Kvennfélagskonur hafa staðið í ströngu við undirbúning þorrablótsins sem fram fer á laugardaginn í Félagsheimlinu Fellsborg. Hefur þorrailmurinn smátt og smátt tekið völdin í sölum hússins auk þess sem hlátrasköll og skarkali sem berst ofan af sviðinu, frá þorrablótsskemmtinefndarfólki, gefur vísbendingar um að allt sé að verða klárt. Ekki hefur farið miklum sögum af þeim atriðum sem taka á fyrir enn víst má telja að stiklað verði á helstu viðburðum ársins. Kvennfélagskonur höfðu á orði að matarborðið ætti að verða í hefðbundnum stíl svo það er ekki hægt annað en að láta sér hlakka til.

Áhugaljósmyndarar eiga oft í fórum sínum einstakt safn mynda sem segja sögu liðinna ára. Skagaströnd státar af mörgum slíkum og hefur einn þeirra, Árni Geir Ingvarsson nú komið sér upp heimasíðu með eigin ljósmyndum og myndum úr safni Herberts Ólafssonar. Það er ómetanlegt fyrir söguna að eiga aðgang að þessum myndum og gaman af þegar það er opnað öllum með aðgangi á netinu. Árni Geir hefur í gegnum tíðina tekið mikið af myndum og hafa þær mikið gildi þar sem þær segja sögu og þær breytingar sem skýrast koma fram þegar litið er um öxl. Hægt er að heimsækja myndasíðu Árna Geirs á slóðinni: http://www.123.is/arnigeir/default.aspx?page=albums

Laugardaginn 21. janúar keppti hljómsveitin “SPOR” frá Skagaströnd í árlegri hljómsveitarkeppni, “Allra veðra von”, í Vestmannaeyjum. Skemmst er frá því að segja að Skagstrendingarnir ungu stóðu sig frábærlega og urðu í öðru sæti af þrettán hljómsveitum í keppninni. Verðlaunin eru að spila á “Þjóðhátíð 2006”. Hljómsveitina “SPOR” skipa fjórir ungir menn, Almar söngvari, Ómar gítarleikari, Sævar trommuleikari og yngsti meðlimurinn er Kristján bassaleikari. Hljómsveitin spilar svokallað “Heavy Metal” rokk og hefur verið iðin við að semja lög. Umfjöllun um þessa keppni var í þættinum “Rokkland” á Rás 2 á sunnudaginn og verður þátturinn endurtekinn eftir 10 fréttir þriðjudaginn 24. janúar. Tómstunda- og íþróttafulltrúi.

Vikuna 23.-27. janúar verður Skákvika í Höfðaskóla í samstarfi við skákfélagið Hrókinn. Róbert Harðarson alþjóðlegur skákmeistari verður á Skagaströnd þessa daga og mun hann kenna skólabörnum auk þess að vera með skákæfingar, fjöltefli og hraðskákmót. Hrókurinn hefur að undanförnu staðið fyrir öfluga skákstarfi á Íslandi svo og erlendis. Stuðningsaðilar skákvikunnar eru Fisk Seafood, Landsbanki Íslands og Marska ehf.

ÞORRABLÓT 2006 Þorrablótið verður haldið laugardaginn 28.janúar 2006 í Fellsborg. Dagsskrá: Húsið opnar kl:20:00. Borðhald hefst kl:20:30. Veislustjóri er Lárus Ægir. Skemmtatriði að hætti heimamanna. Hljómsveitin VON frá Sauðárkróki heldur uppi dúndurfjöri fram eftir nóttu. Miðar verða seldir sunnudaginn 22.janúar kl. 12:00 í andyri Fellsborgar. Miðaverð kr. 4.800.- Miðaverð eldriborgara og unglinga fæddir 1990 kr. 3.800.-

Eins og Skagstrendingar og nærsveitamenn hafa væntanlega tekið eftir þá þurfa farþegar, sem eru að koma eða fara á leiðinni Skagaströnd – Blönduós, að hafa samband við sérleyfishafa leiðarinnar milli Reykjavíkur - Akureyrar með a.m.k. 6 tíma fyrirvara til að fá þjónustu. Þetta er í samræmi við útboð Vegagerðarinnar og samnings hennar og Hópferðamiðstöðvarinnar-TREX frá því í nóvember s.l.. Til að njóta þjónustunnar er hægt að hafa samband við umsjónarmann leiðarinnar, Óskar Stefánsson í GSM 699 3219 eða við Hópferðamiðstöðina – TREX í síma 587 6000.“ Jón Gunnar Borgþórsson, framkvæmdastjóri Hópferðamiðstöðin/TREX Hestháls 10, 110 - Reykjavík. Sími 587 6000, Fax 567 4969, www.trex.is - www.vesttravel.is

Björgunarsveitin Strönd og UMF. Fram voru með árlega flugeldasölu sína fyrir áramótin og seldust allar flugeldabirgðir upp. Að venju var dregið úr potti en þeir sem versluðu fyrir 15.000 krónur eða meira komust í pottinn. Það var svo lokahnikurinn á flugeldasölu ársins að afhenda vinningshafanum verðlaunin sem var að sjálfsögðu vegleg flugeldaveisla. Vinningshafi árins 2005 var Jón Heiðar Jónsson, en hann hefur stutt duglega við flugeldasöluna í gegnum árin. Flugeldasalan er ein mikilvægasta fjáröflun félaganna og þakka þau veittan stuðning í gegnum árin.

Auglýsing um byggðakvóta. Hreppsnefnd Höfðahrepps auglýsir eftir umsóknum um byggðakvóta. Sjávarútvegsráðuneytið hefur samþykkt að veita 140 þorskígildislestum til úthlutunar í Höfðahreppi. Eftirfarandi reglur gilda um úthlutun aflaheimilda sem koma í hlut Höfðahrepps: 1. Úthlutuðum veiðiheimildum verði skipt eingöngu milli þeirra útgerðaraðila sem áttu lögheimili á Skagaströnd 1. desember 2004 og eiga skip með veiðileyfi, skráð 1. september 2005. Jafnframt er gert að skilyrði að 2/3 hlutar áhafnar skips sem sótt er um fyrir eigi lögheimili á Skagaströnd. 2. Miðað skal við að stærð fiskiskipa sem hljóta úthlutun sé takmörkuð við 250 brl. 3. Einungis verði úthlutað til þeirra sem leggja fram undirritaðan samning við samþykkta vinnslustöð á Skagaströnd um úrvinnslu aflans skv. úthlutuðum heimildum. Í samningnum skal tiltekið hvers konar úrvinnslu um er að ræða svo og yfirlýsing um að samkomulag sé um fiskverð. Með vinnslustöð er átt við að umrædd fiskvinnsla taki við fiskinum, vinni hann á staðnum og breyti óunnu hráefni í vöru. Slæging á fiski eða einhverskonar framhaldsvinnsla á fiskafurðum sem hafa verið meðhöndlaðar annarsstaðar er ekki viðurkennt sem vinnslustöð til samninga um móttöku á byggðakvóta. Vinnslustöð skal og hafa rekjanlega ferla þar sem hægt er að sýna fram á að fiskur frá ákveðnum aðila hafi komið til vinnslu á ákveðnum tíma. a) Viðkomandi útgerð skal skuldbinda sig til að leggja eitt tonn á móti hverjum tveimur sem úthlutað er af byggðakvóta til vinnslu á Skagaströnd.Við mat á hæfi umsækjanda skal tekið tillit til þess hvort viðkomandi hafi kvótastöðu til að uppfylla það skilyrði. Séu veiðiheimildir umsækjanda ekki nægar er heimilt að skerða úthlutun sem því nemur. b) Við gerð samkomulags um löndun afla vegna byggðakvótans skal við það miðað að honum hafi verið landað samkvæmt samkomulaginu fyrir 1. sept. 2006. Jafnframt skal viðkomandi útgerð sýna fram á með óyggjandi hætti að staðið hafi verið við samkomulag um löndun byggðakvóta síðasta fiskveiðiárs ef slíkt samkomulag hefur verið gert. Hafi ekki verið staðið við löndun afla skv. samkomulagi um byggðakvóta síðasta fiskveiðiárs verður úthlutun skert sem því nemur. Komi til skerðingar skv. a) og b) skal þeim hluta kvótans úthlutað skv. 5. gr. reglna þessarra. 4. Við úthlutun veiðiheimildanna verði miðað við tvo flokka. Annars vegar þá sem hafa tapað veiðiheimildum vegna samdráttar í rækjuveiðum og hins vegar almenn úthlutun til útgerða báta með aflamark.Flokkarnir eru skilgreindir með eftirfarandi hætti: a) Byggðakvóti til báta með leyfi til veiða á innfjarðarrækju í Húnaflóa. Kvóta sem nemur 100 þorskígildislestum verður úthlutað til þeirra sem hafa yfir að ráða heimildum til innfjarðarrækjuveiða enda uppfylli þeir skilyrði 1.- 3. gr. reglna þessara. Skal kvótanum skipt hlutfallslega eftir veiðiheimildum til innfjarðarrækjuveiða á Húnaflóa eins og þær voru 1999- 2000. Umræddum kvóta verði skipt milli þeirra útgerða sem stunduðu innfjarðarækjuveiðar á tímabilinu og enn gera út frá Skagaströnd. b) Byggðakvóti til báta með aflamark. Kvóta sem nemur 40 þorskígildislestum verður úthlutað til báta sem uppfylla skilyrði 1.-3 gr. reglna þessara og skal skipta framangreindum heimildum jafnt á milli hæfra umsækjenda. 5. Fyrir 15. júlí 2006 skulu útgerðir þeirra báta sem fengið hafa byggðakvóta gera sveitarstjórn skriflega grein fyrir því hvernig þeir muni nýta úthlutaðar aflaheimildir fyrir lok fiskveiðiárs. Geti hlutaðeigandi fyrirsjáanlega ekki fylgt reglum sveitarstjórnar skal hann afsala sér byggðakvótanum. Skal þeim kvóta endurúthlutað 1. ágúst, í þeim flokki sem kvóta var úthlutað í. Skal kvótanum úthlutað jafnt milli þeirra sem þegar hafa uppfyllt skilyrði um veiðar og vinnslu byggðakvótans. 6. Sækja skal um aflaheimildir samkvæmt reglum þessum til hreppsnefndar Höfðahrepps. Með undirritun umsóknar samþykkja viðkomandi aðilar þá skilmála sem reglurnar fela í sér. Umsóknum skal skilað fyrir 10. janúar 2006, á skrifstofu Höfðahrepps á sérstökum eyðublöðum sem þar fást. Hreppsnefnd Höfðahrepps

FUNDARBOÐ Fundur verður haldinn í Hreppsnefnd Höfðahrepps fimmtudaginn 29. desember 2005 á skrifstofu hreppsins kl 1300. Dagskrá: 1. Fjárhagsáætlun 2006, seinni umræða. 2. Álagningareglur fasteignagjalda 2006 3. Byggðakvóti a) Bréf sjávarútvegsráðuneytis, dags. 6. desember 2005. b) Auglýsing um byggðakvóta. 4. Bréf: a) SSNV, dags. 20. desember 2005. b) Skipulagsstofnunar, dags. 15. nóvember 2005. c) Skipulagsstofnunar, dags. 20. desember 2005. d) Siglingastofnunar, dags. 29. nóvember 2005. e) Stéttarfélagsins Samstöðu, dags. 28. nóvember 2005. f) Skipulags- og byggingarfulltrúa Skagafjarðar, dags. 14. desember 2005. 5. Önnur mál. Sveitarstjóri

Hin árlega skötuveisla var haldin í Fellsborg í hádeginu á Þorláksdag. Að vanda var fjölmenni og biðröð eftir að komast í hinar kæstu krásir. Togarsjómenn af Arnari og Örvari stóðu eins og fyrr glaðbeittir, matreiddu og báru fram kæsta skötu, kartöflur og rúgbrauð. Á eftir var öllum boðið upp á kaffi og konfekt. Skötuveislan var sem fyrr öllum opin og í boði sjómanna og útgerðar. Hún hefur skapað sterka og skemmtilega hefð sem fæstir vildu vera án. Skatan er auðvitað mjög sérstakur réttur og ekki fyrir alla en þeim hefur þó fjölgað jafnt og þétt sem gera hana að rétti dagsins á Þorláksmessu.