Síðastliðinn þriðjudag og miðvikudag dvöldu hér góðir gestir frá Ringerike. Þetta voru aðstoðarskólastjóri Hov Ungdomsskole í Hönefoss (Ringerike), mæður tveggja nemenda í 10. bekk og tveir myndatökumenn. Tilgangur heimsóknarinnar var að undirbúa nemendasamskipti Hov Ungdomsskole og Höfðaskóla næsta vor og kynnast aðstæðum hér á landi en einnig eru Norðmennirnir að vinna að gerð myndbands um allan undirbúning og framkvæmd nemendasamskiptanna. Nemendur 9. og 10. bekkjar Höfðaskóla hafa undanfarið ár verið í samskiptum við nemendur 10. bekkjar í Hov Ungdomsskole í Hönefoss, vinabæ Skagastrandar í Noregi. Ástæða samskiptanna er væntanleg utanlandsferð þessara nemenda Höfðaskóla til Hönefoss í maí á næsta ári og heimsókn 10. bekkjar frá Hönefoss í byrjun júní sama ár. Þrátt fyrir að kennaraverkfall hindraði eðlilegt skólastarf þá hittu Norðmennirnir nemendur 9. og 10. bekkjar utan skólans, kynntust félagslífi og áhugamálum þeirra ásamt því að skoða atvinnulífið í staðnum. Þá gistu þeir á heimilum foreldra nemenda í 9. og 10. bekk.

Nýtt björgunarskip Björgunarsveitin Strönd og Björgunarbátasjóður Húnaflóa eru nú komin með samkomulag við Landsbjörgu um kaup á björgunarskipi frá Bretlandi. Með góðum stuðning sveitarfélaga við Húnaflóa, fyrirtækja og einstaklinga hefur tekist að fjármagna skipið með þeim hætti að ljóst er að það mun koma til landsins innan fárra vikna. Um er að ræða öflugt skip af sömu gerð og sýnt var í Skagastrandarhöfn um síðustu páska. Starfsmaður óskast Björgunarbátasjóður auglýsir eftir starfsmanni í 50% starf til og hafa umsjón með björgunarskipinu, viðhaldi þess og búnaði. Hann hafi einnig það hlutverk að annast eftirlit með skipinu í höfn og bera ábyrgð á leiðbeiningum og æfingum áhafnar skipsins. Nánari upplýsingar um starfið veitir Reynir Lýðs. Umsóknarfrestur er til 25. október 2004. Nafn á skipið Björgunarbátasjóður leitar jafnframt eftir nafni á hið nýja björgunarskip. Hugmyndakassi verður settur upp í söluskálanum og björgunarsveitarmenn taka einnig við hugmyndum. Nýr björgunarsveitarbíll Björgunarsveitin hefur fest kaup á nýrri Toyota Land Cruiser 90 bifreið. Bíllinn er í breytingu fyrir 38” dekk og jafnframt verður settur í hann allur sá búnaður sem björgunarsveitir gera kröfur um í bíla sína. Sveitin mun fá hann afhentan í byrjun nóvember. Við það tækifæri verður bíllinn til sýnis og jafnframt mun Toyota hafa bílasýningu á Skagaströnd. Þökkum góðan stuðning við starf okkar, stjórn Björgunarsveitarinnar Strandar.

Fundur verður haldinn í Hreppsnefnd Höfðahrepps þriðjudaginn 12. október 2004 á skrifstofu hreppsins kl 16.00. Dagskrá: 1. Tillögur sameiningarnefndar um breytingar á sveitarfélagaskipan. 2. Erindi hreppsnefndar til fjárlaganefndar. 3. Námsstofa – tenging FS nets. 4. Byggðakvóti – umsókn um byggðakvóta 5. Starfsleyfi fyrir sorpurðun Höfðahrepps í landi Neðri Harrastaða 6. Gjaldskrá fyrir hundahald 7. Bréf a) Lánasjóðs sveitarfélaga, dags. 28. sept. 2004. b) SSNV um aukaársþing, dags. 24. sept. 2004. c) Sambands íslenskra sveitarfélaga um fjármálaráðstefnu, dags. 3. sept. 2004. d) Sambands íslenskra sveitarfélaga um landsþing, dags. 21. september e) Stéttarfélagsins Samstöðu, dags. í september 2004. f) Norræna félagsins í Ringerike, dags. 13. sept. 2004. g) Svavars Sigurðssonar, dags. 3. sept. 2004. h) Undirbúningshóps um stofnun textílseturs, dags. 20. sept. 2004. 8. Fundargerðir: a) Byggingarnefndar, 20. ágúst 2004. b) Leikskólanefndar, 15. sept. 2004. c) Skólanefndar, 16. sept. 2004. d) Stjórnar SSNV, 27. ágúst 2004. e) Stjórnar SSNV, 1. sept. 2004. f) Framkvæmdaráðs um svæðisskipulag, 24. ágúst 2004. g) Heilbrigðisnefndar Nl.v. 28. sept. 2004. h) Launanefndar sveitarfélaga, 15. sept. 2004. 9. Önnur mál.

Ævintýrið Skrapatungurétt Stóðsmölun og réttir í A-Húnavatnssýslu Dagana 18. og 19. september verður mikið fjör í Austur Húnavatnssýslu, stóðsmölun á Laxárdal og réttir í Skrapatungurétt. Gestir eiga þess kost að slást í för með gangnamönnum á eyðidalnum Laxárdal og upplifa alvöru þjóðlegt ævintýri. Þátttakendur geta leigt hesta hjá heimamönnum eða mætt með sína eigin hesta. Stóðhrossin verða rekin til byggða á laugardeginum 18. september. Lagt er af stað frá Strjúgsstöðum í Langadal kl. 10. og síðan riðið sem leið liggur um Strjúgsskarð og norður Laxárdal. Þeir reiðmenn sem koma með hesta sína á föstudegi í Strjúgsstaði eru beðnir að hafa samband við landeigenda í síma 846 0411. Við Kirkjuskarðsrétt á Laxárdal, hvíla hestar og menn og fá sér að eta og drekka eftir þörfum. Veitingar verða seldar á staðnum. Ráðgert er að leggja af stað kl. 16 frá Kirkjuskarði. Þaðan er riðið norður í Skrapatungrétt sem er ein myndarlegasta stóðrétt landsins. Þátttakendur eru beðnir að virða það, að ekki er leyfilegt að reka laus reiðhross í stóðsmöluninni. Gestir og heimamenn heillast ávallt af tignarlegu stóðinu sem telur hundruð. Í ár hefur verið búið til nýtt embætti í kringum þennan viðburð, ferðamannafjallkóngur. Fyrstur til að bera þann titil er Valgarður Hilmarsson forseti bæjarstjórnar Blönduóss. Ferðamannafjallkóngurinn, sem er heimavanur á þessum slóðum, mun sjá um fararstjórn og leiðsögn ferðamanna í stóðsmöluninni. Fyrir þá sem heldur vilja koma á bíl til að fylgjast með gangnamönnum og réttarstörfum, er rétt að benda á að Skrapatungurétt er í um 15 mín. akstursfjarlægð frá Blönduósi en fram að Kirkjuskarðsrétt er aksturstími um 40 mín. Á laugardagskvöldinu kl 20 verður haldið til grillveislu í reiðhöllinni við Blönduós. Þeir sem vilja snæða í grillveislunni er beðnir að panta fyrir hádegi föstudaginn 17.september í síma 452 7171 eða 896 6011. Partýstemningin nær svo hámarki á dansleik síðar um kvöldið í Félagsheimili Blönduóss. Á Réttardansleiknum leikur hljómsveitin Sixties fyrir dansi. Á sunnudagsmorgun hefjast réttarhöld í Skrapatungurétt um kl. 10. Bændur ganga í sundur hross sín og reka þau svo í lok dags til síns heima. Oft finna menn og konur sinn draumagæðing í smalamennskunni eða í réttunum. Mikið úrval söluhrossa verður á boðstólnum í Skrapatungurétt og hægt að gera góð kaup. Stóðréttarhelgi Skrapatunguréttar er hátíð heimamanna og ferðafólks þar sem er spilað sungið og skemmt sér að sið Íslendinga. Allir eru gestir eru hjartanlega velkomnir. Nánari upplýsingar og bókanir í stóðsmölun, í síma 891 7863 eða í netfangi haukur@anv.is

Togarinn Örvar HU 2 sem fara átti í slipp í Póllandi á næstu dögum fer ekki fyrr en í byrjun janúar á næsta ári. Ástæður þessarar seinkunar er að skipasmíðastöðin sem átti að taka hann upp hefur mikið af verkefnum og seinkaði því slipptökunni. Togarinn kom inn til löndunar fyrir mánaðarmótin og landaði rúmum 250 tonnum af unnum afurðum. Afli skipsins í síðustu veiðiferð mun því hafa verið nærri 350 tonn upp úr sjó, aðallega grálúða. Aflaverðmæti var um 65 milljónir króna eftir 38 úthaldsdaga. Örvar mun halda til veiða í næstu viku á þriðjudag - miðvikudag.

Slysavarnaskóli sjómanna kom til Skagastrandar dagana 2.-3. september sl. með skólaskipið Sæbjörgu vegna endurmenntunarnámskeiðs sjómanna. Námskeiðið sóttu um 30 sjómenn. Námskeiðið var hnitmiðað og vel að því staðið frá hend Sæbjargarmanna, þar var farið yfir helstu atriði sem geta komið fyrir út á rúmsjó. Má þar m.a. nefna: eldvarnir, meðferð slökkvubúnaðar, björgun manna á sjó með ýmsum búnaði og meðferð gúmmibjörgunarbáta. Björgunarsveitin Strönd á Skagaströnd og Björgunarsveitin Blanda á Blönduósi komu fyrir fluglínutækjum frá fjöru út í grjótgarð þar sem björgunarsveitirnar sýndu meðferð þeirra og menn dregnir á milli í björgunarstól. Þegar upp var staðið voru menn virkilega ánægðir með komu Sæbjargar og telja þetta nauðsynlegan þátt í fræðslu sjómanna. Í lokin fengu þátttakendur skirteini um þátttökuna (maritime safety and survival training centre). Unglingadeild björgunarsveitarinnar Strandar fékk kynningu í meðferð slöngubáta, bæði bóklega og verklega kennslu. Unglingarnir fengu að nota slöngubátana á rúmsjó og tóku þátt í æfingum í björgun fólks úr sjó. Og fengu kynningu á notkun neyðarbúnaðar skipa bæði gúmmíbjörgunarbáta og búnaði sem í þeim er. Unglingadeildin tók virkan þátt í undirbúningi námskeiðsins og hjálpuð til við að koma fluglínubúnaði fyrir. Alls tóku 12 unglingar þátt í æfingunni.

Opna KB banka golfmótið á Skagaströnd var haldið í frábæru veðri í laugardaginn 21. ágúst. Mót þetta sem jafnframt er minningarmót um Karl Berndsen tókst í alla staði vel. Keppendur voru 34 frá 10 golfklúbbum. Sigurvegari í kvennaflokki án forgjafar varð Árný L. Árnadóttir GSS á 86 höggum. Hún sigraði einnig með forgjöf og lék á 77 höggum. Í karlaflokki án forgjafar sigraði Jóhann Ö. Bjarkason GSS eftir bráðabana við Pál Valgeirsson GOS, léku þeir á 83 höggum. Með forgjöf sigraði Guðjón H. Sigurbjörnsson GSK á 66 höggum.

Vinnuskólinn hófst í sumar þann 8. júní og lauk þann 17. ágúst. Í sumar var mikil gróska og mikið fjör og tóku nýir flokkstjórar við krökkunum og báru þær báðar sama nafnið “Heiða” eða Heiðurnar eins og krakkarnir kölluðu þær. Í vinnuskólanum voru á bilinu 25- 30 unglingar sem sinntu bæði stórum og smáum verkum. Áhersla var lögð á að bærinn okkar væri sem fallegastur, en minna var um slátt þetta sumar vegna lítilla rigninar og vöxtur í grasi var því ekki mikill. Vinnuskólinn sá einng um að tína rusl, sópa götur bæarins og plokka íllgresi úr sprungum í gangstéttum. Sérstakir arfa og íllgresis leiðangrar voru farnir um allan bæinn þar sem njólinn var lagður í einelti og höggvinn hvar sem til hans sást. Vinnskólinn sá að mestu um að tjaldstæðið í bænum liti vel út í sumar. Vinnskólastarfinu lauk með ferð sem var hreint ótrúleg, því farið var í RAFTING þar sem róið og flotið var niður vestari Jökulsá í Skagafirði. Eins og gefur að skilja með kraftmikinn unglingahóp var mikið fjör í þeirri ferð. Auðvitað lentu margir í ánni. Allir komu þó heilir heim en misjafnlega blautir. Eftir slark í Jökulsá var haldið á Ólafshús á Sauðárkróki í dýrindis pizzu hlaðborð að hætti Óla og svo að lokum var haldið heim á Ströndina Að lokum viljum við Heiðurnar þakka öllum þeim sem voru í vinnuskólanum fyrir frábært sumar Takk fyrir okkur. Heiðurnar

Þriðjudaginn 17. ágúst var líflegt að líta yfir hafnarsvæðið. Verið var að landa úr Arnari HU og Örvar HU kom inn til að taka olíu. Auk þess var talsvert landað úr hraðfiskibátum sem hafa aflað bærilega að undanförnu. Togarinn Örvar heldur síðan á veiðar á ný og kemur aftur inn til löndunar um mánaðarmótin en þá verður skipið búið að vera á veiðum í um 38 daga. Afliabrögð togaranna hafa gengið misjafnlega Örvar hefur einkum verið á grálúðuveiðum og þar hefur þokkalegt verð á afurðum bætt upp fremur dræma veiði. Í undirbúningi er að Örvar fari í slipp í haust þar sem hann verður hreinsaður og málaður og skut hans slegið út til að bæta sjóhæfni skipsins. Arnar var í fyrri hluta síðasta túr á karfaveiðum en þegar botninn datt úr þeim fór hann í aðrar tegundir aðallega þorsk, ýsu og ufsa. Veiðarnar gengu ágætlega og landar hann nú um 365 tonnum af unnum afurðum sem eru að aflaverðmæti um 68 milljónir. Umreiknað í afla upp úr sjó er veiðin um 650 tonn og þar af úthafskarfi um 1/3 aflans. Arnar mun síðan halda til veiða í Barentshafi og fara til veiða í rússneskri lögsögu. Veiðiheimildir þar eru um 750 tonn og reiknað með að kvótinn verði tekin í einni veiðiferð.

Höfðaskóli sem verið hefur bleikur frá 1995 mun hljóta nýjan svip og nýjan lit á næstu vikum. Samið hefur verið við Trésmiðju Helga Gunnarssonar að endurmála skólahúsið. Þegar undibúningur hófst að því verki kom í ljós að gamla málningin var orðin svo þykk á elsta hluta hússins að ákveðið var að hreinsa hana af því ella myni hún springa og flagna af. Sprunguviðgerðir munu einnig fara fram áður en yfirmálun verður framkvæmd. Litur hússins hefur verið skemmtilega til umræðu undanfarin ár. Margir hafa látíð í ljósi efasemdir um hinn bleika lit en aðrir hafa látið sér vel líka. Flestir hafa haft skoðun á litnum og orðaskipti um hann oft verið skemmtileg. Nú mun væntanlega kveða við annan tón í litavalinu en ráðamenn skóla og sveitarfélags hafa sett um véfréttasvip þegar spurt hefur verið um litinn. Hvað sem því líður þá er skólinn nú í tveimur litum, gamla gula litnum sem upphaflega var á húsinu og bleika litnum sem einkennt hefur húsið undanfarin ár. Reiknað er með að verkinu verði lokið í septembermánuði.