Viðlagatrygging Íslands (VTÍ ) átti fund í dag með fulltrúum sveitarfélaganna Skagastrandar og Skagabyggðar.  Heimsóknin er liður í átaki stofnunarinnar til að bæta þekkingu á hlutverki hennar og skráningu opinberra mannvirkja í eigu sveitarfélaganna sem vátryggð eru hjá VTÍ. Á fundinum var rætt um vátryggingavernd mannvirkja í eigu sveitarfélagsins og um mikilvægi þess að skráð verðmæti þeirra sé uppfært reglulega til að tryggja að eignirnar séu tryggðar að fullu áður en vátryggingaratburður á sér stað. Einnig var rætt um mikilvægi samvinnu sveitarfélagsins og VTÍ til að stuðla að markvissri endurbyggingu ef tjón verður á mannvirkjum. Einnig var rætt um mikilvægi þess að íbúar séu meðvitaðir um hvort vátryggingavernd þeirra sé í lagi. Fram kom að ef innbú er vátryggt almennri lausafjártryggingu hjá vátryggingafélagi rennur hluti iðgjaldsins til VTÍ og tryggir þannig vátryggingavernd innbúsins komi til tjóns af völdum jarðskjálfta, eldgosa, vatns-, aur- eða snjóflóða skv. skilgreiningum laga um VTÍ (55/1992). Ef slík vátrygging er ekki til staðar greiðast engar bætur vegna innbús ef til tjóns kemur. Allar fasteignir eru hins vegar skylduvátryggðar gegn náttúruhamförum og eru iðgjöldin innheimt samhliða brunatryggingum fasteigna hjá almennu vátryggingafélögunum.

Orlofsferð húsmæðra í Austur Húnavatnssýslu. 1.-2.apríl 2017 Þá er komið að skemmtiferðinni okkar! Rúta leggur af stað laugardaginn 1. apríl 2017 kl. 09:40 frá Blönduósi og kl.10 frá Skagaströnd, til Siglufjarðar. Gisting á Hótel Sigló, þríréttuð kvöldmáltíð og Brunch í hádeginu á sunnudag. Nánari dagskrá þegar nær dregur. Við þurfum að fá þátttökutilkynningu fimmtudaginn 23.febrúar milli kl.17-19. Þórdís Hjálmarsdóttir sími 8991119 Sigríður Stefánsdóttir sími 7741434 Staðfestingargjald kr. 5.000 greiðist inn á reikning 0307-13-300731 kt. 510578-0909 í síðasta lagi 1.mars 2017 Ferðin er fyrir konur sem lögheimili eiga í Austur Húnavatnssýslu og veita heimili forstöðu án launagreiðslu fyrir það starf.

Starfsfólk Samkaupa, Skagstrendingar og aðrir gestir Mig langar f.h. Sveitarfélagsins Skagastrandar að óska okkur öllum til hamingju með þessa glæsilegu andlitslyftingu sem hefur orðið á versluninni hér á Skagaströnd. Einnig langar mig við þetta tækifæri að þakka Samkaupum samfylgdina í þau ár sem liðin eru frá því að félagið tók við rekstri verslunar hér á staðnum... enda tel ég að flestir séu sammála um að sú breyting hafi verið til batnaðar. Ykkur hefur tekist að halda í gott starfsfólk en slíkt er auðvitað forsenda fyrir því að allt geti gengið vel.... Takk kærlega fyrir okkur Vigdís og aðrir starfsmenn hér á Skagaströnd. Almennt talið held ég að íbúar Skagastrandar geri sér grein fyrir að verslunarrekstur í ekki stærra samfélagi en okkar er ekki einfaldur og alls ekki sjálfgefinn....en engu að síður ákaflega mikilvægur í samfélags- og byggðalegu tilliti. Ég held þess vegna að færri og færri stundi skipulegar innkaupaferðir út fyrir Skagaströnd og ég vona svo sannarlega að þess beri merki í ykkar veltutölum. Aukin þjónusta, lengri opnunartími og loforð um lægra vöruverð ættu að sjálfsögðu að vera hvatning til fólks um að halda tryggð við KÖRBÚÐINA SÍNA. Þrátt fyrir þessar þakkir og allt þetta lof í ykkar garð er þó vonandi öllum ljóst að alltaf er hægt að gera betur og við sem neytendur eigum svo sannarlega að gera kröfur og vera dugleg að benda á það sem betur má fara...rýna til gagns. Á sama hátt eigið þið að gera kröfu um að gangrýni sé sett fram á sanngjarnan og uppbyggilegan hátt. Sveitarstjórn Skagastrandar hefur í nokkuð mörg ár reynt að beita Ámundarkinn, sem er eigandi húseignarinnar, þrýstingi til að ráðast í löngu tímabærar aðgerðir er varðar viðhald og endurbætur á sjálfu verslunarhúsinu. Því miður hefur lítið miðað í þeirri baráttu en ykkar framtak hér innandyra mun væntanlega kalla enn frekar á að slíku viðhaldi verði sinnt. Kæra Samkaupsfólk.... það er mín einlæga von að breytingar á versluninni muni reynast vel og þær séu merki þess að Samkaup sé sátt með rekstur sinn í okkar ágæta samfélagi og okkar hagsmunir muni því halda áfram að liggja saman. Innilegar hamingjuóskir með KJÖRBÚÐINA. Ræða Halldórs Ólafssonar í tilefni opnunarinnar.

Bogabraut 3 og 5 Verkamannabústaðirnir á Bogabraut 3 og 5 í byggingu 1962 -1964.

Örn Sveinsson augnlæknir verður með móttöku á heilsugæslunni á Blönduósi dagana 8. til og með 10. mars næstkomandi. Tímapantanir og nánari upplýsingar hjá riturum í síma 455-4100 milli kl. 8:00 og 16:00

Aðalfundur kvenfélagsins Einingar verður haldinn í Fellsborg þriðjudaginn 21. febrúar n.k.  kl. 20:00 Venjuleg aðalfundastörf. Nýjar félagskonur velkomnar :) Sjáumst. Kvenfélagið Eining

Systkini úr Hólaneshúsinu. Frá vinstri: Sigríður Sigurðardóttir, Jósep Sigurðsson, Hjörtur Sigurðsson (d. 9.5.2015) og Magnús Sigurðsson. Þau voru fædd á árunum 1961 - 1965.

Snjóavetur Óvenju snjólétt hefur verið á Skagaströnd það sem af er vetri 2016 - 2017. Þessi mynd er sett hér inn til að minna fólk á að svo hefur ekki alltaf verið. Til dæmis var gríðarlegur snjór á Skagaströnd í janúar - maí 1995 með sífelldum illviðrum. Snjómokstur gekk erfiðlega því erfitt var að koma snjónum fyrir nema aka honum í sjóinn. Fljótlega var því gripið til þess ráðs að þjappa snjóinn með jarðýtu og síðan var ekið ofan á snjósköflunum kannski tveggja metra þykkum. Þessi mynd var tekin í Mýrinni og sýnir fannfergið þar.

Ágætu fasteignaeigendur á Skagaströnd. Álagning fasteignagjalda hefur nú farið fram. Álagningarreglur fasteignagjalda 2017 eru meðfylgjandi bréfi þessu og jafnframt aðgengilegar á heimasíðunni www.skagastrond.is – undir „gjaldskrár“.   Greiðslur fasteignagjalda: Eins og undanfarin ár verða ekki sendir greiðsluseðlar vegna fasteignagjalda nema til þeirra sem þess hafa óskað sérstaklega og gildir skráning þeirra sem þess óskuðu á síðasta ári nema nýjar upplýsingar komi fram. Gjalddagar fasteignagjalda eru frá 1. febrúar til 1. júlí, en á smærri upphæðum eru gjalddagar 1 eða 2. (Gjalddagar á 0-5.000 kr. er 1.apríl og 5.001-10.000 skiptist í tvo gjalddaga 1. apríl og 1. maí). Álagningaseðlar: Eins og undanfarin tvö ár munum við ekki senda út álagningarseðla nema þess sé sérstaklega óskað. Hver og einn getur nálgast sína álagningarseðla á vefsíðunni www.island.is  undir reitnum „mínar síður“ Innskráning er með kennitölu viðkomandi og veflykli ríkisskattstjóra. Skrifstofa sveitarfélagsins veitir fúslega upplýsingar og aðstoð til þeirra sem þess óska.   Álagningareglur fasteignagjalda fyrir árið 2017 Samþykkt á fundi sveitarstjórnar 16.11.2016   Fasteignaskattur:          Álagning á íbúðarhúsnæði (A-flokkur) verði 0,50% af álagningarstofni. Álagning á opinberar stofnanir (B-flokkur) verði 1,32% af álagningastofni. Álagning á verslunar- og atvinnuhúsnæði verði (C-flokkur) 1,65% af álagningarstofni. Lóðarleiga: Lóðarleiga verði 1,65% af fasteignamatsverði lóða. Vatnsskattur: Vatnsskattur verði 0,3% af fasteignamati að lágmark 7.000  kr. og á íbúðarhúsnæði að hámarki  30.000 kr. Holræsagjald: Holræsagjald verði 0,24% af fasteignamati lóða og mannvirkja Sorphirðugjald /sorpeyðingargjald: Sorphirðugjald verði  39.350 kr./íbúð fyrir reglubundna sorphirðu og eyðingu. . Sorpeyðingargjald verði  12.400 kr./sumarhús og íbúðir þar sem ekki er regluleg sorphirða. Sorpeyðingargjald á hesthús og fjárhús verði 4.400 kr./hús í notkun. Sorpeyðingargjöld á fyrirtæki verða samkvæmt gjaldskrá. Leiga ræktunarlóða: Fyrir hvern ha ræktunarlóða er greitt fast leigugjald. Auk þess greiða lóðarhafar fasteignagjöld af lóðunum skv. fasteignamati. Lóðaleiga verði  6.000 kr./ha.   Eftirfarandi reglur gilda um lækkun fasteignagjalda elli- og örorkulífeyrisþega: Fasteignagjöld verða eingöngu lækkuð af íbúðum elli- og örorkulífeyrisþega, sem þeir búa í sjálfir. Til viðmiðunar eru allar tekjur viðkomandi, þar með taldar fjármagnstekjur.   Fasteignagjöld lækki um allt að kr. 36.000,- hjá: Einstaklingum með tekjur allt að                                 3.160.000 kr/ári Hjónum eða fólki í sambúð með tekjur allt að              5.164.000 kr/ári   Fasteignagjöld lækki um allt að kr. 18.000,- hjá: Einstaklingum með tekjur allt að                                 3.950.000 kr/ári Hjónum eða fólki í sambúð með tekjur allt að              6.455.000 kr/ári   Skagaströnd 1. febrúar 2017 Sveitarstjóri