Söngur um sólstöður hátíðartónleikar á annan í jólum 2010 Blönduósskirkju kl.16.00 og Hólaneskirkju kl.20.30 Fram koma: 40 manna kór, fólk úr kirkjukórum Blönduóss, Þingeyra og Undirfellskirkna og Samkórnum Björk, kennarar Tónlistarskóla A-Hún. ásamt 9 einsöngvurum. Á dagskránni eru jólasálmar og jólapopplög. Stjórnandi er: Skarphéðinn H. Einarsson Undirleikur: Sólveig Sigríður Einarsdóttir orgel Þórður Haukur Ásgeirsson gítar Höskuldur Sv. Björnsson gítar Guðbjartur Sindri Vilhjálmsson trommur Jón Ólafur Sigurjónsson bassi Benedikt Bl. Lárusson hljómborð og píanó Sigurdís Sandra Tryggvadóttir saxofón Helga Dögg Jónsdóttir saxofón Einsöngvarar eru: Þórhalla Guðbjartsdóttir, Berglind Björnsdóttir, Nína Hallgrímsdóttir, Hilmar Örn Óskarsson, Anna Kristín Brynjólfsdóttir, Þórður Rafn Þórðarson, Guðmundur Karl Ellertsson, Lárus Blöndal Benediktsson og Þórhallur Barðason Aðeins tvennir tónleikar. Miðaverð. kr.2000 fyrir 16 ára og eldri 1000 fyrir 12-16 ára frítt fyrir yngri en 12 ára Miðapantanir: þriðjudag 21des. og miðvikudag 22. des. Í síma 4524340 frá kl.16-19 báða dagana. Miðasalan er við innganginn. (Verðum með posa). Tónleikarnir eru styrktir af Menningarráði Norðurlands vestra.

Nú er komið að síðustu opnunarhelgi Djásna og dúllerís á þessu ári. Opið verður laugardag og sunnudag frá kl. 14 -18 en einnig verður opið á Þorláksmessu frá kl. 14 – 21 Það er ábyggilegt að einhver fær þá eitthvað fallegt til að setja í jólapakkana, því að nóg er nú vöruúrvalið. Handverk og hönnun úr heimabyggð er það ekki málið? Djásn og dúllerí.

Sunnudaginn 19. desember kl. 13 til 17:30 verður haldið námskeið í japanskri pappírsgerðarlist á vegum Ness listamiðstöðvar.  Leiðbeinandi á námskeiðinu er Tatiana Ginsberg pappírslistakona frá Bandaríkjunum en hún dvelur hjá Nesi.  Námskeiðið mun fara fram í vinnustofu Ness listamiðstöðvar að Fjörubraut 8 á Skagaströnd. Tatiana mun kenna þátttakendum að búa til pappír samkvæmt gömlum japönskum aðferðum. Skráning fer fram hjá Ólafíu Lárusdóttur í síma 898-7877 eða með með því að senda tölvupóst á netfangið olafia@neslist.is. Þátttaka er ókeypis og allir velkomnir. Vinsamlegast gerið ráð fyrir að fötin blotni og hafið með ykkur handklæði og föt til skiptanna.

FUNDARBOÐ Fundur verður haldinn í sveitarstjórn Skagastrandar miðvikudaginn 15. desember 2010 á skrifstofu sveitarfélagsins kl 1500. Dagskrá: 1. Ákvörðun um álagningarstuðla útsvars og fasteignagjalda 2011 2. Fjárhagsáætlun 2011 a) Bréf samgöngu og sveitarstjórnarráðuneytis dags. 17. nóv. 2010 b) Rekstrayfirlit og sjóðstreymi áætlunar 2011 c) Sundurliðun áætlunar 2011 3. Bréf: a) Elíasar B. Árnasonar, dags. 7. desember 2010. b) Byggðasamlags um menningar og atvinnumál, dags. 29. nóvember 2010. 4. Fundargerðir: a) Tómstunda- og menningarmálanefndar, 25.11.2010 b) Byggðasamlags um menningar og atvinnumál, 18.11.2010 c) Samvinnunefndar um svæðisskipulag A-Hún., dags. 8. nóvember 2010 d) Stjórnar SSKS, dags. 1. desember 2010 e) Stjórnar SSNV, 9.11.2010 f) Stjórnar Norðurár bs. 19.11.2010 g) Stjórnar Norðurár bs. 26.11.2010 h) Stjórnar Norðurár bs. 29.11.2010 5. Önnur mál Sveitarstjóri

Jólamarkaður verður í dag ,laugardaga, á vegum Djásna og dúlerís í Gamla kaupfélagshúsinu rétt eins og undanfarnar helgar. Þarna er margt eigulegt til sölu og ábyggilegt að hægt er að finna góðar jólagjafir fyrir unga sem aldna. Og það heyrir til tíðinda að í dag koma börn úr tónlistarskólanum og flytja jólalög. Jólamarkaðurinn er líka opinn á morgun, sunnudag.

Jólatónleikar Tónlistarskóla A-Hún voru haldnir í Hólaneskirkju þriðjudaginn 7. desember . Stigu þá á svið fjölmargir efnilegir tónlistarmenn framtíðarinnar. Ótrúlega margir ungir Skagstrendingar læra á hljóðfæri og vekur það mikla athygli hversu hæfileikaríkir þeir eru. Meðfylgjandi myndir voru teknar af hinum ungu tónlistarmönnum.

Spákonuarfur hefur á aðventunni undanfarin tvö ár staðið fyrir jólastemningu og sögustund fyrir börn í Árnesi. Litla húsið fyllist af áhugasömum börnum sem sitja í stólum eða gólfi og sum standa en öll hlusta með andakt á jólasögurnar. Síðasta miðvikudag var Árnes fullt af börnum. Inni var rökkur, aðeins kveikt á kertum og litlum rafljósum. Andrúmsloftið var eins og í gamla daga þegar skammdegið grúfði yfir og fólk skemmti hverju öðru. Skuggarnir urðu langir og sögurnar lifnuðu við og hver veit nema jólasveinarnir hafi legið á glugga og hlustað. Næst verður jólastemning og sögustund í Árnesi miðvikudaginn 15. desember kl. 17 og það er verður sú síðasta fyrir þessi jól.

Félagsstarf aldraðra á Skagaströnd er með miklum blóma og hefur verið svo í meira en fjórtán ár eða frá því til þess var stofnað. Í hverri viku, á mánudögum og fimmtudögum, hittast allt að 26 manns á besta aldri og unir sér í góðum félagsskap við ýmiskonar handavinnu, spil og spjall. Á fimmtudögum koma til viðbótar fimm manns utan af Skaga og er þá haft fyrir satt að enn við að aukist skemmtunin að miklum mun. Meðfylgjandi myndir voru teknar í Fellsborg. Fyrir utan þá sem sátu við borð og spiluðu beindist athyglin að fjölbreyttu föndrinu sem fólkið var með í höndunum. Þarna var unnið að ýmsu, jafnvel jólagjöfum. Máluð voru jólatré úr keramík, listaverk prjónuð og ýmislegt fleira.

Kvenfélagið Eining býður Skagstrendingum og öðrum þeim sem áhuga hafa í aðventustund í kvöld, fimmtudaginn 9. desember kl. 20. Boðið verður upp á kaffi, heitt súkkulaði og kökur, tónlistaraðtriði og upplestur úr bókum. Fólk er hvatt til að koma og eiga notalega stund saman á aðventunni. Aðgangur er ókeypis en viðburðurinn er styrktur af Minningarsjóði hjónanna frá Garði og Vindhæli.

Nú verða sagðar veðurfréttir. Veðrið á Skagaströnd í nóvember var með miklum ágætum. Skiptist á frost og frostleysur. Vindur blés eins og lög gera ráð fyrir, stundum hressilega en oftar en ekki var hann frekar máttlaus. Þessa skýru staðreyndir liggja nú ljósar fyrir vegna þess að veðurstöð var tekin í notkun á Skagaströnd þann 9. nóvember síðastliðinn. Hún er staðsett við höfnina og upplýsingar um mælingar er að finna á hér vinstra megin.  Veðurstöðin geymir upplýsingar um vindstyrk, vind í hviðum, vindátt, loftþrýsting og lofthita og hægt er að vista þær á Excel skjal. Stöðin skráir ofangreindar staðreyndir á tíu mínútna fresti. Samanteknar upplýsingar um vindstyrk og hitastig í nóvember má sjá á meðfylgjandi línuritum. Meðalhitinn í nóvember, frá 9. til 30. var 0,5 gráður. Hæstur meðalhitinn var 6,7 gráður miðvikudaginn þann 19. Lægstur meðalhitinn var -3,9 gráður sunnudaginn 12. Í tólf daga var frost í nóvember en 8 daga var hitinn yfir frosmarki. Líklegast hefur það engan tilgang að birta meðalvindstyrk mánaðarins. Engu að síður var hann 6 m/s. Fimm daga í nóvember var hvassara en 10 m/s. Yfirleitt var lygnara. Til dæmis hreyfði vart vind dagana 19. til 25. nóvember. Raunar bera að geta að svo lygnt er á Skagaströnd að allan mánuðinn bærðist ekki hár á höfði þess sem þessar línur ritar. Enn hafa ekki verið teknar saman upplýsingar um vindátt. Þó má gera ráð fyrir að vindur hafi staðið úr einhverjum höfuðáttunum eða um það bil. Vandinn hér lýtur að því að búa til vindrós á grundvelli fyrirliggjandi gagna. Kunni einhver skil á því væri gott að fá aðstoð við það. Væntanlega verður haldið áfram að segja frá því indæla veðri sem alltaf ríkir á hér og það stutt með tölum frá Veðurstofu Skagastrandar. Að vísu sagði glöggur maður einhvern tímann að sennilegasta lygin væri sú sem byggir á meðaltali.