Þjóðleikur er stórt leiklistarverkefni sem haldið er á öllu Norðurlandi í samstarfi við Þjóðleikhúsið og fjölmarga áhugasama aðila. Verkefnið nær til alls Norðurlands, allt frá Bakkafirði til Húnavatnssýslna. Mjög góð þátttaka er á Norðurlandi en nú hafa 14 hópar sótt um þátttöku í verkefninu. En það eru: Gjörningahópurinn Orkidea frá Akureyri, Leikhópurinn list, Grunnskóli Húnaþings vestra, Grunnskóli Fjallabyggðar, Yggdrasil – Leikfélag VMA, DADDAVARTA frá Skagaströnd, Blönduskóli, Árskóli á Sauðárkróki, Öxarfjarðarskóli, Píramus og Þispa – leikfélag Framhaldsskólans á Húsavík, Borgarhólsskóli á Húsavík, tveir hópar frá grunnskólum Akureyrar og síðan einn hópur frá Þórshöfn. Þrjú glæný leikrit hafa verið skrifuð fyrir Þjóðleik, höfundarnir eru: Jón Atli Jónasson, Kristín Ómarsdóttir, Brynhildur Guðjónsdóttir og Ólafur Egill Egilsson sem skrifa verk í sameiningu. Næstu helgi verður námskeið haldið í Þjóðleikhúsinu fyrir leiðbeinendur hvers hóps, þar sem listrænir stjórnendur í fremstu röð verða til leiðsagnar. Leiðbeinendur munu fá kynningu á leikverkunum sem eru í boði og þeim gefst tækifæri á að hitta og ræða við höfunda leikverkana. Stefnt er á að halda tækninámskeið fyrir hópana og verður það haldið á Norðurlandi helgina 7.-9. janúar 2011. Hver hópur setur upp leiksýningu í sinni heimabyggð og frumsýnir þegar honum hentar. Helgina 1-3.apríl 2011 verður haldin lokahátíð þar sem hóparnir koma saman með sýningar sínar. Nánari upplýsingar um verkefnið veita Vigdís Jakobsdóttir vigdis@leikhusid.is sími: 899 0272, Guðrún Brynleifsdóttir gudrunb@skagafjordur.is sími: 898 9820 og Alfa Aradóttir alfaa@akureyri.is sími: 460 1237 en þær í framkvæmdaráði Þjóðleiks.

Þjóð til þings 12. október 2010 Borgarafundur á Sauðárkrók í dag um endurskoðun stjórnarskrárinnar Stjórnlaganefnd og Samtök sveitarfélaga í Norðurlandskjördæmi vestra halda borgarafund í Fjölbrautarskóla Norðurlands vestra, bóknámshúsi í dag 12. október frá klukkan 17:00-19.00 Fundurinn er kynningafundur um stjórnlagaþing og Þjóðfund 2010 auk þess sem kallað er eftir sjónarmiðum íbúa. Stjórnlaganefnd var kosin af Alþingi í sumar til þess að undirbúa endurskoðun stjórnarskrárinnar. Nefndinni er ætlað að finna og leggja fram gögn fyrir stjórnlagaþing, standa fyrir Þjóðfundi um endurskoðun á stjórnarskrá, vinna úr upplýsingum frá fundinum og afhenda stjórnlagaþingi og loks að leggja fram hugmyndir að breytingum á stjórnarskránni. Guðrún Pétursdóttir formaður stjórnlaganefndar: ,,Við viljum kynna Vestfirðingum þau áform sem eru uppi um endurskoðun á stjórnarskrá lýðveldisins. Við sem stöndum að undirbúningum óskum einnig eftir því að fá að heyra sjónarmið fólks um hvernig samfélag það vill byggja. Við hvetjum Vestfirðinga til að koma á fundinn og láta rödd sína heyrast.“ Nánari upplýsingar gefur: Berghildur Erla Bernharðsdóttir, upplýsingafulltrúi, GSM: 694-5149 berghildur@stjornlagathing.is

Vegna fyrirliggjandi tillagna um niðurskurð fjárframlaga til Heilbrigðisstofnunarinnar á Blönduósi í frumvarpi til fjárlaga fyrir árið 2011 hafa sveitarfélögin í Austur-Húnvatnssýslu í samvinnu við Stéttarfélagið Samstöðu, ákveðið að halda íbúafund um framtíð Heilbrigðisstofnuarinnar, þriðjudaginn 12. október n.k. kl. 17:00 í Félagsheimilinu á Blönduósi. Kröfuganga verður farin frá Heilbrigðisstofnuninni á Blönduósi að Félagsheimilinu á Blönduósi. Lagt verður af stað frá Heilbrigðisstofnuninni kl. 16:45. Á fundinn verður heilbrigðisráðherra boðaður ásamt öðrum þingmönnum kjördæmisins. Framsögu á fundinum halda m.a. fulltrúi sveitarfélaganna, Samstöðu, starfsmanna Heilbrigðisstofnunarinnar og fleiri. Sýnum samstöðu og fjölmennum á fundinn.

Boðið er til opins borgarafundar um endurskoðun stjórnarskrárinnar. Fundurinn verður haldinn á Fjölbrautarskólanum bóknámshúsi, Sauðárkróki 12. október og hefst kl. 17:00. Til fundarins er boðið af Stjórnlaganefnd og Samtökum sveitarfélaga á Norðurlandi vestra. Nefndarmenn greina frá áformum um endurskoðun stjórnarskrárinnar, frá þjóðfundi til þjóðarinnar.  Fundurinn hefur það að markmiði að sjónarmið íbúa um inntak stjórnarskrárinnar og hvernig samfélag þeir vilja byggja fái hljómgrunn. Allir eru hvattir til að mæta og láta rödd sína heyrast. Frekari upplýsingar er að finna á vefsíðunni: www.thjodfundur2010.is Stjórnlaganefnd og Samtök sveitarfélaga á Norðurlandi vestra.

Dagsbirtan minnkar nú með hverjum deginum sem líður. Líklega þýðir það að nú er komið haust. Veðrið leikur þó við Skagstrendinga. Hlýtt er í lofti og sólin skín nær því upp á hvern einasta dag. Egu að síður sölna laufin á trjánum, lyngið í Borginni verður rauðleitt og skuggar leika um hlíðar. Hásjávað er þessa dagana, að minnsta kosti í Skagastrandarhöfn. Mikill sjór þýðir væntanlega meiri fiskur ... og minna land. Meðfylgjandi myndir voru teknar sólríkan fimmtudagsmorgun þegar hús og bátar brostu við upprennandi sól. Ekki er lengur spáð miðsumarshita á laugardaginn, þar brást Veðurstofa Íslands Skagstrendingum. Suðlægar áttir munu þó gæla við heimamenn og færa okkur áframhaldandi hlýindi yfir helgina og fram í næstu viku.

Alls var landað rúmlega 1.782 tonnum í Skagastrandarhöfn í september og er það metafli og muna elstu menn vart annað eins. Aflinn er nærri fjórum sinni meiri en í september árið 2007, rúmlega þrefalt meiri en í september 2008 og tvöfalt meiri en í fyrra, en þá var hann 883 tonn. Raunar hefur aldrei á síðustu þremur árum komið jafn mikill afli á land í einum mánuði. Áður hafði mestur afli komið á land í nóvember 2008, 1.575 tonn, og í nóvember Aflabrögð hafa því verið með mesta móti og mörg skip hafa lent i því að vera að klára kvótann alltof snemma og útgerðarmenn hafa því sent þau á aðrar veiðar. Um 37 skip og bátar hafa gert út frá Skagaströnd í september og voru smærri bátarnir flestir, alls 22. Aflahæstu skipin eru þessi: Arnar, HU1, 1 löndun, 412 tonn Ágúst GK95, 5 landanir, 281 tonn Valdimar GK195, 6 landanir, 268 tonn Sturla GK12, 2 landanir, 141 tonn Sighvatur GK57, 1. löndun, 81 tonn Kristrún RE177, 1 löndun, 37 tonn Rifsnes SH44, 1 löndun, 24 tonn Gullhólmi SH202, 1, löndun, 19 tonn Umsvifin í Skagstrandarhöfn eru þó meiri. Í september voru flutt þaðan nærri 700 tonn af brotajárni á vegum Hringrásar.

FUNDARBOÐ Fundur verður haldinn í sveitarstjórn Skagastrandar fimmtudaginn 7. október 2010 á skrifstofu sveitarfélagsins kl 800. Dagskrá: 1. Undirbúningur fjárhagsáætlunar 2011 2. Deiliskipulag Hólaness 3. Bréf: a) Orkustofnunar, dags. 29. sept. 2010 b) Samgöngu- og sveitarstjórnarráðuneytis, dags. 24. sept. 2010 c) Sjávarútvegs- og landbúnaðarráðuneytis, dags. 27. sept. 2010 d) Sóknarnefndar Hólaneskirkju, dags. 21. sept. 2010 4. Fundargerðir: a) Stjórnar byggðasamlags um Tónlistarskóla A-Hún 15.09.2010 b) Samvinnunefndar um svæðisskipulag A-Hún. 28.09.2010 c) Stjórnar SSNV, 13.09.2010 5. Önnur mál Sveitarstjóri

Óvanaleg veðursæld hefur verið á Skagaströnd undanfarnar vikur miðað við árstíma. Sumum kann að þykja það undur mikil því frá lokum síðustu verslunamannahelgar hafa fjölmiðlar verið ósparir á að minna landsmenn á að haustið sé að koma. Þeir hafa rætt um haustlægðir og hryllt sig uppúr og niður við tilhugsunina um föl í fjöll. Það kann vel að vera að haustið sé komið á suðvesturhorni landsins en hér á Skagaströnd og raunar á öllu Norðurlandi vestra kvartar enginn - hér er enn hásumar. Suðaustanáttin hefur verið ríkjandi og það þekkja kunnugir að þegar hún andar verða hitar mestir í landshlutanum. Þá verður eiginlega til hnúkaþeyr, hlýr og þurr vindur en nokkuð hvass.  Staðhættir á Skagströnd eru þó þannig að fjöllin veita nokkuð skjól og því verður hér lygnara en víða annars staðar. Þegar sólin skín við slíkar aðstæður má reikna með því að hitastigið hækki verulega. Sem kunnugt er segja opinberar hitatölur oft ekki mikið um raunverulegan hita. Á veðurathugunarstöðinni Blönduós, sem er á stór Skagstrandarsvæðinu, hefur mestur hiti verið í kringum 13° en á heimilismælum og víðar um Skagaströnd reiknast mönnum til að hitinn hafi verið minnst þremur til fjórum gráðum hærri. Þeir sem fylgjast best með grassprettu að hausti eru fyrst og fremst golfarar. Með nef sitt og glyrnur ofan í snöggsleggnum flötum golfvallar Skagastrandar hafa þeir fundið út að grasið vex meira en góðu hófi gegnir. Um síðstu helgi voru því sláttuvélar teknar fram og nokkrar flatir slegnar og raunar einnig brautir. Rúllar nú boltinn „eðlilega“ og golfarar hafa tekið gleði sína á ný. Raunar hafa þeir lítið getað kvartað því nú hafa þeir fengið rúma fimm mánuði til að iðka leik sinn og hefur golfvertíðin sjaldan verið veðurbetri. Þó svo að nú leggist vindar í norðanátt næstu tvo daga má búast við áframhaldandi hlýindum. Aftur mun suðrið sæla anda vindum þýðum. Veðurstofa Íslands spáir sunnan- og suðaustanáttum frá og með fimmtudegi. Á laugardaginn er til dæmist spáð 16 gráðu hita og þá er víst að fleiri kætast en golfarar. Og hvaða tal var þetta um haustlægðir ...

Vinnumálastofnun á Skagaströnd leitar eftir áhugasömum skrifstofustarfskrafti með góða leikni í mannlegum samskiptum, lipurð í tölvunotkun og áhuga á að skila góðu starfi.  Launakjör eru samkvæmt kjarasamningum SFR.  Framhalds-eða háskólamenntun er kostur sem og reynsla af skrifstofustörfum. Helstu verkefni Greiðslustofu Vinnumálastofnunar eru afgreiðsla umsókna um atvinnuleysisbætur og upplýsingagjöf.  Hlutverk Greiðslustofu er að sjá um greiðslur atvinnuleysistrygginga fyrir allt landið. Á skrifstofunni á Skagaströnd starfar nú rúmlega 20 manna liðsheild.  Áhugasamir eru hvattir til að hafa samband og/eða kynna sér starfsemi Vinnumálastofnunar á www.vinnumalastofnun.is   Líney Árnadóttir forstöðukona veitir upplýsingar í síma 455 4200 og tekur við umsóknum ásamt ferilskrá á netfangið liney.arnadottir@vmst.is.

Þorgrímur Þráinsson hlaut í gær barnabókarverðlaunin fyrir bókina Ertu guð afi? Þorgrímur er vel þekktur hér á Skagaströnd og hefur sýnt staðnum og íbúum hans margvíslegan heiður. Nokkrum sinnum hefur hann dvalið í Nesi listamiðstöð og unnið að ritstörfum.  Fyrir tveimur árum gaf hann eitt eintak af bókinni Hvernig gerirðu konuna þína hamingjusama inn á hvert heimili á Skagaströnd. Ekki er dregið í efa að hamingjan hefur síðan aukist á Skagaströnd, ekki aðeins meðal kvenna heldur líka karla, og á bókin efalaust þátt í því.  Þorgrímur hefur margsinnis í fjölmiðlum sagt frá dvöl sinni á Skagaströnd. Í grein sinni á vef World Class í september 2008 segir hann meðal annars. Ég var þeirrar gæfu aðnjótandi að dvelja á Skagaströnd í júní, þar af í þrjár vikur með fjóra krakka. Hvílík lífsgæði. Fámennt samfélag, enginn asi, allir kurteisir, heimilislegt andrúmsloft, kaffihús, íþróttaviðburðir, sundlaug, golfvöllur, listamiðstöð og svo mætti lengi telja, í þessu rúmlega 500 manna samfélagi. Allt þorpið var leikvangur barnanna og það gerist af sjálfu sér að allir eru einhvern veginn að passa alla Eftirfarandi er frétt Morgunblaðsins frá því í dag 29. september,  um barnabókaverðlaunin og Þorgrím Þráinsson. Fréttin er birt með góðfúslegu leyfi Barkar Gunnarssonar, blaðamanns Morgunblaðsins: Í gær vann Þorgrímur Þráinsson Íslensku barnabókaverðlaunin fyrir bókina Ertu guð afi? Þorgrímur er meðal þekktari rithöfunda þjóðarinnar og hafa barna- og unglingabækur hans notið fádæma vinsælda í tvo áratugi.  Þorgrímur hóf rithöfundarferilinn með stæl og varð fyrsta bókin hans, Með fiðring í tánum, að metsölubók árið 1989. Tuttugu og einu ári síðar hefur Þorgrímur gefið út á þriðja tug bóka. Þorgrímur vann þessi sömu verðlaun árið 1997 fyrir bókina Margt býr í myrkrinu. Auk Íslensku barnabókaverðlaunanna hefur Þorgrímur hlotið Barna- og unglingabókaverðlaun Skólamálaráðs Reykjavíkurborgar og Bókaverðlaun barnanna fyrir síðustu bók sína Núll, núll 9. Bókin speglar lífsviðhorf hans Þorgrímur segir að þessi nýjasta bók, Ertu guð afi?, fjalli um leyndarmál lífsins. Hún er um 77 ára gamlan mann sem er kallaður afi Afríka og samskipti hans við sonardóttur sína, Emmu Soffíu (11 ára) en þau eru að hittast í fyrsta skipti. Hún veit að hann býr yfir risa leyndarmáli sem hann segir hana ekki vera tilbúna til að heyra strax. „Sagan á sér stað við Landakotstúnið,“ segir Þorgrímur. „Hún fjallar um samskipti þeirra tveggja. Afi Afríka er að kenna barnabarninu sínu sitthvað um lífið, þetta eru samskipti gömlu kynslóðarinnar við þessa nýjustu, í sinni fegurstu mynd.“ Þorgrímur segist hafa séð auglýsinguna um verðlaunin og flett þá upp í minnisbókinni sinni og fundið þetta efni. Það tók hann ekki langan tíma að átta sig á því að hann hafði í raun verið að skrifa þessa sögu alla ævina. Þar af leiðandi gengu skrifin mjög vel og hann kláraði hana á skömmum tíma. „Þessi bók endurspeglar viðhorf mín til lífsins,“ segir hann. Næsta haust kemur framhald bókarinnar Núll núll 9 út hjá Forlaginu en hún nefnist Þokan. En þessi verðlaunabók kemur sjálfkrafa út hjá bókaforlaginu Vaka-Helgafell. Verðlaun þegar nafnleynd er Það er alkunna að þrátt fyrir að vera margverðlaunaður höfundur og átt metsölubækur á sölulistanum hefur Þorgrímur Þráinsson aðeins einu sinni fengið úthlutað úr Launasjóði rithöfunda. „Já, það er rétt,“ segir Þorgrímur. „Það er alltaf gaman að fá verðlaun fyrir verk sín en ég hefði örugglega ekki átt möguleika á að vinna þau nema vegna þess að keppnin var haldin í nafnleynd. Ég hef fimm sinnum sent verk í svona samkeppni þar sem er nafnleynd og fjórum sinnum unnið.“ Aðspurður hvort hann geti lifað af skrifunum einum saman þegar launasjóðurinn horfir alltaf framhjá honum segir hann það af og frá. „Skriftirnar eru ástríða sem maður sinnir en ég fæ tekjurnar aðallega frá hliðarverkefnum eins og fyrir Íþrótta- og ólympíusambandið, ég skrifa skýrslur fyrir breskt fyrirtæki um leiki sem fara fram hérlendis og var fenginn í að skrifa sögu Vals, það er á því sem ég lifi. Það þótt ég sé iðulega á topp tíu sölulista bóka, en það er bara ekki mikið úr þessu að fá þegar launasjóðurinn sér bara um sína.“ Sagan  » Íslensku barnabókaverðlaunin voru fyrst veitt árið 1986.  » Margir af okkar dáðustu barnabókahöfundum hafa unnið til þeirra. Af þeim má nefna Iðunni Steinsdóttur, Brynhildi Þórarinsdóttur og Friðrik Erlingsson.  » Þátttakan í ár var afar góð og bárust á fjórða tug handrita í keppnina. Verðlaunaféð nemur 500.000 krónum. --- Bækur Þorgríms Þráinssonar eru þessar samkvæmt bókmenntavefnum 100.bokmenntir.is: Barnabækur Amó Amas Bak við bláu augun Hjálp, Keikó! Hjálp! Hlæjandi refur: sagan um Úlfhildi og indíánastrákinn sem flúði til Íslands Kvöldsögur Kýrin sem hvarf Lalli ljósastaur Litla skrímslið Margt býr í myrkrinu Með fiðring í tánum Mitt er þitt Nóttin lifnar við Sex augnablik Spor í myrkri Svalasta 7an Tár, bros og takkaskór Undir 4 augu Kennslubækur Fjögur í rusli Hvernig gerirðu konuna þína hamingjusama Skáldsögur Allt hold er hey Ævisögur Meistari Jón: predikari af Guðs náð Hljóðbækur Margt býr í myrkrinu