Leikrit um daglegt líf sem fléttast kringum lög við vinnuna eru upplífgandi og sálarbætandi, enda kannast allir við eitthvað af því sem þar er fjallað um. Eitt af þessum verkum er Kardemommubærinn og gefst fólki nú gott færi á að skyggnast um stund inn í daglegt líf í þeim notalega bæ. Skólafélagið Rán stendur fyrir sýningu í Fellsborg þriðjudaginn 29.apríl næstkomandi. Njótið tilhlökkunarinnar. Sýning hefst klukkan 18:00 og er miðaverð 1000 krónur.

Hér er unnið við grjótnám í Höfðanum. Grjótið var sprengt úr Höfðanum, síðan komið á bíl sem flutti það í uppfyllingu við hafnargerðina. Myndin var líklega tekin 1934 en þá var hafnargerðin í fullum gangi. Eins og sjá má eru tæknin við grjótnámið samkvæmt því sem þá þekktist. Greinilega hefur derhúfan - "sixpensarinn" - þjónað því hlutverki sem öryggishjálmar gera í dag. Í baksýn sést Ægissíða sem nú er löngu horfin. Myndina tók Björn Bergmann en mennirnir á myndinni eru óþekktir.

Leikrit um daglegt líf sem fléttast kringum lög við vinnuna eru upplífgandi og sálarbætandi, enda kannast allir við eitthvað af því sem þar er fjallað um. Eitt af þessum verkum er Kardemommubærinn og gefst fólki nú gott færi á að skyggnast um stund inn í daglegt líf í þeim notalega bæ. Skólafélagið Rán stendur fyrir sýningu í Fellsborg þriðjudaginn 29.apríl næstkomandi. Njótið tilhlökkunarinnar. Upplýsingar um aðgangseyri og tímasetningu berast senn.

Sveitarfélagið Skagaströnd auglýsir eftir flokksstjórum til starfa í Vinnuskóla sveitarfélagsins í sumar. Skilyrði er að umsækjendur séu 20 ára eða eldri og reynsla af sambærilegum störfum kostur. Jafnframt eru auglýst laus til umsókna sumarstörf námsmanna í samstarfi við Vinnumálastofnun. Störfin eru við ýmis verkefni á vegum sveitarfélagsins m.a. við skógrækt, umhverfismál og umsjón með golfvelli. Umsóknareyðublöð má fá á skrifstofu sveitarfélagsins. Umsóknarfrestur um flokkstjórastörf er til 9. maí n.k. en umsóknarfrestur vegna sumarstarfa námsmanna verður auglýstur síðar. Skráning í vinnuskóla fer fram á skrifstofu sveitarfélagsins. Gert er ráð fyrir að vinnuskólinn hefji störf um mánaðarmót maí –júní. Nánari upplýsingar eru veittar á skrifstofunni í síma 455 2700. Sveitarstjóri

Laugardaginn 19. apríl heldur kvenfélagið Eining sitt árlega páskabingó í félagsheimilinu Fellsborg Skagaströnd. Bingóið hefst kl 13:30 Aðgangseyrir: Fullorðnir 1000 kr 1 spjald innifalið 12 ára og yngri 500 kr 1 spjald innifalið Aukaspjald fyrir hlé kr 500 Aukaspjald eftir hlé kr 300 Í hléi verður boðið uppá skúffuköku, djús og kaffi Fjöldi veglegra vinninga Gleðilega páska! Kvenfélagið Eining

FUNDARBOÐ Fundur verður haldinn í sveitarstjórn Skagastrandar þriðjudaginn 15. apríl 2014 á skrifstofu sveitarfélagsins kl 800. Dagskrá: Ársreikningur 2013 (fyrri umræða) Atvinnumál Bréf Samorku dags. 1. apríl 2014 Rannsókna og ráðgjafar dags. í apríl 2014 Fundargerðir: Fræðslunefndar, 14.04.2014 Hafnarnefndar, 09.04.2014 Stjórnar Róta bs, 21.02.2014 Stjórnar Róta bs, 27.02.2014 Skólanefndar FNV, 18.03.2014 Stjórnar Hafnasambands Íslands, 28.03.2014 Stjórnar Samtaka sjávarútvegssveitarfélaga, 27.03.2014 Stjórnar Sambands ísl. sveitarfélaga, 21.03.2014 Önnur mál Sveitarstjóri

Fundurinn verður sendur út í fjarfundabúnaðinn í Námsverinu á efstu hæðinni í Gamla Kaupfélags-húsinu og í búnaðinn á Þverbraut 1 á Blönduósi. Taktu frá klukkutíma og kynntu þér þetta mál því það gæti gjörbreytt möguleikum þínum á atvinnumarkaðnum.

Útbæingar Skipting Skagastrandar í útbæ og innbæ var mun meira áberandi á árunum 1950 - 1970 en hún er nú í dag. Þá börðust fylkingar ungra út - og innbæinga með trésverðum og öðrum slíkum vopnum með reglulegu millibili en eins og úr öðrum stríðum heimsins kom ekkert út úr þeim orrustum nema stöku blóðnasir. Á þessari friðsemdarmynd eru nokkrir útbæingar framan við Höfðabrekku (Bankastræti 10) einhverntíma kringum 1960. Frá vinstri: Matthildur Hafsteinsdóttir Fossdal frá Dvergasteini, Vigfús Elvan Friðriksson (d. 7.12.2001) Höfðabrekku, Björn Hafsteinsson Fossdal, frá Dvergasteini (bróðir Matthildar), Ólöf Smith (Lólý) Höfðabrekku, Árni Björn Ingvarsson Sólheimum, Heiðar Elvan Friðriksson Höfðabrekku, Örn Berg Guðmundsson (Assi) Höfðabrekku, Ólafur Bernódusson Stórholti og Steindór R. Haraldsson Höfðakoti. Ef þú þekkir óþekktu krakkana endilega sendu okkur þá athugasemd á netfangið : ljosmyndasafn@skagastrond.is eða olibenna@hi.is .

Í kvöld fimmtudaginn 10. apríl klukkan 20:00 ætlar Svanhildur Gunnarsdóttir safnakennari hjá Árnastofnun að sýna fólki eftirlíkingu af þjóðargerseminni: Flateyjarbók. Svanhildur mun einnig sýna áhöld og efni eins og þau sem notuð voru við ritun bókarinnar á sínum tíma. Fólk fær að skoða, handfjatla og prófa þau verkfæri til að átta sig betur á hvílíkt þrekvirki Flateyjarbók er. Auðvitað mun Svanhildur líka svara spurningum sem vakna um bókina og önnur fornrit sem við eigum saman í Árnastofnun. Kynningin verður í Rannsóknasetrinu á Gamla Kaupfélaginu (gengið inn að vestanverðu) klukkan 20:00 í kvöld. Gríptu gæsina og komdu þó fyrirvarinn sé stuttur því þetta tækifæri kemur ekki aftur. RANNSÓKNASETUR HÁSKÓLA ÍSLANDS Á NORÐURLANDI VESTRA

Sveitarstjórn Skagastrandar og Hjallastefnan ehf. hafa gert með sér viljayfirlýsingu um samstarf í skólamálum á Skagaströnd. Viljayfirlýsingin var undirrituð 31. mars sl. að afloknum kynningarfundi á Hjallastefnunni sem foreldrafélög skólanna á Skagaströnd héldu. Sveitarfélagið og Hjallastefnan ehf móta með viljayfirlýsingunni sameiginlega sýn á fyrirkomulag samstarfsins á Skagaströnd en í henni kemur m.a. fram: 1. Um leikskóla: Aðilar eru sammála um að frá og með dagsetningu undirritunar viljayfirlýsingarinnar hefjist Hjallastefnan handa við undibúning þess að gerður verði bindandi samningur um rekstur leikskólans Barnabóls á Skagaströnd. Stefnt er að því Hjallastefna taki við rekstri leikskóla frá miðju ári 2014. Í apríl verði unnið að gerð formlegs samings um leikskólann og þar með hefji Hjallastefnan aðlögun að breytingu í fagstarfi leikskólans sem væri m.a. fólgið í komu „gestakennara“ frá Hjallastefnuskólanum á Akureyri. Sömuleiðis færi starfsfólk frá Skagaströnd á Akureyri til að kynnast starfsemi Hjallstefnuleikskóla. Stefnt skuli að því að Hjallastefnan taki við mannaforráðum í leikskólanum 1. júní 2014. Fyrir þann tíma hafi fulltrúar Hjallastefnu farið yfir mönnun og starfsmannahald sem leiði af sér endurráðningu starfsmanna á forsendum Hjallastefnunnar. Ef samningar ganga eftir muni Sveitarfélagið Skagaströnd gefa út nýtt starfsleyfi til Hjallastefnu 1. ágúst 2014 fyrir sjálfstætt starfandi leikskóla. 2. Um grunnskóla: Aðilar eru sammála um að hefja samstarf um þróun grunnskólans í átt að Hjallastefnu og að skoðað verði með starfsfólki og foreldrum á skólaárinu 2014-2015 hvort grundvöllur er til að hefja formlegt samstarf eða gera samning um rekstur grunnskólans. Sá fyrirvari er gerður af hálfu beggja aðila að fjárhagslegt samkomulag náist og sameiginleg sýn á endanlegt fyrirkomulag og rekstur skólanna.