Þessi mynd var tekin 1947 af horfnu húsi, Viðvík. Húsið stóð ca þar sem er Strandgata 8 er í dag. Húsið var reist á sjöunda áratug 19. aldar en í því var um árabil rekið veitinga- og gistihús undir lok 19. aldarinnar. Það var Ólafur Jósson "vert" frá Helgavatni í Vatnsdal sem rak veitingahúsið ásamt konu sinni Valgerði Narfadóttur. Sagt er að Ólafur hafi verið vel af manni og ekki vílað margt fyrir sér m.a. við að halda uppi lögum og reglu hjá gestum Viðvíkur. Þau hjón áttu sex börn sem mörg hver urðu nafnkunn á Íslandi. Má þar nefna Pétur A. Ólafsson sem var um tíma allt í öllu á Patreksfirði og Láru Ólafsdóttur sem þekkt er úr bók Þórbergs Þórðarsonar: Bréf til Láru. Eftir að Ólafur vert hafði rekið gistihúsið Viðvík í allnokkur ár flutti hann til Akureyrar og gerðist veitingamaður á Oddeyrinni þar. Myndin er í eigu Muna- og Minjasafns Skagastrandar. Gefandi: Jóhann Pétursson Lækjarbakka á Skagaströnd.

FUNDARBOÐ Fundur verður haldinn í sveitarstjórn Skagastrandar miðvikudaginn 9. mars 2016 kl 800 á skrifstofu sveitarfélagsins. Dagskrá: 1. Viðaukar við fjárhagsáætlun 2. Reglur um leiguhúsnæði 3. Gjaldskrár sveitarfélagsins a. Gjaldskrá frístundar b. Gjaldskrá vatnsveitu c. Samþykkt og gjaldskrá byggingarleyfisgjalda 4. Hlutabréf í Tækifæri hf 5. Hólanes ehf, staða verkefnis 6. Bréf: a. Farskóla Norðurlands vestra, dags. 1. febrúar 2016 b. Sigurlaugar I Gísladóttur, dags. 22. janúar 2016 c. USAH, dags í mars 2016 d. Júdófélagsins Pardus, dags. 9. febrúar 2016 e. Styrktarsjóður EBÍ, dags. 22. febrúar 2016 f. Sambands íslenskra sveitarfélaga, dags. 1. mars 2016 7. Fundargerðir: a. Skólanefndar FNV, 22.02.2016 b. Hafnasambands Íslands, 24.02.2016 c. Stjórnar Sambands ísl. sveitarfélaga, 29.01.2016 d. Stjórnar Sambands ísl. sveitarfélaga, 26.02.2016 8. Önnur mál Sveitarstjóri

Komdu þá á fund í Fellsborg um námstækifæri þín hjá nokkrum af skólastofnunum landsins. Fundurinn verður haldinn í Fellsborg miðvikudaginn 9. mars klukkan 17:30. Á fundinn mæta fulltrúar frá: Fjölbraut á Sauðárkróki, Farskólanum, Háskólanum á Bifröst, Háskólanum á Akureyri, Háskólanum að Hólum og menntafyrirtækinu Keili í Reykjanesbæ. Fulltrúarnir munu kynna fjarnám og staðarnám hjá sínum skólum og einnig hver inntökuskilyrði eru, námsgjöld og annað sem skiptir máli. Eftir stuttar framsögur munu fulltrúarnir sitja fyrir svörum og svo verður hægt að fá að hitta fulltrúana einslega ef þess er þörf. Einnig mætir á fundinn fulltrúi frá verkalýðsfélaginu Samstöðu sem mun kynna möguleika á námsstyrkjum frá hinum ýmsu stéttarfélögunum. Áætlað er að fundurinn standi í rúman einn og hálfan klukkutíma. Endilega notaðu tækifærið og mættu á fundinn til að kynna þér möguleikana sem þú átt til aukinnar menntunar. Til fundarins er boðað af hópi áhugafólks um menntun og framfarir í samstarfi við sveitarfélagið Skagaströnd og Farskóla Norðurlands vestra.

Í eldhúsinu í Skátaskálanum . Þessar konur sáu um kaffiveitingar í veislu sem haldin var í Skátaskálanum af óþekktu tilefni sem tengdist Skagstrendingi hf. Veislan fór fram í Skátaskálanum en þar var um þær mundir rekið mötuneyti fyrir menn sem voru að vinna að breytingum á síldarverksmiðjunni. Frá vinstri á myndinni: Anna Sjöfn Jónasdóttir, Guðrún Guðmundsdóttir, Anna H. Aspar (d. 1.9.1999), sem sá um mötuneytið, og Lilja Bernódusdóttir. Myndina tók Jón Jónsson einhverntíma kringum 1980.

Andrea Weber listakona og kennari í listgreinum við skóla í París, hefur gefið út tímarit „Skagaströnd Review“ þar sem hún lætur fortíð og nútíð mætast í myndum og texta. Tilgangur með útgáfunni er að gera listrænt verkefni á tímaritsformi sem er aðgengilegt á alþjóðlegu tungumáli. Að skapa nýjan skapandi vettvang fyrir ljósmyndasafnið og finna nálgun sem hentað komandi kynslóðum. Að gera Skagaströnd betur sýnilega og kynnta sem menningarlegt samfélag, bæði innan lands og utan. Tímaritið „Skagaströnd Review“ er rannsóknar og þróunarverkefni sem Andrea skilar til samfélagsins með fyrstu útgáfu þess. Andrea hefur dvalið nokkrum sinnum í Nes listamiðstöð og komið í reglulegar heimsóknir og tekið ákveðnu ástfóstri við byggðina stofnað til vináttu við marga íbúa á Skagaströnd. Verkefnið hefur verið unnið í samstarfi við sveitarfélagið, Nes listamiðsöð, Rannsóknarsetur Háskóla Íslands og með styrk frá Uppbyggingarsjóði Norðurlands vestra. Andrea býður til útgáfuteitis kl 20.00 fimmtudaginn 3. mars í bókasafninu á efstu hæð Gamla Kaupfélagsins.

Þorbjörg Ragna Þórðardóttir. Ferðin eftir brúnni yfir í annan heim getur verið löng og erfið en við trúum því að þegar yfir brúna er komið líði öllum vel og sjúkdómar, erfiðleikar og áhyggjur séu að baki. Þorbjörg Ragna barðist við sjúkdóm sinn af yfirvegaðri ró þar til yfir lauk og æðraðist ekki. Í veikindunum, eins og reyndar ávallt, var það hin stóra fjölskylda hennar sem var haldreipi hennar og gleði. Þar birtist hringrás lífsins meðal annars í lítilli nýfæddri ömmustelpu sem Ragna fékk að kynnast og gleðjast yfir í nokkra daga áður en hún hóf ferðalagið mikla yfir í heim ljóssins. Við þökkum henni samfylgdina Þorbjörg Ragna Þórðardóttir lést 15. febrúar og verður jarðsungin frá Hólaneskirkju laugardaginn 27. febrúar klukkan 14:00.

Fasteignasalan Domus á Blönduósi hefur fengið til sölumeðferðar raðhús að Suðurvegi 4 á Skagaströnd. Húsið er staðsett við kyrrláta götu í um 350 metra göngufjarlægð frá verlsun og grunnskóla. Gengið er inn í forstofu með fatahengi af framlóð. Til hægri er þvottahús/geymsla, beint áfram er gengið inn á gang sem opnast inn í sameiginlega stofu og borðstofu til hægri. Til vinstri eru svefnherbergi og snyrting. Úr stofunni er gengið inn í eldhús, jafnframt er útgangur um svalahurð á baklóð vestan við húsið. Þrjú svefnherbergi með skápum eru í eigninni, eitt þeirra með svalahurð út á baklóð. Skápar eru í svefnherbergjum. Flísalagt baðherbergi með baðkari Snyrtilegur dúkur er á öðrum gólfum, nýtt ofnakerfi og hitalagnir. Upplýsingar veita Stefán Haraldsson s 440 6170 eða 664 6030 stefan@domus.is eða Stefán Ólafsson hrl. löggiltur fasteignasali s 440 6170 stefano@domus.is http://domus.is/leitarnidurstada/eign/fasteign/364175/

Enn hefur eitt af ljósunum á Skagaströnd slokknað, ljós sem skein skært á sínum tíma og lýsti mörgum leiðina til betra lífs. Þó svo að ljósið hafi dofnað síðustu ár mátti alltaf sækja sér birtu og yl í það með því að hitta Maríu Magnúsdóttur sem nú lýsir á öðrum, ókunnum slóðum. Allir sem til hennar þekktu vissu að þar fór gæða- og gáfumanneskja sem alltaf hafði tíma til að taka á sig krók til að aðstoða þá sem aðstoð þurftu - sérstaklega ef það fór ekki hátt. María var „amman“ í götunni þar sem stundum myndaðist biðröð við eldhúsgluggann hennar á sunnudögum af börnum sem biðu eftir að fá volga pönnuköku afgreidda út um gluggann. Þar fór engin bónleiður til búðar frekar en aðrir sem til Maríu leituðu. María lést á Sæborg 2. febrúar sl. og fer útför hennar fram laugardaginn 20. febrúar frá Hólaneskirkju.

Unglingadeildin er óðum að spjaldvæðast og nú er svo komið að flestir unglinganna koma í skólann með sínar eigin spjaldtölvur. Foreldrafélag skólans ásamt sveitarstjórn Skagastrandar tóku þá ákvörðun að styrkja nemendur um 50% af kaupvirði spjaldtölvu (að hámarki 50.000) og varð sú ákvörðun til þess að flestir nemendur hafa nú eignast tæki. Draumur okkar er að færa spjaldtölvuvæðingu niður á miðstig en spjaldtölvurnar sem voru keyptar inn í unglingadeild í fyrra eru nú flestar komnar inn á miðstig. Kennarar eru vel meðvitaðir um að spjaldtölva ein og sér bætir ekki námsárangur. Hún er hins vegar eitt tæki af mörgum í beitingu fjölbreyttra kennsluhátta og í því að koma til móts við mismunandi þarfir nemenda. Kennarar hafa verið duglegir við að nýta þessa nýju tækni og fylgjast með því sem er að gerast í skólum landsins á þessu sviði. Fyrir stuttu fór hópur kennara til Akureyrar og sótti þar menntasmiðju um notkun spjaldtölvu í kennslu. Einnig fóru nokkrir kennarar í Borgarnes til að hlýða á Ingvar Sigurgeirsson þar sem hann fjallaði um teymiskennslu og fjölbreytta kennsluhætti. Stefnt er að því að fá hann til að koma til okkar í Höfðaskóla og vera með námskeið um þessa þætti kennsluhátta. Fyrir stuttu tóku unglingarnir sig til og kenndu yngsta stiginu á ýmis kennsluforrit (,,öpp“) í stærðfræði. Þetta gaf mjög góða raun og allir kátir og glaðir eins og sjá má á meðfylgjandi mynd. Vera Ósk Valgarðsdóttir

Karl, Einar og Ásgeir. . Þessir þrír heiðursmenn settu svip sinn á Skagaströnd hér á árum áður. Karl Guðmundsson (d.11.12.2011), sem er lengst til vinstri, ólst að mestu upp á Vindhæli í Skagabyggð og átti þar heimili þar til hann flutti til Skagastrandar og stofnaði fjölskyldu með konu sinni Dagnýju Hannesdóttur. Einar Haraldsson (d.14.11.1983) , sem er í miðið, var bóndi að Kjalarlandi í Skagabyggð áður en hann flutti til Skagastrandar með sinni konu, Ólínu Hjartardóttur (d. 27.7.1983) frá Vík. Á Skagaströnd bjuggu þau í Dagsbrún, sem er horfin en stóð u.þ.b. þar sem stjórnsýsluhúsið er nú. Lengst til hægri er svo Ásgeir Axelsson (d. 8.6.2011) bóndi á Litla Felli í Sveitarfélaginu Skagaströnd. Þar bjó hann með konu sinni Sigrúnu Guðmundsdóttur og þeirra fjölskyldu. Allir eru þessir þrír menn minnisstæðir þeim sem til þeirra þekktu.