Breytt viðvera lækna á Skagaströnd: Framvegis verður læknir annan hvern þriðjudag og alla fimmtudaga frá kl. 9-12 á Heilsugæslunni á Skagaströnd. Nánari upplýsingar og tímapantanir í síma: 455 4100 HSB

Þeir listamenn sem dvelja nú í Nes listamiðstöð sýna afrakstur vinnu sinnar þriðjudaginn 21. febrúar, kl. 17:00 – 19:00. Með því að nota margvíslega miðlunartækni, eins og málverk, myndbönd, innsetningar, vefnað og ljósmyndun, þá munu listamennirnir breyta Nes listamiðstöð í sýningarsal og sýna jafnt fullunnin verk og verk í vinnslu. Sumir listamannanna hafa í verkum sínum tekið mið af umhverfi Skagastrandar og nágrenni, sagnaarfinum og samfélagi. Hollenska listakonan AnneMarie van Splunter er að ljúka við heimildarmynd um leikskólann á Skagaströnd, bandaríski listamaðurinn Liz Hope Layton hefur unnið málverk og myndband út frá sögunni um Þórdísi spákonu og ítalska listakonan Barbara Gamper skoðar staðarímynd og sjálfsmynd á Íslandi. Fransk-spænski listamaðurinn Luis Miguel Dominguez málar landslag með bleki á 10 metra langan pappír, mexíkóski listamaðurinn Christian Castañeda Vázquez vinnur að teikningum sem byggja á íslenskum goðsögnum og þýska listakonan Christin Lutze nýtir sér litróf íslenska vetrarins í málverkum sínum. Sid Blevens stundar tónsmíðar á meðan Elsa di Venosa og Hugo Deverchère frá Frakklandi búa til myndband, þar sem þau skoða úr lofti hið tunglkennda landslag Íslands. „Með sífelldan vindinn utandyra hefur Nes listamiðstöð verið vinnustaður okkar nánast allan sólarhringinn þessar vikur. Það hefur verið dýrmæt reynsla fyrir okkur að vinna klukkustundum saman í björtu og rúmgóðu vinnuhúsnæðinu og ganga síðan út um dyrnar í éljaganginn og snjóinn sem ekki var hér í morgun. Á hverjum degi eru landslagið, fjöllin, hafið og láglendið, síbreytileg í litum og ásýnd. Maður verður að vera ansi dofinn til að verða ekki fyrir áhrifum af þróttmikilli náttúrunni - myrkrinu og litum norðurljósanna. Ef vindurinn verður of mikill þá grípum við í næsta ljósastaur og ef skyggnið er aðeins einn metri, þegar við leggjum af stað heim, þá snúum við bara aftur til listamiðstöðvarinnar. Það er nægur matur í ísskápnum, nóg af teppum og nokkrir sófar. Við gætum dvalið í eina eða tvær vikur í listamiðstöðinni ef við þyrftum. Við þurfum ekki að hafa neinar áhyggjur.“ AnneMarie van Splunter, HollandBarbara Gamper, Ítalía/Bretland Christian Castañeda Vázquez, MexíkóChristin Lutze, Þýskaland Claire Pendrigh, ÁstralíaConnie Dekker, Holland Elsa di Venosa, FrakklandHugo Deverchère, Frakkland Liz Hope Layton, USASid Blevins, USA Luis Miguel Dominguez, FrakklandSigbjørn Bratlie, Noregur

Út er kominn bæklingur um veiðivötnin í Skagaheiði. Bæklingurinn er unnin af Sigurði Sigurðarsyni og Róbert F. Gunnarssyni en útgáfan er styrkt af Ferðamálastofu. Bæklingurinn verður til afhendingar á helstu viðkomustöðum ferðamanna á Norðurlandi vestra. Í ritinu er að finna upplýsingar um nærri fjörtíu vötn. Gott kort fylgir og öll vötn sem fjallað er um eru merkt . Í texta er getið um fimm grundvallaratriði um hvert vatn: Veiðileyfi, vegalend frá Skagaströnd, aðkomu, veiði og stærð vatns. Einnig hefur verið reynt að birta myndir af sem flestum vötnum. Í honum er einnig að finna hverjir selja veiðileyfi, hversu langt er að vatni frá Skagaströnd, aðkoma að vatninu, stærð þess og ekki síst hvers konar veiði er von. Í bæklingnum er kort af Skaga og þar má finna helstu leiðir, örnefni, jarðamörk og mörk almenninga. Bæklingurinn er birtur á heimasíðunni og finnst hér: http://www.skagastrond.is/veidi_skaga.pdf

Undanfarnar vikur hefur verið unnið að gerð myndbands um Leikskólann Barnaból í tilefni 35 ára afmælis leikskólans. Verkefnið er unnið í samstarfi leikskólans og Nes listamiðstöðvar en Minningarsjóður hjónanna frá Garði og Vindhæli styrkir verkefnið. Nes listamiðstöð auglýsti eftir listamanni til að koma til Skagastrandar og búa til heimildamyndina og valdi AnneMarie van Splunter frá Hollandi, úr hópi 30 umsækjenda frá 18 löndum. Nemendur í myndbandagerð í grunnskólanum og tónlistarmenn á staðnum taka einnig þátt í verkefninu. Connie Dekker, sem er hollenskur listamaður, mun sjá um ljósmyndaáttinn í verkefninu. Þegar myndin er tilbúin verður forsýning hér á Skagaströnd en einnig mun myndin verða á heimasíðu Nes listamiðstöðvar og listamannanna sjálfra. AnneMarie vill gjarnan að allir núverandi og fyrrverandi nemendur og starfsfólk Barnabóls séu þátttakendur í þessu verkefni. Ef þú, lesandi góður, eða börnin þín hafa einhvern tímann verið á leikskólanum þætti okkur vænt um að þú hefðir samband við AnneMarie; á netfanginu: annemarievansplunter@orange.nl, í farsímann hennar: 0031613018821 eða bara líta við í Nes listamiðstöð. Hún mun verða mjög glöð að sjá þig/ykkur. Myndatakan mun aðeins taka 1-2 mínútur, bara myndataka - engin viðtöl. Ef þú vilt láta taka mynd af þér á einhverjum sérstökum stað eða t.d. með uppáhaldshattinn þinn þá er það bara skemmtilegra. Nánari upplýsingar um listamennina: AnneMarie van Splunter (1962) stundaði nám við Willem de Kooning listaháskólann í Rotterdam en á heima og starfar í Amsterdam. Listaverk hennar eru mjög fjölbreytt og úr margvíslegum efnum. Sjá nánar: www.annemarievansplunter.nl og www.conniedekker.nl Þú getur fylgst með framvindu verkefnisins á vefsíðunni: www.conniedekker.nl/iceland

Ein úthlutun á þessu ári Menningarráð Norðurlands vestra auglýsir eftir umsóknum um verkefnastyrki á grundvelli menningarsamnings mennta- og menningarmálaráðuneytis og iðnaðarráðuneytis við SSNV. Tilgangur styrkjanna er að efla menningarstarf og menningartengda ferðaþjónustu á Norðurlandi vestra. Menningarráð Norðurlands vestra hefur ákveðið að hafa eina úthlutun á árinu 2012, með umsóknarfresti til og með 15. mars. Menningarráð hefur ákveðið að þau verkefni hafi forgang sem uppfylla eitt eða fleiri eftirtalinna atriða: · Fjölga atvinnutækifærum á sviði menningar og lista. · Efla samstarf á sviði menningarmála á svæðinu. · Stuðla að nýsköpun og þróun í menningu og menningartengdri ferðaþjónustu. · Menningarstarfsemi styðji við ferðaþjónustu. · Verkefni sem stuðla að þátttöku allra þjóðfélagshópa í menningarstarfi. · Verkefni sem leiða til samstarfs við önnur lönd á sviði menningar og lista. · Verkefni sem draga fram staðbundin eða svæðisbundin menningareinkenni eða menningararf. Umsækjendur geta verið einstaklingar, félagasamtök, fyrirtæki, stofnanir og sveitarfélög á Norðurlandi vestra. Umsækjendum er bent á að kynna sér nánar Úthlutunarreglur 2012 á www.ssnv.is undir liðnum Menningarráð. Umsóknir skulu vera á eyðublöðum Menningarráðs Norðurlands vestra sem hægt er að nálgast á heimasíðunni www.ssnv.is undir liðnum Menningarráð. Í umsókninni skal m.a. vera greinargóð lýsing á verkefninu með verkáætlun og tímasetningum, ítarleg fjárhagsáætlun (kostnaðar- og tekjuáætlun) og upplýsingar um aðstandendur. Umsóknir skulu sendar Menningarfulltrúa Norðurlands vestra, Einbúastíg 2, 545 Skagaströnd, eigi síðar en 15. mars 2012. Þær má senda rafrænt á netfangið menning@ssnv.is. Séu þær sendar í pósti skulu þær póststimplaðar eigi síðar en síðasta umsóknardag. Allar nánari upplýsingar og aðstoð veitir Ingibergur Guðmundsson menningarfulltrúi Norðurlands vestra, símar 452 2901 / 892 3080, netfang menning@ssnv.is.

Vegna vinnu við vatnsveitu verður vatnslaust á Skagaströnd fimmtudaginn 9. febrúar 2012 frá kl. 14:00 og fram eftir degi Sveitarstjóri.

Nes Listamiðstöð býður þeim sem áhuga hafa í "potluck" miðvikudaginn 8. febrúar kl 18:30 í listamiðstöðinni. Til staðar verða eftirtaldir listamenn sem munu kynna verk sín: · Christin Lutze frá Þýskaland, · Elsa Di Venosa og · Hugo Deverchere frá Frakklandi, · Sigbjørn Bratlie frá Noregi, · Christin Lutze frá Þýskaland, · Liz Hope Layton og · Sid Blevins frá Bandaríkjunum, · Claire Pendrigh Elliott frá Ástralía, · AnneMarie van Splunter og · Connie Dekker frá Holland. Vinsamlegast takið með rétt á hlaðborðið. Fjölskyldur eru hjartanlega velkomnar. Andrea og Jacob

Aðalfundur Kvenfélagsins Einingar verður haldinn fimmtudaginn 9. febrúar n.k. kl. 20:30 í hliðarsal félagsheimilisins Fellsborgar Venjuleg aðalfundastörf Nýjir félagar velkomnir. Kvenfélagið Eining.

„Við bjóðum góðan dag, alla daga“ þetta er kjörorð dags leikskóla sem haldinn er hátíðlegur 6. febrúar ár hvert. Mánudaginn 6. febrúar munu nemendur og kennarar Barnabóls opna listsýningu í Landsbankanum á Skagaströnd með fjölbreyttum verkum eftir nemendur á aldrinum 1-6 ára. Einnig verður farið á skirfstofu sveitarfélagsins þar sem afhent verður plakat með gullkornum leikskólanemenda sem Félaga leikskólakennara og Félaga stjórnenda leikskóla hafa tekið saman. Vonum við að gullkornin eigi eftir að ylja mörgum um hjartarætur. Tilgangurinn er vekja jákvæða umræðu í samfélaginu um leikskólann, um hlutverk leikskóla og starf leikskólakennara. Í febrúar fer af stað samstarfsverkefni milli Leikskólans Barnabóls og Neslistamiðstöðvar í tilefni af 35 ára afmæli leikskólans 7. júní 2012. Hollenska listakonan AnneMarie von Splunter ætlar að gera heimildamynd um leik og starf nemenda Barnabóls og hún mun leitast við að fá til þátttöku eins marga núverandi og fyrrverandi leikskólanemendur og hægt er. Myndin verður sýnd á Skagaströnd, sett á heimsíðu Neslistamiðstöðvar og hugsanlega sýnd á kvikmyndahátíðum. Það er alltaf eitthvað spennandi að gerast í leikskólastarfinu á Barnabóli. 3. febrúar 2012 Þórunn Bernódusdóttir

Ég var að koma heim af kynningarfundi Rarik um hitaveituna okkar, þar komu margar málefnalegar og góðar spurningar fram og ég sem sveitarstjórnarmaður er ánægð með að fólkið í samfélaginu er gagnrýnið og málefnalegt. En einhvernvegin kom sú tilfinning upp hjá mér að mig langaði að segja fólki hver mín hugsun væri í sambandi við hitaveituna. Á undanförnum mánuðum hefur mikið púður farið í pælingar um lagningu hitaveitu til Skagastrandar, ég sem sveitastjórnarmaður tók ákvörðun um að leggja allan minn stuðning við verkefnið „hitaveita á Skagaströnd“ og styrkist í trú minni á verkefninu með hverjum degi. Eins og eðlilegt er hefur skapast mikil umræða um hitaveitu á ýmsum stöðum í okkar frábæra samfélagi og ekkert nema gott um það að segja. Það er auðvitað eðlilegt og sjálfsagt að hver og einn hugsi sitt ráð og sínar lausnir í lífinu. Sumir nálgast málið út frá þeirri hugsun hve lengi þeir ætli sér að búa hérna eða hvort þeir getir reiknað arðsemi af verkefninu fyrir sitt heimili. Aðrir hugsa lengra og velta fyrir sér möguleikum barna sinna og barnabarna. Aðstæður fólks eru mismunandi og engin ein leið eða eitt svar er lausn fyrir alla. Sveitarfélagið og þar með sveitarstjórnin verður hins vegar að hugsa um heildina og í lengri tímabilum. Fólk kemur og fer en byggðin er á sama stað og verður áfram. Við viljum að hún þróist og styrkist eins og kostur er þannig að eftir 50 eða 100 ár verði áfram grundvöllur byggðar. Við byggjum á dugnaði og framsýni þeirra sem á undan gengu og þeir sem á eftir koma eiga að taka við betra búi en við. Það er eðlileg þróun samfélagsins. Ég kem frá Blönduósi og því alin upp við hitaveitu. Ég man að það var mikil breyting fyrir mig að flytja á Skagaströnd og upplifa að þurfa að forgangsraða vatnsnotkun á aðfangadag, að finna þegar kólnaði í íbúðinni þegar það var rafmagnslaust o.fl. Ég sætti mig auðvitað við þetta af því hér vildi ég búa en svo sannarlega tók ég eftir þeim lífsgæðum sem í því eru fólgin að hafa eða hafa ekki hitaveitu. Það er auðvitað alltaf hægt að deila um hvenar er rétti tíminn en okkar tækifæri var núna vegna breytinga á stærð lagnar frá Reykjum að Blönduósi og óvíst hvenar eða hvort svona tækifæri kæmi aftur til okkar. Það var stór ákvörðun að leggja 180 miljónir í hitaveitu en ég tel að þessum fjármunum sé vel fyrir komið í þessu verkefni. Þegar við tökum að okkur að stjórna sveitafélagi verðum við alltaf að hafa að leiðarljósi hag heildarinnar og einnig að hugsa um framtíð sveitafélagsins sem bjarta. Þeir útreikningar og það mat sem við lögðum á þessa fjárfestingu bentu eindregið til þess að fjárhagslega skilaði hún sér vel ef horft er til 20-25 ára svo ekki sé talað um lengri framtíð. Auk þess höfum við fulla trú á að möguleikar atvinnulífs séu miklu meiri en ella þegar hitaveita hefur verið lögð til Skagastrandar. Kæru Skagstrendingar ég vona að við munum standa saman um að byggja upp öfluga hitaveitu til þess að geta boðið Skagaströnd sem enn betri kost fyrir atvinnustarfsemi og einstaklinga sem hafa hug á að færa sig um set, já eða stofna fjölskyldu eða fyrirtæki á okkar frábæra stað. Péturína L. Jakobsdóttir