Á sunnudaginn var, þriðja sunnudag aðventu, vígði sr. Jón Aðalsteinn Baldvinsson sr. Úrsúlu Árnadóttur til þjónustu á Skagaströnd. Athöfnin fór fram í Hólakirkju. Til altaris þjónaði sr. Hjörtur Pálsson. Vígsluvottar voru sr. Gísli Gunnarsson, sr. Sigríður Gunnarsdóttir, sr. Hildur Inga Rúnarsdóttir og sr. Guðni Þór Ólafsson, prófastur í Húnavatnsprófastsdæmi, sem lýsti vígslu. Það var kór Hóladómkirkju sem söng við athöfnina en organisti var Jóhann Bjarnason. Séra Úrsúla hyggst flytja búferlum frá Akranesi yfir hátíðirnar og hefur störf þann 1. janúar á Skagaströnd.

Jólatónleikar Tónlistarskóla A-Hún, á Skagaströnd, fóru fram í Hólaneskirkju 17. desember. Þar komu nemendur skólans fram og léku listir sínar á hljóðfæri. Einnig sungu tveir nemendur skólans. Tónleikarnir voru vel sóttir og nemendum klappað lof í lófa. Meðfylgjandi myndir tók Signý Richter. Efsta myndin: Arnar Páll, Elmar, Anna Dís, Gunnþór, Bergrós Helga, Elías Gunnar, Róbert Björn og Sæunn flytja jólalag ásamt Skarphéðni Einarssyni, kennara þeirra. Á næstu mynd spilar Daði Sveinsson á blokkflautu. Til aðstoðar er Hugrún Sif, kennari hans. Á þriðju myndinni spilar Elín Ósk Björnsdóttir á trompett. Fjórða myndin er af Ívan Árna Róbertssyni. Fimmta myndin er af Valgerði Ingvarsdóttur sem leikur á þverflautu. Á sjöttu myndinni má sjá Róbert Björn Ingvarsson og Skarphéðinn, kennara hans, plokka gítarinn. Sjöunda myndin er af Hebu Líf Jónsdóttur sem þenur harmónikkuna. Áttunda myndin er af Ingibjörgu Maríu Reynisdóttur sem syngur jólalagið vinsæla, Hvít jól við undirleik Páls Szabo.

Þriðji ísbjörninn var alveg lifandi kominn inni í Höfðaskóla í vikunni. Hann var þó algjörlega meinlaus enda aðeins skáldsaga eftir Þorgrím Þráinsson.  Bókina skrifaði Þorgrímur á Skagaströnd síðastliðið sumar en sögusviðið er einmitt í A-Húnavatnssýslu. Hugmyndina af sögunni fékk hann þegar hann dvaldi í sumar í Nes-listamiðstöðinni á Skagaströnd þegar ísbirnir fóru að gera vart við sig í nágrenninu.  Sveitarfélagið Skagaströnd, Skagabyggð, Spákonuarfur og Nes listamiðstöð ákváðu í sameiningu að færa öllum nemendum Höfðaskóla eintak af bókinni að gjöf. Tilgangurinn er að hvetja til bóklestrar og skapandi skrifa.  Þorgrímur mætti í skólann mánudaginn 15. desember, las upp úr bókinn og áritaði auk þess sem hann ræddi við eldri nemendur um gildi frumkvæðis og ábyrgðar á eigin lífi.  Gefendur, í samstarfi við Höfðaskóla, stefna að því á nýju ári að koma á smásagnasamkeppni innan skólans.  

FUNDARBOÐ   Fundur verður haldinn í sveitarstjórn Skagastrandar miðvikudaginn 17. desember 2008 á skrifstofu sveitarfélagsins kl 8:00.   Dagskrá:     1.       Fjárhagsáætlun 2009 a)    Forsendur tekjuáætlunar b)   Rekstraforsendur c)    Bréf Samgönguráðuneytis, dags. 10. desember 2008.   2.       Bréf: a)    UMFÍ, dags. 29. okt. 2008. b)   Menningarráðs Nl. vestra, dags. 31. okt. 2008. c)    Jöfnunarsjóðs sveitarfélaga, dags. 6. nóv. 2008. d)   Jöfnunarsjóðs sveitarfélaga, dags. 5. nóv. 2008. e)    Farskólans, dags. 10. nóv. 2008. f)     Heilbrigðisráðuneytisins, dags. 21. nóv. 2008. g)    Vinnumarkaðsráðs Nl. vestra, dags. 19. nóv. 2008. h)   Snorraverkefnisins, 28. nóv. 2008. i)     Þjóðhátíðarsjóðs, dags. 1. des. 2008. j)     Stígamóta, 28. nóv. 2008. k)   Sturlu Böðvarssonar, 1. þingm. Nv kjördæmis, dags. 2. des. 2008. l)     Ámundakinnar, dags. 10. des. 2008. m)  EBI Brunabótar, 12. des. 2008.     3.       Fundargerðir: a)        Byggðasamlags um Tónlistarskóla A-Hún. 11.11.2008. b)        Byggðasamalags um Atvinnu- og menningarmál, 2.12.2008. c)        Stjórnar Norðurár bs. 3.12.2008 d)        Stjórnar SSNV, 8.12.2008.   4.       Önnur mál   Sveitarstjóri  

Lárus Ægir Guðmundsson hefur stofnað styrktarsjóð til eflingar menningar- og listalíf á Skagaströnd og Skagabyggð. Sjóðnum er einnig ætlað að greiða styrki til þeirra sem verða fyrir slysum eða alvarlegum veikindum og þarfnast aðstoðar. Stofnfé sjóðsins eru 50 milljónir króna og áætlað að stykir úr honum geti numið allt að 5 milljónur á ári. Lárus Ægir er borinn og barnfæddur á Skagaströnd, rætur hans liggja þar sem hefur hann starfað mestan hluta ævi sinnar. Af þeim verkefnum sem hann hefur unnið að má nefna þessi: ·    Sveitarstjóri á Skagaströnd frá árinu 1972 til 1984 ·    Framkvæmdastjóri frystihússins Hólanes frá 1984 til 1994 ·    Stofnandi, eigandi fiskmarkaðarins Örva á Skagaströnd, framkvæmdastjóri hans frá 1994 til 2007 Lárus Ægir hefur sinnt fjölmörgum málum sem til framfara hafa horft á Skagaströnd. Hann keypti meðal annars í félagi við aðra gamla kaupfélagshúsið og gerði það upp. Húsið hefur að hluta til þegar verið tekið í notkun og í því eru skrifstofur Menningarráðs Norðurlands vestra og BioPol ehf. Hann átti líka þátt í að kaupa húsið sem áður var frystihúsið Hólanes en til stendur að breyta því og finna hentuga starfsemi fyrir það. Í síðustu viku kynnti Lárus Ægir styrktarsjóðinn með bréfi sem hann sendi til allra íbúa á Skagaströnd og Skagabyggð. Bréfið fer hér á eftir: Ég – Lárus Ægir Guðmundsson – stofnaði í upphafi þessa árs styrktarsjóð sem ber nafnið Minningarsjóður um hjónin frá Garði og Vindhæli. Hann er stofnaður til minningar um afa mína og ömmur í föður- og móðurætt, þau Helgu Þorbergsdóttur og Jóhannes Pálsson sem bjuggu í Garði á Skagaströnd og Láru Kristjánsdóttur og Lárus G. Guðmundsson sem bjuggu á Vindhæli í Skagabyggð og síðar á Skagaströnd. Stofnfé sjóðsins er 50 milljónir króna og er hér formlega greint frá tilvist hans. Tilgangur sjóðsins er að efla og styrkja menningar- og listalíf í Sveitarfélaginu Skagaströnd og í Skagabyggð í víðtækri merkingu þessara orða. Jafnframt er heimilt að greiða styrki til þeirra sem verða fyrir slysum eða alvarlegum veikindum og þarfnast aðstoðar. Ástæða stofnunar sjóðsins er sú að ég hef átt mitt dagsverk í þessari byggð og þykir vænt um hana. Hér hefur mér vegnað vel og vil því gjarnan láta samborgara mína njóta í nokkru góðs af afrakstri starfa minna. Í stjórn sjóðsins eru börn mín þrjú, þau Stefán Ægir, Soffía og Erla María og er það í þeirra höndum að ákveða og sjá um úthlutanir úr sjóðnum en styrkir úr honum geta numið allt að 4-5 milljónum króna á hverju ári. Ég vil hvetja einstaklinga og félög, sem hafa hugmyndir og áform sem falla að tilgangi framangreinds sjóðs, að hafa samband við stjórnendur hans með formlegri umsókn þar sem gerð er góð grein fyrir viðkomandi máli. Gert er ráð fyrir að úthlutað verði úr sjóðnum þrisvar til fjórum sinnum á ári. Ekki verður um sérstakan umsóknarfrest að ræða heldur má senda inn umsóknir hvenær sem er og skulu þær berast til Soffíu Lárusdóttur, Tröllateig 24, 270 Mosfellsbæ. Nú er lag til að láta gamminn geysa og horfa til þess hvort ekki kunni að leynast ýmsar hugmyndir varðandi viðburði sem gaman væri að hrinda í framkvæmd fljótlega, sem og á næstu misserum og árum. Bestu kveðjur, Lárus Ægir Guðmundsson        

Skagaströnd hefur fengið 10,8 milljóna króna framlag vegna tímabundins samdráttar í aflamarki þorsks á árinu. Þetta er hluti af 250 milljóna króna framlagi ríkissjóðs til sveitarfélaga á landinu. Tvö sveitarfélög á Norðurlandi vestra fá úthlutað að þessu sinni en það eru Skagaströnd sem fær 10.754.656 og Skagafjörður sem fær 4.231.041 Úthlutunin nú byggist á sambærilegum forsendum og árið 2007 sem er áhrif ákvörðunar um aflaniðurskurð á einstök sveitarfélög þar sem aflamark er skráð. Þó er að þessu sinni miðað við minnkun aflamarks eins og það var í hverju sveitarfélagi um sig þann 1. september 2007, en ekki meðaltal úthlutaðs aflamarks nokkur fiskveiðiár þar á undan eins og gert var fyrir ári.  Framlagið kemur frá samgönguráðuneytinu sem telur að með framlaginu sé betur mætt áhrifum af niðurskurði í aflamarki þorsks í hverju sveitarfélagi þar sem skoðuð er staða aflamarks við upphaf þess tíma er niðurskurðurinn tók gildi. Alls er 200 milljónum króna varið til þessa þáttar. Þá er sú breyting gerð nú, að sérstakt tillit er tekið til breytinga sem átt hafa sér stað í lönduðum afla milli fiskveiðiáranna 2006-2007 og 2007-2008. Alls er 50 milljónum króna varið til þessa þáttar, en framlaginu er ætlað að mæta minnkandi umsvifum í starfsemi hafna vegna ákvörðunar um niðurskurð í aflamarki þorsks. Við úthlutunina var tekið mið af því, að vægi ofangreindra þátta er misjafnt í atvinnustarfsemi einstakra sveitarfélaga. Ennfremur var ákveðið að hámarksúthlutun til einstakra sveitarfélaga yrði 35 milljónir króna. Markmið úthlutunarinnar er að framlag renni til þeirra sveitarfélaga sem verða fyrir umtalsverðum áhrifum vegna hins tímabundna samdráttar í þorskafla.

Skagstrendingar stofnuðu Gleðibanka í gærkvöldi að viðstöddum fjölda manns. Allir sem einn staðgreiddu þeir hlut sinn og gekk afgreiðslan afar fljótt fyrir sig enda var enginn hörgull á greiðslu. Í dag gengu svo umboðsmenn Gleðibankans í fyrirtæki og keyptu allir sem ekki gátu mætt á stofnfundinn. Fyrsta verk Gleðibankans var svo að gefa út  svokallað Gleðikort. Fyrir það fæst veglegur afsláttur í helstu verslunum, veitingahúsum, söluskálum og bensínstöðvum á Skagaströnd, en þau eru Kántrýbær, Söluskálinn, Olís og matvöruverslunin Samkaup Úrval. Líkur benda til þess að allir Skagstrendingar hafi nú fengið Gleðikort og muni nota það á morgun en þá er Afsláttardagurinn mikli á Skagaströnd og þann dag gildir kortið. Eftir stofnun bankans var gengið til gleðistarfa. Sýndar voru myndir frá skeri nokkru sem er enn kaldara en klaki vor, sagðar voru örskopsögur af Skagstrendingum, leikin var syrpa af jólalögum og í boði Sjóvá fengu gestir kaffi og kökur eins og hver gat í sig  látið. Þess má hér geta að engin krosstengsl eru á milli Gleðibankans og Sjóvá en þó er meira en hugsanlegt að fyrrnefnda fyrirtækið reyni að taka hið síðarnefnda yfir áður en langt um líður. Gjaldmiðill Gleðibankans er bros. Hluturinn í bankanum er þannig virtur á eitt þúsund bros en gangvirðið er að öllum líkindum miklu hærra og tala menn um fjölda brosa, jafnvel hlátra í því sambandi. Það óvenjulega við hlutabréf í Gleðibankanum er að hann er ævarandi bundin þeim sem keypti hann. Arðurinn er skattfrjáls en engu að síður framtalsskyldur. Gerð skal grein fyrir eigninni á blaðsíðu 1 á framtali, lið 1.4. Þar skal rita eftirfarandi texta: "Undirritaður á 1.000 bros í Gleðibankanum en það eru ómetanleg auðæfi og algjörlega skattfrjáls samkvæmt heilbrigðri skynsemi." Síðan skal bæta við broskalli :-) og helst lita hann gulan. Gleðibanki Skagastrandar getur ekki orðið gjaldþrota (það var að vísu líka sagt um gömlu bankana!). Bankinn hefur grínlausa milligöngu um varðveislu verðmæta, hvort heldur þau eru í gríni, skopi eða öðrum gleðigjaldeyri. Hann annast gleðivísitölu, gætir að gengi gríns miðað við aðra miðla og gefur út gleðikort, gleðipillur og gleðibréf af öllu tagi fyrir gleðimenn og konur. Í trúnaði sagt er einlægur tilgangur stofnenda Gleðibankans á Skagaströnd að hvetja til bjartsýni. Þrátt fyrir alvarlega stöðu þjóðarinnar telja þeir ekki ástæðu til að leggjast í þunglyndi eða berja á náunganum þrátt fyrir smávægilegan skoðanaágreining á þeim málum sem nú er sem mest rætt um. Við þurfum að vera bjartsýn, sýna hverju öðru velvilja og það er fyrst og fremst gert með því að fólk sýni tilfinningar sínar og brosi, það eykur viðskiptin við bankann. Gleðibankinn er fyrst og fremst spurning um hugarfar. Skagstrendingum finnst nauðsynlegt að geta litið upp frá bölsýni og barlómi og horft á það sem eykur þor og bjartsýni. Nú eru líka að koma jól og brátt fer sól að hækka á lofti. Gleðibankinn er vettvangur til að láta sér líða vel enda heimsendir ekki í nánd eftir því sem best er vitað. Hlutabréfin eru stæling á því sem við getum átt í veraldlegum eignum, því sem ryðgar bara og fúnar - það er ekkert grín ... Hins vegar er ekkert eins og gleðin sem á sína bestu birtingarmynd í einlægu brosi. Þessu öllu til staðfestingar þá rituðu stofnendur Gleðibankans þau orð sem þeim finnst vera mest íþyngjandi á litla miða. Þetta voru m.a. orð eins og kreppa, þunglyndi, bankar, skuldir, milljarðar, gjaldþrot, spilling, atvinnuleysi, útrás og verðbólga. Miðunum var síðan troðið í fallbyssu Skagstrendinga og í lok fundarins var skotið úr henni. Brunnu þar upp miðarnir og þar með voru vandamálin fyrir bí - þeim var beinlínis skotið út í veður og hvassan vind. Fundu Skagstrendingar allir sem einn að þeim var mikið létt eftir þennan gjörning og sneru léttir í lund heim á leið.

Stjórn Vaxtassamnings Norðurlands vestra úthlutaði í síðustu viku 20.4 milljónum króna til nokkurra verkefna sem byggðar eru á umsóknum.Sótt var um tæpar 62 milljónir króna í 27 umsóknum. Stjórnin ákvað að úthluta samtals kr. 20.400.000, og skiptist sú upphæð í kr. 15.000.000 í peningum og andvirði kr. 5.400.000 í sérfræðiaðstoð sem bakhjarlar VNV leggja fram (sjá vef VNV).   Skagafjörður Árlega sækja tugþúsundir ferðamanna Byggðasafnið í Glaumbæ heim og þar er orðið verulega aðkallandi að skipuleggja, endurbæta og stækka aðstöðuna. Til að svo megi verða þarf að ljúka tilteknum áföngum í fornleifarannsóknum á safnssvæðinu í Glaumbæ. Fornleifadeild Byggðsafns Skagfirðinga og samstarfsaðilar hennar hljóta til þess styrk að upphæð kr. 1.000.000.   Félag  ferðaþjónustunnar í Skagafirði, ásamt allnokkrum ferðaþjónustuaðilum í sama héraði, hefur uppi áform um stofnun  ferðamiðstöðvar með það að markmiði að koma á framfæri þeim vörum og  þjónustu sem í boði eru á svæðinu og vera um leið n. k. bókunarmiðstöð. Verkefnið hlýtur styrk að upphæð kr. 1.500.000, auk fyrirheits um sérfræðiaðstoð að andvirði allt að kr. 500.000.   Nú er mikil vakning á meðal sláturleyfishafa og margra annarra um að bæta nýtingu og auka verðmæti ýmiss konar hliðarafurða úr slátrun og kjötvinnslu. Kjötafurðastöð Kaupfélags Skagfirðinga og MATÍS (sem nýverið opnaði starfsstöð á Sauðárkróki) fá kr. 2.000.000. til rannsókna og vöruþróunar á þessu sviði.   Blönduós Handverkshús á Blönduósi er verkefni, sem fyrirtækin Sigurberg  og Blanda vinna að í sameiningu. Stjórn VNV leggur þessum fyrirtækjum til sérfræðiaðstoð að andvirði allt að kr. 500.000, til frekari þróunar á hugmyndinni.   Laxasetur á Blönduósi er verkefni, sem Alva Kristín Ævarsdóttir hefur forgöngu um, og nýtur hún m. a.  fulltingis  Landssambands veiðifélaga og Blönduóssbæjar. Verkefnið hlýtur kr.  500.000 í peningum og kr. 400.000 á formi sérfræðiaðstoðar.   Húnaþing vestra Hýruspor er vinnuheiti verkefnis, sem unnið hefur verið að um allnokkurt skeið. Markmiðið er að efla samstöðu og samvinnu þeirra sem búa og starfa á Norðurlandi vestra og byggja afkomu sína að meira eða minna leyti á íslenska hestinum. Ætlunin er að stofna formleg samtök sem skulu starfa í anda svokallaðrar „samstarfskeppni“ og er gert ráð fyrir kynningar- og stofnfundum í upphafi ársins 2009. Aðild verður opin öllum þeim, sem falla undir áðurnefnda skilgreiningu og eru tilbúnir að starfa undir þessum formerkjum. Meðal forgönguaðila eru Krossaneshestar, Sveitasetrið á Gauksmýri, Íslenskar hestasýningar og Sögusetur íslenska hestsins, auk Ferðamálasamtaka Norðurlands vestra. Verkefnið hlýtur styrk að upphæð kr. 2.000.000, auk allt að kr. 1.000.000 á formi sérfræðiaðstoðar.   Skagaströnd Á Skagaströnd hefur um árabil verið unnið að vöruþróun á sviði bragð- og íblöndunarefna. Meðal annars er þar komin á nokkurn rekspöl þróun á bragðkjörnum byggðum á þangi. Fyrirtækin H-59 og MarinAgra hljóta styrk að upphæð kr. 2.500.000 til frekari þróunar og áætlanagerðar.   Möguleikar til kræklingaeldis í Húnaflóa eru til skoðunar hjá áhugasömum hópi einstaklinga og fyrirtækja á Skagaströnd. Fyrir þessum hópi fer fiskeldisfræðingurinn Jón Örn  Stefánsson. VNV leggur fram kr. 1.000.000 til að afla nauðsynlegra gagna til þess að leggja mat á  hvort kræklingarækt getur verið fýsilegur kostur til atvinnuuppbyggingar við Húnaflóa.  Til viðbótar getur komið sérfræðiaðstoð frá bakhjörlum VNV, að andvirði allt að kr. 1.500.000.   Fyrir allt svæðið Markaðsskrifstofa ferðamála á Norðurlandi vinnur að kynningarmyndbandi (DVD) um Norðurland  allt. VNV leggur verkefninu til kr. 500.000. Hveravellir  eru áningarstaður á fjölfarinni leið og nokkurs konar hlið að Norðurlandi vestra, ef komið er sunnan Kjöl. Undanfarin sumur hafa á milli 40 og 50 þúsund manns lagt leið sína á Hveravelli yfir sumarið  og þar bráðliggur orðið á að taka til hendinni, bæði með tilliti til bættrar aðstöðu og þjónustu, sem og  til verndar  hinni stórbrotnu náttúru og sögulegra minja á staðnum. Stjórn VNV hefur ákveðið að leggja Hveravallafélaginu og samstarfsaðilum þess til framlag að upphæð kr. 1.500.000 í peningum, og sérfræðiaðstoð fyrir allt að kr. 1.000.000.   Wild North er fjölþjóðlegt verkefni og eru helstu markmið þess uppbygging sjálfbærrar, náttúrutengdrar ferðaþjónustu á Norðurslóðum, og að treysta með því undirstöður greinarinnar, afkomu þeirra sem í henni vinna og notkun auðlindarinnar til langs tíma. Ferðaþjónustuaðilar og vísindamenn leggjast á eitt um að kanna áhrif ferðamennsku á atferli villtra dýra, með það fyrir augum að ferðamennskan hafi sem minnst áhrif á atferli dýranna og þannig á lífríkið allt. Þátttakendur af Norðurlandi vestra eru m. a. Náttúrustofa Norðurlands vestra, Æðarvarp ehf. á Illugastöðum  og Hólaskóli – Háskólinn á Hólum, auk Selaseturs Íslands sem er leiðandi í verkefninu. Meðal annarra íslenskra þátttakenda má nefna Melrakkasetur á Súðavík, Fræðasetur Háskóla Íslands á Húsavík og ferðaþjónustufyrirtækið Norðursigling í sama bæ. Auk þess koma grænlenskir, færeyskir, norskir og skoskir þátttakendur að verkefninu, sem lesa má nánar um á vefnum http://www.thewildnorth.org/ . VNV leggur verkefninu til kr.2.500.000 í peningum, auk sérfræðiaðstoðar allt að andvirði kr. 500.000.

Fimmtudaginn 11.desember kl. 20.oo Prjónakaffi og jólamarkaður í Kvennaskólanum á Blönduósi. Safnbúð og kaffistofa Heimilisiðnaðarsafnsis er einnig opin. Jólamarkaður – vandað handverk til sölu Prjónakaffi - áhugasamir eru hvattir til að mæta með prjóna eða aðra handavinnu og eiga notalega kvöldstund saman. Heimilisiðnaðarsafnið – safnbúðin og kaffistofan eru opin. Handverksfólk sem hefur áhuga á því að selja á markaðnum er bent á að hafa samband við Ásdísi gsm. 894-9030 TEXTÍLSETUR ÍSLANDS Kvennaskólanum Árbraut 31, Blönduósi 452 4300 - 894 9030 textilsetur@simnet.is www.textilsetur.is

Á miðvikudagskvöldið 10. desember kl. 20:30 verður haldin skemmtun í Bjarmanesi. Um er að ræða dálitla tilraun til að vega upp á móti niðurdrepandi krepputali og bölsýni. Fyrir framtakinu stendur hópur Skagstrendinga sem finnst tilveran of góð til að eyða henni í stöðuganbarlóm: „Við neitum því að láta kreppuna stjórna lífi okkar heldur tökum á móti jólum og hækkandi sól með gleði í hjarta ... Þess vegna ætlum við að koma saman og stofna Gleðibankann.“ Dagskrá kvöldsins Gleðibankinn, kynning og stofnun Skagstrendskar skopsögur Sagt frá skeri nokkru sem er enn kaldara, í máli og myndum Afsláttardagurinn kynntur og gleðikortið afhent Tónlist, uppspretta gleðinnar Upplestur úr jólabókum Afhending hlutabréfa Fallbyssan: Öllu neikvæðu skotið út í hafsauga Kaffi, kakó og kökur í boði Sjóvá Við skrifum bölsýnina og vandamálin á litla miða, setjum þá í fallbyssuna og svo skjótum við ófögnuðinum út í geiminn. Búið ...!! Afsláttardagurinn Föstudaginn 12. desember 2008 veita eftirtalin fyrirtæki á Skagaströnd afslátt gegn framvísun gleðikortsins: • SamkaupÚrval ..... 5%*) • Kántrýbær ............ 10%*) • Söluskálinn ...........10%*) • Olís ....................... 5 krónu afsláttur af eldsneyti. *) Afslátturinn gildir ekki fyrir áfengi og tóbak. Öllum er heimill aðgangur að skemmtuninni og er ekki krafist neins aðgangseyris.