Við ætlum að vera með reiðskólan okkar á Skagaströnd í sumar :) frá 25-29 maí og 1-5 júní. Hægt er að velja að vera frá 9-12 eða 13-16. Verð: 15.000 hálfur dagur. Skipt er í hópa eftir getu hvers og eins. Skráning fer fram á Facebook. eða í síma 867 1180. Kveðja Halla og Maggi

Aðalfundur Hestamannafélagsins Snarfara verður haldinn í húsi félagsins miðvikudaginn 13.maí 2015 kl.20:00 Venjuleg aðalfundarstörf Stjórnin

Karlakór Bólstaðarhlíðarhrepps. Karlakór Bólstaðarhlíðarhrepps er 90 ára nú á Sumardaginn fyrsta 2015 sem þýðir að hann var stofnaður þann dag árið 1925. Ekki er vitað hvenær þessi mynd var tekin af kórfélögum en það hefur sennilega verið einhverntíma á sjöunda áratugnum. Ljósmyndasafn Skagastrandar óskar kórnum til hamingju með langa starfsævi. Á myndinni eru: Fremsta röð frá vinstri : Guðmundur Sigurjónsson Rútsstöðum, Björn Jónsson (d.18.2.1991) Gili, Guðmundur Sigfússon (d. 27.3.1993) Eiríksstöðum, Elsa Óskarsdóttir Fagranesi, Gerður Aðalbjörnsdóttir (d. 12.6.2007) Hólabæ, Guðrún Jakobsdóttir (d. 5.1. 2005) Grund, Jón Tryggvason (d. 7.3.2007) Ártúnum, Árni Jónsson Víðimel og sr.Birgir Snæbjörnsson (d. 17.7.2008) Æsustöðum. Önnur röð frá vinstri: Árni Sigurjónsson Rútsstöðum , Pétur Sigurðsson (d. 11.5.2000) Skeggstöðum, Sigvaldi Sigurjónsson Rútsstöðum, Sigurjón Ólafsson (d. 13.1.1971) Brandsstöðum, Pétur Pétursson (d. 7.5.1977) Höllustöðum, Guðmundur Tryggvason Finnstungu, Jónas Tryggvason (d. 17.8.1983) Ártúnum, Guðmundur Jósafatsson Austurhlíð og Runólfur Aðalbjörnsson Hvammi. Þriðja röð frá vinstri: Jón Guðmundsson Eiríksstöðum, Sigurjón Stefánsson Steiná, Bjarni Sigurðsson Barkarstöðum, Ingvar Þorleifsson Sólheimum, Guðmundur Halldórsson (d. 13.6.1991) Bergsstöðum, Aðalsteinn Sigurðsson(d.21.8.2005) Leifsstöðum, Sigurgeir Hannesson (d. 8.2.2005) Stekkjardal, Ingólfur Bjarnason (d. 22.5.2000) Bollastöðum og Grímur Eiríksson (d. 22.5.1993) Ljótshólum. Fjórða röð frá vinstri: Sigmar Ólafsson (d. 30.10.1991) Brandsstöðum, Þórður Þorsteinsson (d. 8.8.2000) Grund, Haraldur Karlsson (d.30.10.2007) Litladal, Auðunn Guðmundsson Austurhlíð, Pétur Guðmundsson Eiríksstöðum, Sigurður Sigurðsson (d. 5.7.1984) Leifsstöðum, Hannes Guðmundsson (d. 10.9.2008) Auðkúlu, Halldór Eyþórsson (d. 21.9.2007) Syðri-Löngumýri, Jósef Sigfússon Torfustöðum, Friðrik Björnsson (d. 3.1.2007) Gili og Georg Sigurvaldason (d. 13.3.1990)Eldjárnsstöðum.

Nemendur sem hafa stundað dreifnám FNV á Blönduósi eru minntir á að frestur er til 1. maí 2015 til að sækja um sérstakan stuðning vegna dreifnáms fyrir vorönn 2015. Í reglunum segir m.a.: Eingöngu nemendur sem stunda reglubundið nám við dreifnám FNV á Blönduósi og eiga lögheimili á Skagaströnd geta sótt um stuðning þann sem tilgreindur er í reglunum. Nemandi telst stunda reglubundið nám til fullnustu a.m.k. 12 eininga námi á önn sem telst hluti af skipulögðu námi dreifnámi FNV á Blönduósi sem skólinn staðfesti með ástundunarvottorði. Ef námi er ekki lokið vegna veikinda skal skóli staðfesta móttöku á fullgildu læknisvottorði. Umsóknafestur um kostnaðarþátttöku samkv. reglugerð þessari skal vera til 1. desember vegna haustannar og til 1. maí vegna vorannar. Greiðslur vegna haustannar verða framkvæmdar fyrir 15. desember vegna haustannar og fyrir 15. maí vegna vorannar. Enda liggi fullnægjandi gögn fyrir. Sveitarstjóri

Athugið að bókasafnið verður lokað sumardaginn fyrsta, fimmtudaginn 23. apríl. nk. Kveðja Sigþrúður

Elín Ósk Björnsdóttir hreppti fyrsta sætið í Stærðfræðikeppninnar 2015. Úlfar Hörður Sveinsson var í 2. sæti. Þriðja sætinu deildu þau Ágústa Eyjólfsdóttir og Aron Ingi Ingþórsson. Ljósm./mtr.is Elín Ósk Björnsdóttir, í Höfðaskóla á Skagaströnd, varð í fyrsta sæti í stærðfræðikeppni Fjölbrautaskóla Norðurlands vestra og Menntaskólans á Tröllaskaga fyrir 9. bekki grunnskóla á Norðurlandi vestra, í Fjallabyggð og Dalvíkurbyggð. Í öðru sæti var Úlfar Hörður Sveinsson í Ársskóla á Sauðárkróki og þriðja sætinu deildu þau Ágústa Eyjólfsdóttir, Ársskóla og Aron Ingi Ingþórsson, Húnavallaskóla. Stærðfræðikeppnin er samstarfsverkefni Fjölbrautarskóla Norðurlands vestra og Menntaskólans á Tröllaskaga. Undankeppnin fór fram í mars sl. og tóku nemendur í 9. bekk af Norðurlandi vestra, úr Fjallabyggð og Dalvíkurskóla þátt í henni. Að þessu sinni komust 15 nemendur í úrslit. „Það var glæsilegur hópur sem mætt einbeittur til leiks í morgun. Keppendur stóðu sig allir með afbrigðum vel og voru snöggir að svara prófinu,“ segir í frétt á vef MTR. Frétt af vef Feykis

Hinir árlegu vortónleikar skólans verða sem hér segir: Húnavöllum miðvikudaginn 22.apríl kl. 14.30 Blönduósi miðvikudaginn 6.maí kl. 17 í Blönduósskirkju Skagaströnd fimmtudaginn 7.maí kl. 17 í Hólaneskirkju Allir velkomnir. Skólastjóri

Ólafur Guðmundsson Ólafur Guðmundsson skipasmiður lést þriðjudaginn 7. apríl síðast liðinn, rúmlega 80 ára gamall. Ólafur, eða Óli skip eins og hann var gjarnan kallaður, flutti til Skagastrandar með fjölskyldu sína árið 1970 frá Stykkishólmi til að starfa í Skipasmíðastöð Guðmundar Lárussonar hf, sem stofnuð var það ár. Óli var verkstjóri í stöðinni og segja má að framgangur fyrirtækisins hafi byggst á hans kunnáttu og hæfni. Eftir að Skipasmíðastöðin lagði upp laupana starfaði Óli hjá Mánvör hf og sá síðan um slippinn í nokkur ár meðfram því að stunda almenna smíðavinnu. Óli var afar duglegur og leit aldrei á vandamál sem slík heldur bara verkefni sem þyrfti að leysa. Þess vegna þótti mörgum gott að leita til Óla eftir ráðum sem snertu byggingar og aðrar verklegar framkvæmdir. Óli var giftur Guðmundu Sigurbrandsdóttur, sem lifir mann sinn, og saman áttu þau fjögur börn. Er Guðmundu og fjölskyldunni vottuð samúð á erfiðum tímum. Á myndinni er Óli á kunnuglegum slóðum við vinnu sína í trébát í slippnum á Skagaströnd.

Starfsfólk í sumarafleysingu Við leitum eftir sumarafleysingafólki í liðsheild okkar hjá Greiðslustofu Vinnumálastofnunar á Skagaströnd. Í boði eru fjölbreytt verkefni með jákvæðum og uppbyggilegum samstarfshópi. Ef þú hefur áhuga á að starfa hjá Greiðslustofu í sumar ekki hika við að hafa samband. Áhugasamir geta kynnt sér starfsemi stofnunarinnar á heimasíðu hennar www.vinnumalastofnun.is. Umsóknir með upplýsingum um menntun og starfsferil sendist til Jensínu Lýðsdóttur, forstöðumanns Vinnumálastofnunar Norðurlandi vestra - Greiðslustofu , Túnbraut 1-3, 545 Skagaströnd eða á netfangið jensina.lydsdottir@vmst.is fyrir 30. apríl næstkomandi. Nánari upplýsingar fást einnig hjá Jensínu í síma 582 4900.

Rauða fjöðrin seld til að kaupa leiðsöguhunda fyrir blinda Hver hundur kostar 8-10 milljónir króna þegar allt er talið. Þörf er á 14-16 hundum á Íslandi en aðeins 7 verða í þjónustu á komandi sumri. Lionsfólk á Skagaströnd verður á ferðinni á föstudagskvöldið og mun ganga í hús og safna. Dagana 17. – 19. apríl fer landssöfnun Lions, Rauða fjöðrin, fram um allt land. Markmiðið er að safna í sjóð til að fjármagna kaup á leiðsöguhundum fyrir blinda í samvinnu við Blindrafélagið og Þjónustu- og þekkingarmiðstöð fyrir blinda, sjónskerta og daufblinda einstaklinga. Hver hundur getur kostað allt að 10 milljónir króna og unnið í allt að 10 ár. Hundarnir eru sérvaldir með hliðsjón af eiginleikum þeirra og eru tilbúnir til starfa við 2 1/2 árs aldur eftir gríðarlega þjálfun. Vinnusamband manns og hunds byggir síðan ekki síst á vináttu þeirra og kærleika. Leiðsöguhundar bæta lífsgæði blindra og sjónskertra verulega og stuðla að aukinni virkni þeirra í samfélaginu. Lionsfélagar verða á ferðinni þessa helgi með rauðu fjöðrina til sölu. Þeir verða í verslunarmiðstöðvum og á fleiri fjölförnum stöðum. Auk þess verða valgreiðslur sendar í heimabanka og hringja má í söfnunarnúmer. Verndari söfnunarinnar er hr. Ólafur Ragnar Grímsson forseti Íslands. Söfnunarnúmer Auk þess að kaupa rauðu fjöðrina má leggja verkefninu lið með því að greiða valgreiðslu í heimabanka eða millifæra upphæð að eigin vali inn á reikning Lions: 0111-26-100230, kt. 640572-0869. Einnig er hægt að hringja í söfnunarsímanúmer: Styrkur að fjárhæð 1.000 kr. skuldfærist af símreikningi þegar hringt er í símanúmerið 904 1010. Styrkur að fjárhæð 3.000 kr. skuldfærist af símreikningi þegar hringt er í símanúmerið 904 1030. Styrkur að fjárhæð 5.000 kr. skuldfærist af símreikningi þegar hringt er í símanúmerið 904 1050.