig eðlilegt horf eftir óveðurskaflann sem gekk yfir í síðustu viku. Snjómokstri af götum er að mestu lokið og orðið vel fært um allan bæinn. Hlákan sem kom í kjölfar óveðursins hefur hjálpað mikið til við að breyta öllu útliti byggðarinnar. Bátarnir sem sukku í höfninni eru allir komnir á þurrt og hafa ýmist verið teknir til viðgerðar eða settir í biðstöðu þar til ákveðið verður um framtíð þeirra. Hreinsun á niðurbrotnu þaki Vélsmiðju Karls Berndsen stendur yfir og hönnun viðgerða er hafin. Ekki er fyrirséð hvernig verður leyst úr því máli.

Frá og með janúar 2004 verður viðvera umsjónarmanns Námsstofu sem hér segir: - Á þriðjudögum kl. 19:30 - 21:30 - Á miðvikudögum kl. 17:00 - 19:00 - Á fimmtudögum kl. 10:00 - 12:00 og 13:00 - 16:00

Nýlega afhenti stjórn Sjúkrasjóðs Höfðakaupstaðar heilsugæslunni á Skagaströnd nýtt tæki að gjöf. Tækið er Lazer-tæki; Thor DD Lazer Therapy Unit, sem nýtist vel við verkjameðferð, einkum fyrir gigtarsjúklinga. Sjúkrasjóður Höfðakaupstaðar var stofnaður 1947 innan kvenfélagsins Eining á Skagaströnd.Hefur sjóðurinn verið iðinn við að gefa ýmis konar tæki til heilsugæslunnar frá stofnun hans. Meðal annars eru nánst öll tæki sem notuð eru á heilsugæslunni til þjálfunar og endurhæfingar tilkomin sem gjafir frá sjóðnum. Einnig hefur sjóðurinn gefið nokkuð af tækjum í sjúkrabíl Rauðakrossdeildarinnar á Skagaströnd í gegnum árin. Aðal tekjulind Sjúkrasjóðsins er sala minningarkorta en þess utan hafa konurnar sem starfa fyrir hann fengið styrki frá fyrirtækjum og einstaklingum. Að þessu sinni fékk heilsugæslan lazertæki frá sjóðnum en að sögn Angelu Berthold sjúkraþjálfara nýtist tækið vel við verkjameðferð, til húðlækninga og svo hefur það örvandi áhrif á frumumyndun og er því græðandi. Þá er ótalinn sá kostur tækisins að hafa bólgueyðandi áhrif því að meðferð með því hefur örvandi áhrif á blóðstreymi til bólginna vöðva. Angela þakkaði kvenfélaginu og Sjúkrasjóðnum fyrir gjöfina og segist nú þegar hafa reynslu fyrir að tækið nýtist vel á heilsugæslunni. ÓB.

Slökkvilið Skagastrandar og björgunarsveitin Strönd voru kölluð út um kl 14 í dag, laugardaginn 13. des. þar sem í ljós hafði komið að hraðfiskibáturinn Þórunn Ósk var hálffullur af sjó og talin veruleg hætta á að hann sykki ef ekki væri við brugðið. Var dælt upp úr bátnum og gekk það allt greiðlega. Síðastliðna nótt var hvassviðri og mældist vindhraði á Skagastrandarhöfn 20 m/sek og mesti vindur í hviðum 28-30 m/sek. Ekki er vitað fyrir víst hvort veðrið var ástæða þess að báturinn fylltist af sjó eða hvort aðrar ástæður voru til þess.